<h1><b>༄༅།།སྙན་ངག་ཐུ་བ་གང་། </b></h1><div> [ལྷོ་ཁ]ནག་པ།</div><h1>འཇག་རྩྭ།</h1><div>ས་ནག་གི་སྲུབས་ཀར་བཏབ་པའི་རེ་བ་ཞིག</div><div>རླུང་ཡན་གྱིས་བུད་ཅིང་ཆུ་ལོག་གིས་རྡེག</div><div>བྲག་རྡོ་འདྲ་བའི་དད་པའི་ཁུག་པ་ནས། མུ་མཐུད།</div><div>མཐིང་མདོག་གི་ནམ་མཁའ་ལ་ཕྱོགས་ནས་ཨུ་ཚུགས་ཀྱིས་འབུད།</div><h1>རྡོ་བོ།</h1><div>པུས་མོ་ས་གཞི་ལ་བཙུགས།</div><div>སྤྱི་བོ་གནམ་རྒན་ལ་བསྟན།</div><div>དགའ་བ་འདྲ་ལ་སྐྱོ་བར་རྟོག་པའི་འཇག་མའི་གླུས།</div><div>དཔྲལ་བ་རུ་ཤུལ་ལམ་ཞིག་འཐེན་ཡང་།</div><div>སེམས་ཀྱི་རྟ་པོ་ཁ་ཡན་གྱི་རླུང་དང་འབྲལ་མ་མྱོང་།</div><h1>དར་ལྕེ།</h1><div>བདེན་པ་བདར་བའི་མེ་ལོང་དེ་ནམ་མཁའ་ཡིན་ནམ།</div><div>དྲང་བདེན་སྐྱོང་བའི་ཨ་ལོང་ཆག་ཧྲུལ་དེ་ལ་བཙས་ཡིན་ནམ།</div><div>རླུང་བུ་ལ་ཁ་ཟེར་ཞིང་རང་ཉིད་ཀྱི་ལྕེ་ཡང་ཟད།</div><div>རང་འདོད་ལ་ཞེ་བསུན་ནས་སྟོང་དབྱིངས་སུ་སྲོག་ལྷུང་།</div><div>ཨ་ཡིག་ལས་འཕོས་པའི་སྨོན་པ་རིང་པོ།</div><div>ཉིན་མཚན་དབྱེ་མཚམས་མེད་པའི་ལྷ་རི་ནས་གྱེར་མཚམས་མི་འཇོག</div><h1>དབྱར་ནང་གི་སྤྲིན་པ།</h1><div>གསང་གསང་གིས་འགྱུ་བའི་ལྷ་བྱ་དཀར་པོ།</div><div>རི་བོའི་སྤོ་ནས་ཅི་ཞིག་ལ་འཕུར་འགྲོ།</div><div>རྟ་ཕོའི་འགྲོས་ཆེན་ས་གཞིར་མ་བརྡུངས་གོང་།</div><div>ཐག་རིང་གི་སུ་ཞིག་ལ་ཁ་བརྡ་འཐེན་པར་འགྲོ།</div><div> </div><div>ཨ་མ་ལོག་མེད། ཞིང་ཆུང་རམ་པས་ཁེངས་འདུག</div><div>གཅུང་མོ་དང་འདྲ་བའི་དབྱར་ནང་སྤྲིན་པ་ཁྱོད། </div><div>ཐན་རླུང་ལྡོམ་པོ་མ་ལྡང་གོང་། </div><div>སེམས་ཁ་དོག་མོ་མ་འཁྲུགས་གོང་།</div><div>སྐྱིད་སྡུག་གི་གཏམ་རྒྱུད་རུམ་དུ་བཅུག</div><div>ཐོབ་ཤོར་གྱི་བསྟན་བཤིག་ཕྲག་ཏུ་འཁུར།</div><div>སེམས་ངོ་ཐང་བའི་མ་ཁྱིམ་དུ་ལོག་དགོས།</div><div>བག་ཕེབས་རྙེད་སའི་ཕ་གཞིས་ལ་ལོག་དགོས།</div><h1>རླུང་དར།</h1><div>མེས་པོའི་ལྷ་རི།</div><div>རྡོ་བོ་ཡིས་བཞེངས་འདུག</div><div>རྡོ་བོའི་འཇམ་ཤ</div><div>དུས་ཚོད་ཀྱིས་བལྡགས་འདུག</div><div>ཤུལ་དུ་ལུས་པ།</div><div>སྙིགས་ནས་སྙིགས་སུ་འགྲོ་བའི་རླུང་རྟ་རེད།</div><div> </div><div>རླུང་རྟ་འགྱུར་སོང་།</div><div>ལྷ་རིའི་རླུང་རྟ་འགྱུར་སོང་། དེ་ཡི་འཕྲོར་</div><div>ཤུ་གླུ་འདྲ་བའི་སྙན་ངག་རུམ་གང་།</div><div>བདག་གི་རྣ་བའི་བུ་གར་བཙན་གྱིས་འཚང་།</div><h1>རི་ལམ་སྐྱ་མོ།</h1><div>རི་ལམ་སྐྱ་མོ།</div><div>ཆུ་ཡིས་བྲུབས་སམ།</div><div>ཡང་ན་མེས་པོའི་ཤུལ་ལམ་ཡིན།</div><div>འགྲོ་ལྕག་དཀའ་བའི་ལམ་སྐྱ་བོ།</div><div>ཡ་ངའི་གཟུགས་ཀྱིས་མིག་ལམ་དུ་ཤར།</div><div><br></div><div>རི་ལམ་སྐྱ་མོ།</div><div>དར་རྟིང་གིས་དྲུས་སམ།</div><div>ལྷས་ཟོན་གིས་གཤགས།</div><div>རི་སྐེད་ནས་བྲིས་པའི་རྨི་ལམ་གྱི་ཁ་དོོག་ཅིག</div><div>སེམས་ཀྱི་མཐར་ཐུག་ན་འཇམ་ཅག་གེར།</div><h1>སེམས་ཡན།</h1><div>ཐད་འཕུར་མཁའ་གྲུ་བསྐོར་ལོག་ཏུ་འཕུར་རྗེས།</div><div>ནམ་མཁའ་སྔོན་པོའི་ཁུ་སིམ་ཁད་ཀྱིས་དཀྲོགས། དུས་དེར། </div><div>ཐ་སྙད་མང་པོའི་བཙན་རྫོང་གི་ཀློང་ནས།</div><div>བྱ་སྤུ་འདྲ་བའི་སེམས་པ་ད་དུང་ལོག་མལ་མ་རྙེད།</div><div>དེ་ལྟར། སྦར་མཐིལ་ཙམ་གྱི་ནམ་མཁའ་འམ།</div><div>གནམ་སྟོང་འདྲ་བའི་སྦར་མཐིལ་ལ། </div><div>སོ་ཇི་ཙམ་བཏབ་ཀྱང་ཐེབས་ཐབས་མ་རྙེད།</div><div> </div><div>ད་ནི་གང་ཡིན་ཡང་ཡིན་དུ་ཆུག</div><div>སེམས་པ་ཁྱོད་སྙིང་གི་གདན་དུ་ལྷོད་ཀྱིས་བཞུགས་རོགས།</div><h1>ཉོག་པའི་ལྟེང་ཀ</h1><div>ཆར་པ་གཤིན་པོ་ཞིག་བབས་རྗེས།</div><div>རི་ལུང་མ་ལུས་སྣུམ་ཤིག་གེར། ཐ་ན། </div><div>དར་རྒྱུག་ཧྲུལ་པོ་དག་ལའང་འཇམ་ཤ་ཐོན།</div><div>སྐབས་དེ་དུས། </div><div>མཐོན་པོར་གཟེངས་པའི་བྲག་གི་ཀོང་བུ་སྟེ།</div><div>མཆི་ཞག་དྭངས་མོའི་མིག་གི་ལྟེང་ཀ</div><div>སེམས་ཀྱི་གཤིན་ས་རུ་ཟླུམ་པོར་འཁྱིལ། </div><div>གནམ་སྔོན་པོ་དང་སྤྲིན་དཀར་པོ། དེ་ན་</div><div>མེ་ལོང་ནས་བཞད་པའི་མེ་ཏོག་རེད།</div><div>ག་ལེར། མགོ་བོ་བཏེགས་ནས་རི་གཤམ་གྱི་བརྒྱ་གྲོང་ལ་ལྟ་དུས།</div><div>སེམས་ཀྱི་ལྟེང་ཀ་ལག་པས་ཉག་ཉོག་ཏུ་རྙོག་པར་ཐལ་སོང་། </div><h1>སེམས་ཀྱི་རིང་ས་ན།</h1><div>གནམ་ཐག་གིས་ཡུག་གཅིག་ཏུ་སྦྲེལ་ལ།</div><div>སེམས་ཀྱི་རིང་སར་བཞེངས་པའི་རྒྱལ་བ་ལྔ་པའི་འཁྲུངས་ཁང་།</div><div>ཡར་ཀླུང་གི་ཞིང་ཐང་གཅལ་དུ་བཀྲམ་ནས།</div><div>ཟླ་བ་སྒྲོལ་མ་ཞེས་པའི་མཛེས་མའི་སྒྱུ་འཕྲུལ་ལ་གཟིགས།</div><div>སྒྱུ་འཕྲུལ་གྱི་བང་རིམ་ཟབ་ས་ནས།</div><div>རྦ་རླབས་དང་རྦ་རླབས་འདྲ་བའི་གྲོང་གི་གཙང་པོ་འཕྱུར།</div><div>སྔོ་ལྗང་དང་མངའ་ཐང་གི་འཕྱིང་བ་སྟག་རྩེ།</div><div>འཚང་ཁ་དོག་པའི་གྲོང་གི་རླབས་རྒྱུན་ཁྲོད། ད་གཟོད། </div><div>མུན་དོང་དུ་བཙུད་པའི་ཉེས་ཅན་ཞིག་དང་འདྲ།</div>