<h3><br></h3><h3><br></h3><h3>བཤེས་གཉེན་ལགས།<br></h3><h3>གངས་ལྗོངས་བོད་ལ་བསམ་ན།<br>ཉིད་ནི།<br>མེད་ན་ཐབས་ཆག་ལ།<br>ཡོད་ན་གཅིག་ཆོག་ཡིན།<br>དེས་ན།<br>སྐུ་མཆོག་རི་རྒྱལ་ལྷུན་པོ་ལ།<br>འགྱུར་བ་མེད་པའི་སྨོན་ལམ།<br>འགྲོ་མགོན་ལགས།<br>ཉིད་ནི།<br>འགྲོ་བ་མིའི་རིགས་ལ།<br>སངས་རྒྱས་གསོན་པོ་ཡིན།<br>དེས་ན།<br>འགགས་མེད་ཚངས་པའི་དབྱངས་ལ།<br>ཉེ་རིང་མེད་པའི་སྨོན་ལམ།<br>བློ་ལྡན་ལགས།<br>ཉིད་ནི།<br>བརྟན་གཡོ་སྣོད་བཅུད་འདི་ལ།<br>ཕན་བདེ་ཉི་མ་དངོས་ཡིན།<br>དེས་ན།<br>རིས་མེད་བྱམས་བརྩེའི་ཐུགས་ལ།<br>གཡོ་བ་མེད་པའི་སྨོན་ལམ།<br>དམ་པ་ལགས།<br>ཉིད་ཀྱིས།<br>བོད་པར་བཅངས་པའི་ལྷག་བསམ་ནི།<br>ཟུང་ཁྲག་ལྷད་མེད་ཀྱི་འོ་མ།<br>སྙིང་དམར་མར་དཀར་གྱི་སྤར་ལུ།<br>སྐྱེས་ཆེན་ལགས།<br>ཉིད་ཀྱིས།<br>འགྲན་ཟླ་མེད་པའི་མཛད་བཟང་ནི།<br>དཀར་འཇམ་རས་ཡུག་སྟེ།<br>ཤ་ནས་ཁྲག་ལ་བརྒྱུད་ཅིང་།<br>རུས་ནས་རྐང་ལ་ཐིམ་པས།<br>ཐུ་བྷོད་ཀྱི་ཕྱི་རྩ་ཡང་ཚ།<br>མཐོ་སྒང་གི་རི་ཆུ་གཏེར་ཟོག།<br>བོད་པ་ཡི་ཆོས་དང་རིག་གཞུང་།<br>གངས་ལྗོངས་ཀྱི་ཡོད་ཚད་ནས་ཡོད་ཚད།<br>དུས་ཀྱི་དཀྱོག་མཚམས་འདིར།<br>ཉིད་ཀྱི་བཀའ་དྲིན་གྱིས།<br>ཉིད་ཀྱི་འབད་འབུང་གིས།<br>ཤི་མ་གསོན་པའི་སྲོག་རྩ་མཐུད་ནས།<br>ཡོད་ལ་མེད་པའི་དབུགས་རྒྱུན་བསོས་ནས།<br>ང་ཚོ་གཡོ་འགུལ་གྱི་འགོ་བརྩམས་སོང་།<br>མི་སེམས་ཀྱི་སྤོབས་པ་གནང་སོང་།<br>རྗེས་ལུས་ཀྱི་གཉིད་ལས་བསླངས་སོང་།<br>བཀའ་དྲིན་ཆེ་འོ་སྐྱབས་མགོན་ལགས།<br>སྐུ་དྲིན་དྲན་ནོ་འདྲེན་མཆོག་ལགས།<br>དེས་ན།<br>དཔལ་མགོན་སྐུ་གསུང་ཐུགས་ལ།<br>བར་ཆད་མེད་པའི་སྨོན་ལམ།<br>ཡང་ཡང་ཞུ།<br>ཡང་ནས་ཡང་དུ་་་་་་་་་་་་<br> ༢༠༡༥/༩/༡༥ཉིན་བསོད་ནམས་ཉི་མས་ཕུལ།<br><h3><br></h3></h3><div><h3><br></h3></div>