<h1 style="text-align: center;">གདུང་བ་དམར་པོ</h1><h1 style="text-align: center;"><span style="font-size: 16px;">གོ་ཐོས་སུ</span></h1><div style="text-align: center;">ཁྱེད་ཀྱི་མིག་ཆུ་རླུང་གིས་ཁྱེར་སོང་ཟེར</div><div style="text-align: center;">ངས་གདུང་བའི་རྨ་ཁ་ལ་འཁྱག་རོམ་ལྡུད་དེ</div><div style="text-align: center;">སྙིང་ཁའི་ཁྲག་རྒྱུན་མགྲིན་པ་ནས་འབྱིན་ཡང་སྲིད</div><div style="text-align: center;"><br></div><div style="text-align: center;">དེ་སྐབས</div><div style="text-align: center;">མཁའ་མཐའི་མཛེས་རིས་ལ་དམར་བའི་མདངས་ཤིག་མཆིས་ཀྱང་མོད</div><div style="text-align: center;">དེ་མིན་ན </div><div style="text-align: center;">ང་རང་དུ་བ་ཡིས་ཚིམ་མི་ཐུབ་ལ</div><div style="text-align: center;">ཝི་ཆང་གིས་དེ་བས་ཀྱང་བཟི་ག་ལ་སྲིད</div><div style="text-align: center;"><br></div><div style="text-align: center;">ངོ་མ</div><div style="text-align: center;">འཇིག་རྟེན་གྱི་ཡོད་ཚད་ཡོངས་སུ་རྫོགས་ཏེ</div><div style="text-align: center;">མི་ཡུལ་འདིར་འགྲིམ་པ་ཅི་འདྲ་བཀའ་ཨང</div><div style="text-align: center;">འོ གདུང་བ་ལགས་སྙིང་རེ་རྗེ</div><div style="text-align: center;">ང་རང་བྲེལ་མྱུར་གྱི་ངང་ནས་ས་སྲོད་ལ་ཉེ་སོང</div><div style="text-align: center;">ས་སྲོད་ཡང་བྲེལ་མྱུར་གྱི་ངང་ནས་སྨག་རུམ་ལ་ཉེ</div><div style="text-align: center;"><br></div><div style="text-align: center;">ཨ་ཨ ཐམས་ཅད་མུན་ལ་རུབ་སོང་ཨང</div><div style="text-align: center;">ཁེར་རྐྱང་གི་ཀློང་དུ་རླུང་བུ་ཤག་ཤག་ལྡང</div><div style="text-align: center;">མདུན་ཕྱོགས་ཀྱི་ལམ་བུ་མུག་པོ་སྤྲིན་གྱིས་གཡོགས</div><div style="text-align: center;">ཡོད་ཚད་གདུང་བ་ཡིས་ཟིན་པའི་ཉིན་འདི་འགར</div><div style="text-align: center;">སུ་ཞིག་གིས་སྨྲེག་གཏམ་བརྗོད་མྱོང་ངམ</div><div style="text-align: center;"> …………</div><div style="text-align: center;"> ལྡོང·མུན་སད་ནས</div>