<h3>འདུལ་འཛིན་སྲིད་པའི་རྒྱན་མཆོག་ཤཱཀྱའི་སྲས།།</h3><h3>དམར་སེར་དགེ་འདུན་འདུས་པའི་ཁྱུ་ཆེན་པོའི།།</h3><h3>ཞབས་རྡུལ་སྤྱི་བོར་བཀོད་པའི་དགའ་སྟོན་འདིའི།།</h3><h3>ངོ་མཚར་གྲགས་སྙན་ཕྱི་མའི་དུས་ན་འབར།།</h3><h3><br /></h3><h3>ཡོན་ཏན་གཞི་རྟེན་ཚུལ་ཁྲིམས་ནོར་བུའི་མཛོད།།</h3><h3>བསྟན་པ་རིན་ཆེན་སྲོག་གི་དྭངས་མའི་ཟུང་།།</h3><h3>མ་གཡེལ་རང་གི་རྒྱུད་ནས་གཏན་སྲུང་བ།།</h3><h3>འདི་གཅིག་རྒྱལ་བ་དགྱེས་པའི་མཆོད་སྤྲིན་ལགས།།</h3><h3><br /></h3><h3>ཏིང་འཛིན་མཆོག་ཏུ་མི་གཡོ་ཞི་བའི་དབྱིངས།།</h3><h3>དག་ཆེན་ཡེ་ཤེས་སྣང་བར་འགག་མེད་ཀྱི།།</h3><h3>ངོ་མཚར་སྒྱུ་མའི་རྒྱལ་ཐབས་ལ་གཞོལ་བའི།།</h3><h3>བསམ་གྱིས་མི་ཁྱབ་རྒྱལ་བའི་སྒྱུ་འཕྲུལ་ཉིད།།</h3><h3><br /></h3> <h3>ཏིང་འཛིན་མཆོག་ཏུ་མི་གཡོ་ཞི་བའི་དབྱིངས།།<br /></h3><h3>དག་ཆེན་ཡེ་ཤེས་སྣང་བར་འགག་མེད་ཀྱི།།</h3><h3>ངོ་མཚར་སྒྱུ་མའི་རྒྱལ་ཐབས་ལ་གཞོལ་བའི།།</h3><h3>བསམ་གྱིས་མི་ཁྱབ་རྒྱལ་བའི་སྒྱུ་འཕྲུལ་ཉིད།།</h3><h3>བསླབ་གསུམ་ནོར་བུའི་མཛོད་ཀྱིས་རྟག་ཕྱུག་ཅིང་།།</h3><h3>འཆད་དང་རྩོད་དང་རྩོམ་པའི་འཕྲིན་ལས་ཀྱིས།།</h3><h3>རྒྱལ་བསྟན་གསེར་གྱི་འཁོར་ལོར་དབང་བསྒྱུར་བའི།།</h3><h3>མངའ་ཐང་ཉི་ཟླའི་ཁྱོན་དང་རྟག་འགྲོག་ཤོག།</h3><h3><br /></h3><h3>ཤེས་རབ་ཟབ་མོའི་ཆོས་ཀྱི་མིག་བསྒྲུབས་པས།།</h3><h3>རྡུལ་བྲལ་དྲི་མ་མེད་པ་རྒྱལ་བའི་བཀའ།།</h3><h3>གསུང་གི་གསང་བའི་ཡང་དག་ཚུལ་འཆང་བ།།</h3><h3>རིང་པོར་མི་ཐོགས་རྒྱལ་བ་ཉིད་དུ་འགྱུར།།</h3> <h3>ཉམ་ཆུང་གྱི་ནས་འཚོ་བའི་ཀུན་སྤང་ཁྱུ།།</h3><h3>དབེན་པའི་རི་སུལ་འགྲིམ་དང་ཆབས་གཅིག་པར།།</h3><h3>སྐབས་སུ་བབས་ཚེ་མི་འཕྲོག་སྤོབས་པའི་གདེང་།།</h3><h3>འཇིགས་མེད་སྨྲ་བའི་གཟི་མདངས་ངོམ་པར་འོས།།</h3><h3><br /></h3><h3>སྲིད་དང་ཞི་བའི་ཆོས་ཁམས་བརྟན་གཡོའི་དཔལ།།</h3><h3>སྣང་སྲིད་འོད་དམར་ཞགས་པས་འཆིང་བ་ཡི།།</h3><h3>མི་ཟད་འདོད་དགུའི་འབྱོར་བས་རྟག་ཕྱུག་པའི།།</h3><h3>ཁྱོད་ཞབས་ནོར་བུའི་ཁྲི་ལ་རྟག་འཁོད་ཤོག།</h3><h3><br /></h3><h3>མི་ཤིགས་རྡོ་རྗེ་ནམ་མཁའི་རྒྱལ་སྲིད་ཆེར།།</h3><h3>མཁའ་མཉམ་སྲིད་པ་གཡོ་བའི་ཕྱག་རྒྱ་དང་།།</h3><h3>འགྲོག་པའི་ཟིལ་གནོན་རྟགས་ཀྱི་ཆེ་བ་ཡིས།།</h3><h3>ཕྱོགས་ལས་རྣམ་པར་རྒྱལ་བའི་སྒྱུ་འཕྲུལ་ངོམ།།</h3> <h3>དམ་གཙང་མཛའ་བ་མི་ཕྱེད་རྡོ་རྗེ་རྒྱ།།</h3><h3>མི་འགྱུར་སྲོག་གི་ཐིག་ལེར་ཡོངས་ཟླུམ་པ།།</h3><h3>རྡུལ་བྲལ་དྲི་མེད་ཟླ་གཞོན་དྭངས་པའི་ཁམས།།</h3><h3>སྟོང་ཁམས་སྲིད་པའི་མཁའ་དབྱིངས་རྒྱན་དུ་མཛེས།།</h3><h3><br /></h3><h3>ཡོན་ཏན་ནོར་བུ་བརྩེགས་པའི་བ་གམ་བརྒྱ།།</h3><h3>ཏིང་འཛིན་ཟླ་རིས་འབུམ་གྱི་རླབས་ཕྲེང་ཅན།།</h3><h3>ཕྱོགས་དང་དུས་ཀྱི་ཐ་གྲུ་ཟླུམ་པོའི་གཞིར།།</h3><h3>དྲི་མེད་གྲགས་པ་དཀར་པོའི་སྙན་དབྱངས་འབར།།</h3><h3><br /></h3><h3>འཆལ་སྤྱོད་སྙིགས་མར་གྱུར་པའི་གཞན་དབང་གིས།།</h3><h3>སྡོམ་པ་མིན་པའི་གཡང་ལ་ཕྱོགས་པ་ཡི།།</h3><h3>རྟགས་ལ་རེ་བའི་བསྟན་འཛིན་ཟོལ་མའི་ཁྱུ།།</h3><h3>སྤ་སྐོང་བསྟན་པའི་རུ་མཚོན་བསྒྲེངས་དེ་བསྔགས།།</h3> <h3>ཚང་ལ་མ་ནོར་རྒྱལ་བསྟན་ནོར་བུའི་ཏོག།</h3><h3>འཛམ་གླིང་རྩེ་མོར་འགོད་པའི་བསྟན་འཛིན་ཁྱུའི།།</h3><h3>མཐུན་སེམས་གོང་བུའི་ནུས་པ་མི་ལྷོད་པའི།།</h3><h3>གཡར་དམ་སྲོག་གི་ཟུངས་ལས་གཅེས་པར་འོས།།</h3><h3><br /></h3><h3>རིགས་ཀྱི་རུས་པ་དཀར་པོའི་ཁྲག་གི་རྒྱུན།།</h3><h3>དང་གཙང་འོ་མས་གསོས་པའི་གཅེན་གཅུང་གི།།</h3><h3>མཛའ་གཅུགས་ཕུ་ནུའི་དུང་སེམས་གནམ་སའི་བཅུད།།</h3><h3>མེས་པོའི་བླ་ཡིད་འབུམ་གྱིས་རྟག་ཏུ་སྲུངས།།</h3><h3><br /></h3><h3>གླེན་པ་མགོ་བོ་འཐོམས་པའི་ཁ་སྟབས་དང་།།</h3><h3>གྲུང་པོ་ཕྱོགས་སུ་ལྷུང་བའི་བློ་གྲོས་ཅན།།</h3><h3>ཐམས་ཅད་འགལ་བར་མཐོང་བའི་གུ་དོག་བློ།།</h3><h3>དུས་འདིའི་སྤྱི་ཆུས་མི་ཟིན་ལྟས་སུ་མཐོང་།།</h3> <h3>ལ་ལ་ཕྱོགས་བྲལ་ཟས་ནོར་རྒྱལ་ཁ་རྩོད།།</h3><h3>ལ་ལ་ཕྱོགས་ཞེན་རང་གིས་རང་ཉིད་འཆིང་།།</h3><h3>འགའ་ཞིག་སྒྲ་མེད་འཇབ་བུས་རང་ཚུལ་འཛིན།།</h3><h3>ཀུན་ཀྱང་ཀུན་ཕན་དོན་ལས་རིང་བར་སེམས།།</h3><h3><br /></h3><h3>དོན་མེད་སྨྲ་ལྕེ་བརྡར་བ་མང་མོད་ཀྱང་།།</h3><h3>དོན་ལྡན་ལག་ཏུ་ལོན་པ་ཉིན་སྐར་ཙམ།།</h3><h3>དེ་བས་སླར་ཡང་སྨྲ་མེད་ངང་ཚུལ་ལ།།</h3><h3>རྟག་ཏུ་གནས་པ་ཁོ་བོའི་སྤྱོད་ཡུལ་ཉིད།།</h3><h3><br /></h3><h3>ནམ་ཞིག་སྨྲ་བའི་སྤྲོས་པ་ཉེར་ཞི་བ།།</h3><h3>བརྗོད་བྲལ་གསུང་གི་རང་བཞིན་ནཱ་དའི་དབྱངས།།</h3><h3>བདེ་ཆེན་རྡོ་རྗེའི་དབྱིངས་སུ་ཉེར་འཕོས་ཚེ།།</h3><h3>ཟུང་འཇུག་བདེ་བ་ཆེན་པོར་བསྡོམ་ཡང་སྲིད།།</h3> <h3>གྲུབ་པ་བཞི་ལྡན་ངག་ལ་དབང་འབྱོར་ནས།།</h3><h3>ཐོགས་མེད་སྨྲ་བའི་མཐུ་ལྡན་གསུང་གི་དཔལ།།</h3><h3>ཡིད་ལ་ཡེ་ཤེས་མཆོག་སྦྱིན་འཇམ་པའི་ལྷས།།</h3><h3>དགྱེས་བཞིན་རྗེས་སུ་བཟུང་བར་ཅིས་མི་སྨོན།།</h3><h3><br /></h3><h3>ལྕང་ལོའི་ཟུར་ཕུད་འཆང་བའི་གོས་དཀར་མདངས།།</h3><h3>རིག་སྔགས་བཙན་པོའི་རྫོངས་ལ་གནས་འཆའ་བའི།།</h3><h3>འབུམ་སྡེའི་གྲལ་དུ་ཕྱོགས་པའི་ལང་ཚོའི་གཟི།།</h3><h3>འོད་འབར་ནང་གི་ཉི་མས་སྙིང་ནས་གསོས།།</h3><h3><br /></h3><h3>ལྔ་ཕྲག་ཐ་མར་ཕྱོགས་པའི་འཇིག་རྟེན་འདིའི།།</h3><h3>རྒུད་པ་སྟོབས་སུ་བདོ་བའི་མ་རུངས་མཐུ།།</h3><h3>རིག་སྔགས་ཚངས་པའི་མེ་ལྕེས་མཐར་བྱེད་པའི།།</h3><h3>ཡ་མཚན་རྫོགས་ལྡན་གསར་པ་མགྲོན་དུ་ཁུག།</h3> <h3>སྟོང་ཆེན་དབྱིངས་ཀྱི་ཕྱག་རྒྱར་མཉམ་སྦྱོར་བས།།</h3><h3>བཅུ་དྲུག་ཕྱེད་ཕྱེད་འཆར་བའི་ཉི་ཟླའི་འགྲོས།།</h3><h3>གཙུག་ཏོར་རྩེ་མོར་བཀོད་པའི་འཕོ་བྲལ་སྲོག།</h3><h3>བདེ་མཆོག་བདེ་བ་ཆེན་པོའི་དབྱིངས་སུ་སྡོམས།།</h3><h3><br /></h3><h3>ཁྲག་འཐུང་དཔའ་བོ་དགྱེས་པའི་བརྟུལ་ཞུགས་ཀྱི།།</h3><h3>སེམས་མེད་མཁའ་ཡང་གཡོ་བའི་སྡང་མིག་གིས།།</h3><h3>ལོག་འདྲེན་དགྲ་སྡེ་ཐལ་བར་བརླག་བྱེད་པའི།།</h3><h3>སྙིང་རྗེས་བསྒྲལ་བའི་དམ་ཚིག་དང་དུ་ལོངས།།</h3><h3><br /></h3><h3>མགྲིན་པའི་ཆོས་དུང་གཡས་འཁྱིལ་པདྨ་དཀར།།</h3><h3>གཡང་ཆགས་ནོར་བུ་འཛུམ་པའི་མནྡ་རའི།།</h3><h3>ཆུན་འཕྱང་འོད་འབར་བྱེ་བའི་དགེ་མཚན་གྱིས།།</h3><h3>ཡང་ཡང་མགྲོན་དུ་འབོད་པའི་ངོ་མཚར་འབྱིན།།</h3> <h3>འདུས་པ་མི་བདེན་འབྲལ་བའི་ཆོས་ཉིད་ཀྱང་།།</h3><h3>འབྲལ་བ་མི་བདེན་སླར་ཡང་འཛོམས་པ་ཡི།།</h3><h3>རྟེན་འབྱུང་བསླུ་མེད་སྨོན་ལམ་དཀར་པོའི་མདུད།།</h3><h3>མི་ཤིགས་སྙིང་གི་དྭངས་མའི་ཟུངས་སུ་འཆིང་།།</h3><h3><br /></h3><h3>འབྱུང་བཞི་འདུས་པའི་སྒྱུ་ལུས་ཡ་མ་བརླ།།</h3><h3>སྲིད་འབྱོར་མི་བརྟན་སྒྱུ་མའི་ཁང་བཟང་སྟེ།།</h3><h3>ནམ་ཞིག་འོད་ལུས་འཇའ་ཚོན་དྭངས་མའི་སྐུས།</h3><h3>མཁའ་སྤྱོད་དག་པའི་གནས་སུ་འདི་བཞིན་ཚོགས།།</h3><h3><br /></h3><h3>ཤར་ནུབ་ས་གཞིའི་བར་ཐག་རྒྱང་རིང་ཞིང་།།</h3><h3>རི་ཀླུང་ཆུ་ཕྲན་སྟོང་གིས་ཁད་འགྱང་ཡང་།།</h3><h3>དུང་སེམས་ཆོས་ཀྱིས་སྦྲེལ་བའི་མཛའ་མཐུན་ཡིད།།</h3><h3>གམ་ན་གནས་པ་ཇི་བཞིན་འབྲལ་བ་མེད།།</h3> <h3>གཡང་ཞགས་ནོར་བུས་མཚན་པའི་ངོ་མཚར་འཕྲུལ།།</h3><h3>སྲིད་ཞིའི་དགེ་མཚན་འགུག་པའི་དཔལ་གྱི་གཟིས།།</h3><h3>འཁོར་ཡུག་ལྗོངས་ཀུན་འགེང་བའི་ལེགས་བྱས་ཀྱིས།།</h3><h3>ཁྱེད་ལ་ཕེབས་བསྐྱེལ་བགྱིའོ་དོན་མཐུན་མཆེད།།</h3><h3><br /></h3><h3>སླར་ཡང་འཛུམ་ལྡན་མི་སྨྲའི་བརྟུལ་ཞུགས་ཀྱིས།།</h3><h3>གཅིག་པུར་གནས་པའི་ཉམ་ཆུང་གྱི་ན་བས།།</h3><h3>མཛེས་ལྡན་ནགས་ཀྱི་ར་བའི་སྤྲིན་མཐོངས་ནས།།</h3><h3>ཁྱེད་ལ་ཡང་ཡང་མཇལ་བའི་ལག་ཟུང་གཡོབ།།</h3><h3><br /></h3><h3>སྐུ་ཚེ་མི་ཤིགས་རྡོ་རྗེ་སྲོག་ཏུ་བརྟན།།</h3><h3>མཛད་པ་མཐའ་རྒྱས་དོན་གཉིས་ངང་གིས་འགྲུབ།།</h3><h3>རླབས་ཆེན་བསྟན་དོན་བཞེད་པ་མཐར་ཕྱིན་པའི།།</h3><h3>དགེ་མཚན་སྣང་བ་དཀར་པོས་རྟག་ཁྱབ་ཤོག།</h3> <h3>ཤཱཀྱའི་དགེ་སྦྱོང་པ་ཐུབ་བསྟན་ལུང་རྟོགས་བསྟན་པའི་རྒྱལ་མཚན་ནམ་ཁྱབ་བདག་རྫོགས་ཆེན་པ་པདྨ་སྐལ་བཟང་མཆོག་གིས། </h3><h3>༢༠༡༧ ༩ ༣༠ </h3> <h3>སྔ་འགྱུར་གྲུབ་དབང་རྒྱལ་བ་རྫོགས་ཆེན་པའི་གདན་སར་༧ཁྱབ་བདག་རྫོགས་ཆེན་པདྨ་སྐལ་བཟང་རིན་པོ་ཆེ་མཆོག་གིས་རྫོགས་པ་ཆེན་པོ་སྙིང་ཐིག་ཡ་བཞིའི་སྨིན་གྲོལ་འབོག་པའི་སྐབས་ཀྱི་སྣང་བརྙན།</h3> <h3>ཁྱབ་བདག་པ་རྫོགས་ཆེན་པདྨ་སྐལ་བཟང་མཆོག་གིས། </h3> <h3>རབ་སྔགས་ཀྱི་སྡེ།</h3> <h3>དགེ་སློང་གི་སྡེ། </h3>