<h3 style="text-align: right;"> རུ་མང་འཕྲིན་ལས་རྒྱ་མཚོ།</h3><h3> </h3><h1> དེང་སྐབས་སྤྱི་ཚོགས་ཀྱི་ཟུར་རེ་ནས་བླ་མ་གྲྭ་བ། དགེ་བཤེས་མཁན་པོ། དགོན་པ་གྲྭ་ཚང་གི་སྐྱོན་གྱི་སྣེ་མོ་རེ་ཨེ་མཐོང་མཐོང་དང་ཨེ་ཤོད་ཤོད་བྱེད་པ་དག་ནི་དགོན་སྡེའི་རིག་གནས་མ་མཐོང་བའི་ན་གཞོན་སྐོར་ཞིག་རེད། ཁོ་ཚོར་ཁག་མེད་སའང་ཡོད། ཁོ་ཚོའི་དགེ་རྒན་གྱིས་ཆོས་ལུགས་རིག་གནས་མི་ཤེས། ཁོ་ཚོའི་བསླབ་དེབ་སྟེང་ཆོས་ལུགས་རིག་གནས་ཀྱི་ལྡོག་ཕྱོགས་མང་བོ་བཀོད་འདུག དེ་བས་ཁོ་ཚོའི་བསམ་བློ་ནི་དེའི་རིགས་ལས་ནར་སོན་པ་རེད། དེ་བས་ཀྱང་ངོ་མཚར་བ་ནི་གྲྭ་བ་ན་གཞོན་སྐོར་ཞིག་གིས་དྲ་ལམ་སོ་སོར་དགོན་སྡེའི་སྐོར་གྱི་སྐྱོན་ཅུང་ཙམ་རེ་རྩི་ཨེ་ཐུབ་ཐུབ་བྱེད་ལ། དེ་ཐུབ་སོང་ན་རང་གིས་ཆེ་ཞིག་འཇོན་སོང་བ་ལྟར་བྱེད་པ་དེ་རེད། དེ་ཡང་བསམ་བློ་ནར་མ་སོན་པ་ཤ་སྟག་ཏུ་འདུག སློབ་སྦྱོང་བྱེད་ས་གྲྭ་མང་འདུས་པའི་སྡེ་ན་ཡོད་ཀྱང་སློབ་སྦྱོང་གི་ནང་བསམ་བློ་དེའི་ཕྱི་རོལ་ན་ཡོད་པའི་རྟགས་རེད་སྙམ། མདོར་ན་གཞན་གྱི་ཟེར་སྒྲོས་ལ་དཔྱོད་པ་མེད་པར་རྒྱུགས་ལ་དགའ་བས་རེད་སྙམ། འདི་ནི་ང་ཚོར་ཕྱི་རབས་པའི་མཁས་པ་མི་འབྱུང་བའི་སྔ་ལྟོས་རེད། སྔོན་ཆད་ཀྱི་མཁས་པ་རྣམས་ལ་ཆུང་དུས་ནས་བོད་ཀྱི་རིག་གནས་གང་བཟང་གང་ཡག་གི་བཅུད་ཀྱི་བསམ་བློ་བཟུང་ཡོད། ད་ལྟའི་ན་གཞོན་རྣམས་སྐྱ་སེར་སུ་ཡིན་ཡང་ལྟ་བ་ཟ་ངེ་ཟིང་ངེ། རིག་གནས་ཐན་ནེ་ཐུན་ནེ། སྤྱོད་པ་ཆལ་ལེ་ཆོལ་ལེས་དུས་འདའ་བཞིན་ཡོད། འདི་ང་ཚོ་བོད་ལ་ཕྱི་རབས་པའི་མཁས་པ་འབྱུང་མི་ཐུབ་པའི་སྔ་ལྟས་ལོས་ཡིན་འདོད་པའི་ཕྲན་ལ་རི་བོང་གནམ་རྡིབ་ཀྱི་འཇིག་པ་འབྱུང་གིན་འདུག </h1>