《画家笔下的上海记忆》8-霞飞路

姚志伟

霞飞路

辰光

大戏院

安娜

马路

上海

国泰

西菜

白俄

好萊坞

　　一个穿了红衣裳呃漂亮姑娘，低着头，静悄悄呃立勒霞飞路国泰大戏院对过马路。伊辣嗨想，眼面前景象，乃能介熟悉呃。

金色秋天，梧桐叶子由绿泛黄又变成咖啡色，辣嗨阳光照射下头闪闪发光。大戏院美工爬了老高呃竹扶梯上头，辣嗨画马上就要上映呃好萊坞电影广告。

电影院早场刚刚散场，观众一记头嗡了出来。前头人怕百后头人踏石，开始加快脚步，有人开始乱窜马路，弗管铛铛车开过来，小汽车开过去要轧着伊呃。黄包车生意老好，人座了上头可以望野眼看风景，又有面子。马路浪呃人笃悠悠散着步，看轧答嗰地方好像是外国一样，咖啡馆，洋装店，西菜社样样有，从小姐太太身旁边走过，还可以闻到香喷喷呃法国香水味道。

红衣姑娘叫安娜，生勒外国，从来没来过上海。但是轧搭个一切事体，包括景色伊好像熟悉了不得了。原来屋里厢额老人一直淘老古，讲老底子事体。

20世纪20年代，大批白俄从俄国到中国来避难，七转八弯，最后辣嗨上海法租界落了脚，安娜额太公太婆就是轧辰光来额，勿过格辰光二个人还勿认得。当时大多数白俄侪住了毕勋路轧搭，平时面熟陌生，后来通过旁边人介绍，嚡就谈起了朋友。因为从毕勋路轧搭走出马路口就是霞飞路，所以就经常到国泰大戏院看电影。

格辰光国泰大戏院是首轮电影院，好萊坞大片前脚美国纽约上映，后脚就辣嗨上海看得到了。霞飞路因为俄侨多了，俄国人开呃店也多了，轧股老浓呃斯拉夫味道，使得霞飞路被称为“东方圣彼得堡”。上海人称轧答一段路“罗宋大马路”，吃西菜只记得炸猪排，罗宋汤，罗宋大菜一点一点影响了上海人额生活。后来安娜额太公太婆结婚后，养了一个囡五。囡五大了却嫁百了一个中国人。我小辰光就辣嗨弄堂里看到有一个外国女宁，长一码大一码，男人倒呒么看到过。伊有两个儿子，小辰光阿拉是一道白相额。有一次到伊拉屋里厢，闻道呃就是罗宋汤味道，台子浪看到呃是面包。后来伊拉回苏联去了，安娜就是男小宁回到苏联后结婚后养额囡五。所以扎趟安娜到上海来寻根，走到淮海路茂名南路轧答，看到国泰大戏院，老人讲把伊听嗰故事，侪变成了电影画面。