<h1> ཕ་མར་བཀུར་བསྟི།</h1><h3> རང་ཉིད་ལ་ཤ་ཁྲག་གི་གྲུབ་པའི་ལུས་ཕུང་འདི་ལྟ་བུ་ཞིག་གམ་ཡང་ན་དལ་འབྱོར་བཅུའི་མི་ལུས་འདི་ལྟ་བུ་ཞིག་གནང་མཁན་ནི་དཀོན་ཅོག་གསུམ་པའི་བྱིན་རླབས་དང་དྲིན་ཅན་ཕ་མ་གཉིས་ཀྱི་དཀའ་བ་ལས་མ་འདས།དྲིན་ཅན་མ་ལོའི་ཉིན་ཞག་འཁོར་ནས་ལུས་སྲོག་རྟ་རྔ་འདྲ་བོ་ཁོག་ལ་འཁུར་ནས་ཟླ་དགུ་ཞག་བཅུའི་དཀའ་བ་ཁྱད་དུ་སེལ་ནས་ང་ཚོ་མི་ཡུལ་འདི་ལ་ཐོག་མར་རང་བྱུང་ངུ་ངག་ཨ་སྐད་ལས་མི་ཡུལ་འདི་ལ་སླེབས་པའི་སྐལ་བ་བསྩལ་པར་མ་ཟད།ང་ཚོའི་ཐེངས་དང་པོར་ཁ་དབུགས་གསར་བ་དངུལ་འབྱིན་དང་འཇིག་རྟེན་འདི་མིག་གིས་མཐོང་།ཤ་རྡོག་ཆུང་ཆུང་ཞིག་དྲིན་ཅན་ཕ་ལོའི་བསླབ་བྱ་དང་དྲིན་ཅན་མ་ལོའི་པང་བ་ནས་ནུ་མ་འཐུང་ནས་ལག་མགོ་རྣག་དང་སེམས་མགོ་ཁྲག་བྱས་ནས་དགུན་མཁའི་ཙག་དང་དབྱར་གསུམ་ཆར་བའི་དཀའ་བ་ཁྲོད་ནས་གཉོར་སྐྱོང་ཚད་མེད་བྱས་ནས་ང་ཚོ་ཕ་མའི་བྱམས་བརྩེ་དང་གཟི་འོད་ལས་ཉིན་རེར་བཞིན་འཚར་ལོངས་བྱུང་ནས་ལས་འབྲས་བཟང་བའི་སློབ་གྲྭའི་སྒོ་ཐེམ་ལ་འཇུག་པའི་ལས་སྐལ་ཐོབ།ལོ་ཟླ་རིང་མོ་ལས་སློབ་གྲྭ་རེ་རེ་བཞིན་འགྲིམས་ནས།འཆད་རྩོད་རྩོམ་གསུམ་གྱི་མཁས་པའི་གྲགས་པ་མ་འབར་ཡང་རང་ནུས་ཀྱིས་འབད་འབུངས་ལ་བརྟེན་ནས་གནམ་འཕངས་གཅོད་པའི་བྱིའུ་ཞིག་དང་འདྲ་བར་གཤོག་རྩལ་མེད་ཀྱང་རང་དང་མཚམས་པའི་ནམ་མཁའ་ཆུང་ཆུང་ཞིག་གི་ཉེ་འདབས་ལ་སླེབས་་ཐུབ་སོང་།གཤོག་སྒྲོ་ཕྲ་མོ་འདི་ལ་བཅོལ་ནས་སྤྱན་རེ་གཟིགས་ཀྱི་གདུལ་བྱ་བོད་ས་སྒང་རི་བོའི་བསྟན་པ་དར་རྒྱས་སུ་འགྲོ་བཞིན་པའི་སྐབས་འདི་བློ་གསལ་གཞོན་ནུ་འདི་ཚོར་རང་གི་ནུས་པ་རེ་འདོན་རྒྱུའི་བསམ་བློ་བཅིངས་ཡོད།་འདི་དག་ཐམས་ཅད་དཀོན་ཅོག་གསུམ་པའི་ང་ཚོ་རང་ལ་གནང་བའི་ཐུན་མོང་གི་བདུད་བརྩིའི་ཐིགས་པ་ཞིག་ལ་མཐོང་བཞིན་ཡོད།ད་ལྟ་རང་ཉིད་ལ་སྙོམ་ལག་རྒྱས་ནས་སྤྱི་ཚོགས་ལ་ཞུགས་དེ་ཕྱིར་ལྟ་ཞིག་ཚེ།ཆུང་བྱིས་པའི་དུས་སུ་བསམ་མ་ཤེས་པར་ཕ་མར་ཁ་རྩོད་དང་ཁྲེལ་མེད་ཀྱི་བྱ་བ་བགྲང་གིས་མི་ལང་བ་ལས་མྱོང་།ད་ལྟ་བསམ་བློ་ཞིག་བཏང་ན་དེ་དག་ནི་དུས་སྐབས་དེར་རིང་ཉིད་ཀྱི་ཕ་མའི་བཀའ་དྲིན་དང་བརྩེ་བ་མི་ལུས་རིན་ཐང་སོགས་མ་ཤེས་པ་ལས་ཡིན་འདོད།ལོ་ཟླ་ནི་ཅི་འདྲའི་མགྱོགས་པ་ལ།མིག་གི་ལྡེབ་དབང་ཙམ།རླུང་ཁའི་མེར་མེ་འདྲ་བ།ཧ་ཅང་འཁྱག་པའི་དཔེ་ཁང་ནས་རང་གི་ལག་པ་སྙིང་ཁར་སྦྱར་ནས་ཕ་མའི་ཕྱོགས་ལ་ཞིབ་འདང་ཞིག་རྒྱབ་རྗེས།ཕ་མའི་རྒས་གཉེར་གྱི་ངོ་གདོང་དང་ཧ་ཅང་སྟོབས་ཤུགས་ཉམས་པའི་རྐང་ལག་དེ་ཝ་ལེར་སེམས་ལ་འཁྱིལ་ཡོང་ངོ་མ་སེམས་པ་རྨོང་རྒྱུ་རེ་སླེབས་ཡོང།ངོ་མ་སྐྲག་རྒྱུ་དང་འཇིགས་སྣང་རེ་སྐྱེ་ཡོང།ཕ་མ་གཉིས་ཀྱི་སྡུག་མང་པོ་ཞིག་རྒྱབ་ནས་ང་ཚོ་ལ་བདེ་སྐྱིད་ཀྱི་འཚོ་བ་ཞིག་བསྐྲུན་པ་དང་།ལམ་ཁ་རེ་རེའི་སྟེང་ལ་བཅུག་ནས་ད་དུང་ཡིད་མི་ཚིམ་པར་ང་ཚོ་ལ་བདེ་སྐྱིད་དེ་ལས་ལྷག་པ་ཞིག་འཐོབ་ཐུབ་བམ་ཞེས་པའི་བློ་ཞིག་འཆར་བཞིན་ད་དུང་ལས་ཀ་ཞིག་ལ་ཧུར་བརྩོན་བྱེད་བཞིན་ཡོད།ཡིན་ནའང་ང་ཚོ་བུ་ཕྲུག་དག་ནི་ནམ་ཡང་བག་ཡངས་དང་རྣམ་གཡེང་རྩེ་མཚར་གྱི་དགོད་སྒྲ་དང་ཆང་ཁང་གི་འཛེར་སྒྲཁྲོད་ནས་དྲིན་ཕ་མ་གཉིས་ལ་སྐོར་གཅིག་ཡང་རྒྱག་རྒྱུའི་དུས་ཚོད་མེད་པའི་གནས་སུ་ལྷུང་བ་འདྲ།འདི་ནི་ངོ་མའི་ང་ཚོར་དུས་ཚོད་མེད་སོང་བ་ཡིན་ནམ།ཡང་ན་ང་ཚོར་དྲིན་ལན་འཇལ་བ་ཟེར་བའི་སེམས་པ་མེད་སོང་བ་ཡིན།རང་གིས་རང་ལ་དྲི་བ་ཅིག་བཏོན་པ་ཡིན།ཕ་མའི་མྱི་ཚེ་ཟེར་ན་མི་ཆོག་རྒྱུ་མེད་པའི་ལུས་རྟེན་འདི་དངོས་ནས་ཁྱིམ་ཚང་འདི་ལ་འཐིམ་སོང་།འདས་སོང་གི་ལོ་དུ་མའི་རང་ལ་ཁྱིམ་འདི་ནས་དཀའ་ལས་གང་མང་མྱང་ནས།རང་ཉིད་ལ་ཤེས་ཡོན་དང་རིག་གནས་མེད་རུང་བསམ་བློ་རྣམ་དག་ཅིག་གིས་མི་རིགས་འདི་བསམ་ནས།ང་ཚོ་ལ་འོད་སྟོང་ལྡན་པའི་ཀ་ཁའི་དབྱངས་རྟ་ངག་ལ་གྱེར་ཞིང་རིག་གནས་ཤེས་བྱའི་གླིང་ཀ་ནས་མ་འོངས་མདུན་ལམ་འཚོལ་ཐུབ་པའི་ལམ་ཁ་ཞིག་བསྟན་པ་དང་།ང་ཚོ་མི་གཞི་ལེགས་པ་དང་སྤྱི་ཚོགས་ལ་ཞབས་འདེགས་སྒྲུབ་པའི་མི་ཞིག་ཏུ་གྱུར་ན་ཅི་མ་རུང་ཞེས་པའི་བློ་སྐྱེས་ནས་ནམ་ཡང་ཁ་ཏ་སློབ་གསོ་གཏོང་བཞིན་ཡོད།ཡིན་ཡང་ཕ་མའི་སེམས་ཟེར་བ་འདི་དངོས་ནས་དོན་དག་ཅི་ཞིག་ཡིན་རུང་ད་དུང་ང་ཚོར་བསམ་བློ་བཏང་ནས་བསྡད་ཡོད།ཁྱིམ་ན་ཟ་རྒྱུ་ཅི་ཞིག་ཡོད་ན་ང་ཚོར་སྒུག་ནས་ངའི་བུ་དང་བུ་མོ་ཟེར་ནས་ཁྱིམ་ལ་ནམ་ཞིག་སླེབས་པར་ངང་སྒུག་བྱས་ནས་ལོ་ཟླ་འདི་ལྟར་མ་ཁོམ་པའི་སེམས་ཁམས་ཞིག་ལས་ཟད།དྲིན་ལན་ཟེར་བའི་ཚིག་འདི་གཉིས་གངས་རིའི་ལྗོངས་འདི་ལ་སྔ་མོ་ནས་དཔེ་སྲོལ་ཡག་པོ་ཡོད་པ་མ་ཟད་ཆོས་གཞུང་ན་ཕྱི་རབས་པ་ཚང་མ་སློབ་གསོའི་ཚུལ་དུ་་ཕ་དང་མ་ལ་མ་གུས་པ་ཞེས་གསུང་ཡོད།ཕ་མ་མ་གུས་པར་བྱས་ན་རང་ཉིད་དམྱལ་བ་དང་དུད་འགྲོ་གནས་ནས་སྐྱེས་པའི་དཔེ་གསོན་པོ་བཞག་ཡོད།ད་དྲིན་ལན་ཟེར་བ་ཕ་མ་ཡོད་དུས་མ་སྒྲུབ་ཚེ་འཇིག་རྟེན་ཕྱི་མ་སོང་བ་ན་མིག་འབྲས་སར་ལྷུང་བའམ་འགྱོད་པ་སྐྱེ་ནའང་ཚང་མ་སྟོང་བ་ཡིན།དེའི་རྐྱེན་གྱིས་འཇིག་རྟེན་འདི་ཕྱི་གཉིས་ཀྱི་རྒྱུ་འབྲས་སམ།གནའ་སྔ་མོའི་དཔེ་སྲོལ་བཟང་བོ་རང་སྟེང་ལ་བླངས་ནས་ཕ་མ་བཀུར་བསྟི་དང་སེམས་འཁུར་དང་ཁ་བརྡ་མང་པོ་བྱས་ནས་སེམས་པ་བདེ་ཞིང་སྐྱིད་པོ་བྱེད་དུ་འཇུག་རྒྱུ་ནི་ཆེས་མཆོག་ཏུ་གྱུར་བའི་དྲིན་ལན་ཡིན་པར་བསམ།</h3><h3> དོ་རྒྱ་བ་དོན་གྲུབ་དབང་རྒྱལ།</h3>