<h3><font color="#167efb"> </font><font color="#ed2308">ང་ཚོ་ཚང་མ་དཀའ་ཁག་ཅིག་ལ་འཕྲད་སོང་།</font></h3><div><font color="#167efb"> གངས་ཞུན།</font></div><div><font color="#167efb">ཉེ་ཆར།</font></div><div><font color="#167efb">ང་ཚོ་ཚང་མ་དཀའ་ཁག་ཅིག་ལ་འཕྲད་འདུག</font></div><div><font color="#167efb">སོ་སོ་རང་རང་ས་ནས།</font></div><div><font color="#167efb">སྙིང་ཁམས་དཀྲུགས་པའི་དཀའ་ཁག་རེ་ལ་འཕྲད་དེ།</font></div><div><font color="#167efb">དགའ་ན་དགོད་མི་འདོད་ཅིང་།</font></div><div><font color="#167efb">ངུས་ན་ངག་མི་ཐོན་པར་གྱུར་བས།</font></div><div><font color="#167efb">ཧུར་བརྩོན་གྱི་གོམ་ཁའང་ལྷོད་ལ་ཁད།</font></div><div><font color="#167efb"><br></font></div><div><font color="#167efb">དགྲ་ཕྱོགས་ཀྱི་སྟོབས་ཤུགས་ཆེ་དྲག་པས།</font></div><div><font color="#167efb">གདོང་ལེན་གྱི་དཔའ་ཁ་ཤོར་བའམ།</font></div><div><font color="#167efb">འཐབ་ཇུས་ཀྱི་རིག་པ་འཆོལ་བ་གངལྟར་ཡང་།</font></div><div><font color="#167efb">ང་ཚོས་དཀའ་ཁག་འདི་ངེས་འབྱུང་གི་རྒྱུ་རུ་བསམ་ནས།</font></div><div><font color="#167efb">འཇིག་རྟེན་ལ་སྙིང་བོ་མེད་ཅེས་མི་གསུང་རོགས།</font></div><div><font color="#167efb">ང་ཚོས་དཀའ་ཁག་འདི་ལས་དབང་གི་འབྲས་བུར་འདོད་ནས།</font></div><div><font color="#167efb">འདི་ཚོགས་ལ་བསོད་ནམས་མེད་ཅེས་མི་སྒྲོག་རོགས།</font></div><div><font color="#167efb">ང་ཚོས་དཀའ་ཁག་འདི་ལྷ་གཉན་གྱི་ཆོ་འཕྲུལ་དུ་འཁྲུལ་ནས།</font></div><div><font color="#167efb">མི་མངོན་པའི་མགོན་སྐྱབས་མཁྱེན་ཞེས་མི་འབོད་རོགས།</font></div><div><font color="#167efb"><br></font></div><div><font color="#167efb">དཀའ་ཁག་ནི་ཁྱེད་ཀྱི་སེམས་ཁམས་ཡིན།</font></div><div><font color="#167efb">དེ་ལ་རྒྱང་ལྟ་ཞིག་བྱོས་དང་།</font></div><div><font color="#167efb">དཀའ་ཁག་ནི་ཁྱེད་ཀྱི་རྣམ་འགྱུར་ཡིན།</font></div><div><font color="#167efb">དེ་ལ་བྱིལ་བྱིལ་ཞིག་གྱིས་དང་།</font></div><div><font color="#167efb">དཀའ་ཁག་ནི་ཁྱེད་ཀྱི་འཚོ་སྟངས་ཡིན།</font></div><div><font color="#167efb">དེ་ལ་ཁ་བརྡ་རེ་གནང་དང་།</font></div><div><font color="#167efb"><br></font></div><div><br></div>