<h1>སྐྱིད་ན་གོང་གནོན་དང་སྡུག་ན་སྐྱོ་གྲོགས་ཞེས་པ་དེ་ཅི་ཟེར་བ་ཡིན་ཞེ་ན། སོ་སོའི་སྐྱེ་བོའི་བྱིས་པའི་བློ་འདི་ཅོལ་ཆུང་བ་ཡིན་པས། རྐྱེན་ཆུང་ཆུང་རེ་ཡིས་སྒྱུར་སླ་ཞིང་། སྐྱིད་ན་སྐྱིད་ལོང་མེད་པར་རྟ་ངན་སྔོ་མས་རྒྱགས་པ་བཞིན་དུ་ཚོད་མི་ཟིན་པར་མཐོ་ལྡིང་དམའ་ལྡིང་བྱེད་ནས་གད་ཁ་ནས་ཀྱང་མཆོང་འགྲོ་བར་འདུག་སྙམ་པ་ཞིག་བྱེད་པ་དང་། སྡུག་ན་སྡུག་ལོང་དང་ཉམས་དམའ་ན་དམའ་ཚོད་མི་ཟིན་པར་རྔ་མ་སྒྱིད་ཁུག་ལ་འཁུམ་འགྲོ་བ་ཡིན། འོན་ཀྱང་མན་ངག་གི་གནད་ཀྱི་གདམས་པ་འདི་ཚོ་བསྟེན་ནས། གདམས་པ་རང་རྒྱུད་ལ་ཅུང་ཟད་ཙམ་ཞིག་འདྲེས་ཐབས་ཐུབ་སོང་ན། དེ་མ་ཐག་ཏུ་འཁོར་འདས་མཉམ་ཉིད་དུ་རྟོགས་པའི་ལྟ་བ་ཞིག་བརྙེས་མེད་ནའང་། སྐྱིད་སྡུག་གང་བྱུང་རོ་སྙོམས་ཀྱི་གོ་བ་ཞིག་དང་། སྐྱིད་སྡུག་ལམ་ཁྱེར་གྱི་འདུ་ཤེས་ཙམ་རེ་འཛིན་ཐུབ་པར་བྱུང་ན། རྐྱེན་ངན་ཐོག་ཏུ་གློ་བུར་དུ་བབ་དུས། ཐ་མལ་པ་དང་མི་འདྲ་བར་ཁབ་ལེན་ལ་ལྕགས་འབྱར་བ་བཞིན་དུ་ཕྱིའི་རྐྱེན་གྱིས་དེ་མ་ཐག་ཏུ་སྒྱུར་མི་ཐུབ་ཅིང་གནོད་པས་མི་ཚུགས་པའི་གནོད་འགོག་གི་ནུས་པའི་སྟོབས་སམ་གོ་ཆ་ཞིག་ཡོད་འདུག་པ་ཡིན། བརྩོན་འགྲུས་མ་ཞན་ཞིང་དད་པ་དག་སྣང་མ་འཕྱུགས་ན། དེ་ལྟར་རིམ་གྱིས་རིམ་གྱིས་ན་འཕར་ནས། གོ་མྱོང་རྟོགས་པའི་ཐེམ་པ་བརྒྱུད་རིམ་བཞིན་དུ། རིང་པོར་མི་འགོར་བར་རྟོགས་པའི་ཡེ་ཤེས་རང་རྒྱུད་དུ་བརྙེས་སུ་ཡོད་པ་ལ་ཐེ་ཚོམ་མི་དགོས་ཤིང་། དེ་ཡང་ལམ་གྱི་སྦྱང་བགྲོད་ཀྱི་ཁྱད་པར་གྱིས། བསྐྱེད་རྫོགས་ལ་མི་ལྟོས་པར་སེམས་ཉིད་ཡེ་ནས་སངས་རྒྱས་པའི་རང་བཞིན་དུ་བསྟན་པའམ་ཡེ་ཤེས་རང་སྣང་བའི་ངོ་བོར་སངས་རྒྱས་པའི་ལམ་རྫོགས་རིམ་ཆེན་པོའི་འགྲོས་ཀྱིས། འོད་གསལ་སྣང་བཞི་ལུགས་འབྱུང་ལྡོག་གི་བརྒྱུད་རིམ་མམ། ཡང་ན་བསྐྱེད་རྫོགས་ཟུང་འཇུག་གི་ལམ་ནས་རིག་འཛིན་རྣམ་པ་བཞིའི་མྱུར་ལམ་བགྲོད་ནས། མེས་པོ་དམ་པ་གོང་མའི་གཤེགས་ཤུལ་གྱི་ཞབས་རྗེས་ཟིན་ནས། ཕ་རྗེས་བུ་ཡིས་སྙེག་པའི་ཀློང་ཆེན་བརྒྱུད་པའི་ཕྱི་རབས་པ། གང་ལྟར་བཤད་ཀྱང་སེང་ཆེན་དཀར་མོའི་བརྒྱུད་པ་ལ་སེང་ཕྲུག་དང་། བྱ་རྒྱལ་ཁྱུང་གི་བརྒྱུད་པ་ལ་ཁྱུང་ཕྲུག་ལས་གང་དུའང་འགྲོར་མེད་པའི་གདེང་ཚོད་དང་སྤོབས་པའི་ཐུགས་ཤུགས་མི་ཞན་པའི་སྒོ་ནས། ཟབ་ཆོས་གདམས་པའི་རྒྱུན་ལེན་ཞོར་དུ་རང་ཐད་ཀྱི་མི་ཚེའི་སྔ་བར་ཕྱི་གསུམ་གྱི་འགྲོ་ལམ་ལ། སྔ་བལྟས་ཕྱི་བལྟས་ཀྱི་རྒྱང་མིག་གིས་ཚོད་ཐིག་པའི་སྟེང་ནས། ད་རེས་ཐེངས་འདིའི་ཆོས་ཁྲིད་ཀྱི་ཉམས་བཞེས་འདི་བརྒྱུད་དེ། ཕྱི་ཆད་གནས་གང་དུ་ཕྱིན་ཀྱང་། གྲོགས་སུ་དང་འགྲོགས་ཀྱང་། རྐྱེན་བཟང་ངན་ཅི་ཞིག་ལ་ཐུག་ནའང་ཁྱི་རྔ་ལ་མྱེ་འབྱར་བ་བཞིན་དུ་འདུར་རྒྱུག་བྱེད་འདུག་མི་དགོས་པས་མ་ཚད། བློ་ཕ་དང་གྲོས་མ་ལ་ཡང་བྱེད་འདུག་མི་དགོས་པར་རང་བློ་ཁེར་བཅད་ཀྱི་ཕུགས་འདུན་དེ། སྣང་ཤེས་ཐ་མལ་ལས་ལོག་པའི་གང་ཤར་རིག་སྟོང་རྗེན་པའི་ངང་ལས་མི་འདའ་བར། གྲོལ་འཁྲུལ་སེམས་ཀྱི་རི་མོ་དེ་ཐ་སྙད་བྱིས་པའི་རྩེད་མོ་རུ་མཐོང་བའི་ཉམས་ལེན་གྱི་གནད་ཐུགས་ལ་འཆང་དགོས་པ་དང་། ཁྱད་པར་དུ་ཐག་རིང་གི་ཆོས་ཞུ་པ་ཚོས་ཕྱིར་རང་ཡུལ་རང་གནས་ལ། དོན་གཉེར་གྱི་མགྲོན་པོས་བྱེས་དོན་ཐམས་ཅད་འགྲུབ་ནས་གཞིས་ལ་འཁོར་བ་འདྲ་ཞིག་མཛད་དགོས་པའི་ཐུགས་འདུན་མཛོད་ཅེས་ཞུས་པའོ། །</h1><h1><br /></h1><h1><br /></h1>