<h1><b><i style="color: rgb(237, 35, 8);">གནམ་གྱི་སེམས་དཔའ་ཆེན་པོ། ཁྱེད་གང་དུ་བཞུགས།</i></b></h1> <h3><u><i style="font-weight: bold;"> </i><span style="color: rgb(22, 126, 251);">ཉག་བསྟན་འཛིན་ཚུལ་ཁྲིམས།</span><i style="font-weight: bold;"><br /></i></u></h3><h3>རྒྱལ་གཤེན་བསྟན་པ་རིན་པོ་ཆེ།།<br /></h3><h3>ལྔ་སྙིགས་དུས་ཀྱི་གཉན་འཕྲང་འདིར།།</h3><h3>མི་ཉམས་སྤེལ་བའི་ཆོ་ག་མཁན།།</h3><h3>གནམ་གྱི་སེམས་དཔའ་གང་དུ་བཞུགས།།</h3><h3><br /></h3><h3>བླ་མ་ཞིང་ལ་ཕེབས་སོང་ཞེས།།</h3><h3>གཏམ་ངན་རྣ་བར་ཐོས་པའི་ཚེ།།</h3><h3>དམར་ཆུང་སྙིང་ལ་ཟུག་གཟེར་ལངས།།</h3><h3>གནམ་གྱི་སེམས་དཔའ་གང་དུ་བཞུགས།།</h3><h3><br /></h3><h3>རྗེ་ཁྱེད་དྲན་ནས་མཆོད་སྤྲིན་བཤམས།།</h3><h3>རྗེ་ཁྱེད་དྲན་ནས་གདུང་དབྱངས་འབོད།།</h3><h3>རྗེ་ཁྱེད་དྲན་ནས་མིག་ཆུ་ལུད།།</h3><h3>གནམ་གྱི་སེམས་དཔའ་གང་དུ་བཞུགས།།</h3><h3><br /></h3><h3><u><i><b> </b><span style="color: rgb(22, 126, 251);"><b> བཟོད་པ་འབྲུག་གྲགས།</b></span></i></u></h3><h3><br /></h3><h3>སྙིགས་དུས་འདྲེན་པའི་མཆོག་གྱུར་སངས་རྒྱས་སྨན་རི་བ།།</h3><h3>བསྟན་འགྲོའི་དོན་གྱིས་སྐུ་ཚེ་རྫོགས་པའི་རྒྱལ་སྲས་དངོས།།</h3><h3>ལུང་དང་རྟོགས་པའི་སྒྲོན་མེ་ཕྱོགས་ཀུན་སྦར་བའི་མགོན།།</h3><h3>རྟག་པ་སུན་བྱུང་མི་རྟག་ཚུལ་བསྟན་མཛད་པ་འདི།།</h3><h3><br /></h3><h3>ལྔ་བདོ་དུས་ཀྱི་བསོད་ནམས་བྲི་པའི་ང་ཚོ་སྟེ།།</h3><h3>སྐྱོ་གདུང་ཆེ་ཞིང་ཤུགས་རིང་མོད་པའི་ཡིད་ཕམ་བཅས།།</h3><h3>དཔོན་གསས་དམ་པ་ཁྱོད་ལ་སྒོ་གསུམ་རྣམ་དག་གིས།།</h3><h3>གསོལ་བ་འདེབས་སོ་ཐུགས་རྗེས་ཟུངས་ཤིག་བླ་མ་ལགས། </h3><h3><br /></h3><h3>ལུང་རྟོགས་རིག་པའི་མཛོད་འཛིན་འཛམ་གླིང་གཙུག་གི་རྒྱན།།</h3><h3>བསྟན་པའི་གསལ་བྱེད་གྱེར་བསྟན་གདུཊ་དཀར་བསྙལ་མེད་འདེཊ།།</h3><h3>ཉི་མའི་མཚན་འཆང་ཞིང་ལ་ཕེབས་པའི་ངང་ཚུལ་འདིས།།</h3><h3>ས་ཆེན་སྡུག་གིས་མནར་ཞིང་མཆུ་མའི་རྒྱ་མཚོ་བསྐྱིལ།།</h3><h3><br /></h3><h3>ཁྱེད་ཉིད་མ་བཞུགས་ཞིང་ཁམས་གཞན་དུ་གཟིགས་ན་ཡང་།།</h3><h3>གསེར་གྱི་ཁྱུང་ཆེན་ནུབ་ཀྱི་ཕྱོགས་སུ་འཕུར་ན་ཡང་།།</h3><h3>ཉི་མ་སེར་པོ་གངས་རིའི་རྩེ་ནས་ཡིབས་ན་ཡང་།།</h3><h3>སློབ་ཚོགས་ངེད་ཅག་ཐུགས་རྗེས་མ་འདོར་རིན་པོ་ཆེ།།</h3><h3><br /></h3><h3><b><u><i style="color: rgb(22, 126, 251);"> </i><span style="color: rgb(22, 126, 251);"> ཤེས་བྱ་རབ་གསལ།</span></u></b></h3><h3><br /></h3><h3>བསླབ་གསུམ་རྣམ་དག་གསེར་སྦྱངས་ལྷུན་པོ་མཆོག།<br /></h3><h3>རྣམ་གསུམ་བསྟན་པའི་མངའ་བདག་ཡིད་བཞིན་ནོར།།</h3><h3>རིགས་གསུམ་འདུལ་བྱའི་རྟག་འཛིན་བཅོམ་པའི་ཕྱིར།།</h3><h3>སྲིད་གསུམ་མགོན་པོ་བོན་སྐུའི་རྒྱལ་སར་གཤེགས།།</h3><h3><br /></h3><h3>གཞུང་བརྒྱའི་གདམས་བཟང་བུམ་པ་གང་བྱོའི་ཚུལ།།</h3><h3>སློབ་འབངས་བརྒྱ་ཕྲག་དུ་མའི་སེམས་ངོགས་ན།།</h3><h3>བཀའ་དྲིན་བརྗེད་ཐབས་བྲལ་བའི་རྡོ་རིང་ཞེས།།</h3><h3>བཞེངས་པའི་སྐར་མ་འོད་ཆེན་གང་དུ་བཞུད།།</h3><h3><br /></h3><h3>གཤེན་བསྟན་གཉེན་འཕྲང་སྐྱོབས་པའི་དཔའ་བོ་ཉིད།།</h3><h3>འཛམ་གླིང་བོན་འཁོར་བསྐོར་བའི་ཐུགས་བསྐྱེད་ཅན།།</h3><h3>གདོང་དམར་བོད་ཀྱི་མ་བགོས་སྤྱི་ཡི་ནོར།།</h3><h3>སྨན་རི་བ་ལགས་དག་ཞིང་གང་དུ་བཞུགས།།</h3><h3><br /></h3><h3>རྒྱལ་ཀུན་མཁྱེན་བརྩེའི་ངོ་བོ་གཅིག་བསྡུས་ཤིང་།།</h3><h3>ཟབ་རྒྱས་ལུང་རྟོགས་བསྟན་པའི་མཛོད་འཆང་བ།།</h3><h3>སྐུ་ཚེ་ཧྲིལ་བོར་བསྟན་འགྲོའི་དོན་མཛད་པའི།།</h3><h3>མཁས་བཙུན་གྲགས་པའི་ཁྱུ་མཆོག་གང་དུ་བཞུགས།།</h3><h3><br /></h3><h3><br /></h3><h3><br /></h3><h3><br /></h3><h3><br /></h3>