<h1 style="text-align: center;"><span style="color: rgb(255, 138, 0);">བརྡ་ཐོ།</span></h1><h1><span style="color: rgb(255, 138, 0);"> རྒྱ་ཆེའི་དགེ་སློབ་རྣམ་པ་ལགས། ཟླ9པའི་ཚེས་17ཉིན་གྱི་སྔ་དྲོའི་དུས་ཚོད་10རུ་རྫས་ཚའི་རྣམ་ཐར་ཚོགས་པས་ལོ་འདི་གའི་ཀླུ་ཆུའི་བོད་འབྲིང་གི་གཡུར་ཟའི་འབྲས་བཟང་ལ་ངོ་སོ་བསྟོད་ཕྱིར། རང་རེའི་སློབ་གྲྭ་ནས་ཆོས་</span><span style="color: rgb(255, 138, 0);">རྒྱལ་སྲོང་བཙན་སྒམ་པོའི་རྣམ་ཐར་རིན་མེད་གཟིགས་</span><span style="color: rgb(255, 138, 0);">འབུལ་གྱིས་འཁྲབ་རྒྱུ་ཡིན་པས་དུས་ལྟར་ཕེབས་རྒྱུ་གལ།</span></h1><h1 style="text-align: right;"><span style="color: rgb(255, 138, 0);"> ཞེས་ཀླུ་ཆུའི་བོད་འབྲིང་གི་སྲིད་སྟོན་ཁང་གིས། </span></h1><h1 style="text-align: right;"><span style="color: rgb(255, 138, 0);">ཟླ་9པའི་ཚེས་15ཉིན་ལ། </span></h1> <h1 style="text-align: center;"><span style="color: rgb(176, 79, 187);">རྫས་ཚའི་རྣམ་ཐར་ཚོགས་པ་ངོ་སྤྲོད་མདོར་བསྡུས།</span></h1><h3><span style="color: rgb(176, 79, 187);"> དེ་ཡང་རྫས་ཚའི་རྣམ་ཐར་ཚོགས་པ་ནི་དམངས་ཁྲོད་རང་བཞིན་གྱི་ལས་ཞོར་རྣམ་ཐར་ཚོགས་པ་ཞིག་ཡིན་ལ།སྤྱི་ལོ༡༩༨༠ལོ་སྟེ། ལེགས་ཉེས་གོ་ལྡོག་པའི་རིག་གནས་གསར་བརྗེ་ཆེན་མོའི་ལས་འགུལ་རླུང་ཞི་རླབས་འཇགས་སུ་སོང་བ་དང་། ཆོས་ལུགས་དད་མོས་རང་དབང་དང་རིག་གནས་སླར་གསོའི་སྐལ་བཟང་ཉི་མ་གཞོན་ནུའི་འོད་རླབས་ཕྱོགས་ཕྱོགས་སྙོམས་པོར་འཛུམ་པ་དང་། མདོ་སྔགས་བསྟན་ པའི་དབང་ཕྱུག་རྗེ་བཙུན་བླ་མ་རབ་བརྟན་རྒྱ་མཚོའི་ཡང་སྤྲུལ་སྐུ་ཕྲེང་བཞི་བའམ་ཤིས་ཚང་དགོན་གྱི་གདན་རབས་ང་གཅིག་པ།མཁས་ཤིང་གྲུབ་པའི་བདག་ཉིད་ཆེན་མོ་༧རྗེ་སྐལ་བཟང་ཐུབ་བསྟན་རྒྱ་མཚོ་མཆོག་གི་ཐུགས་སྐྱེད་སྨོན་ལམ་གཙང་མའི་སྐུལ་སློང་འོག གཞུང་སེམས་དྲང་ཞིང་དཔྱོད་རྒྱ་ཡངས་བའི་སྐབས་དེའི་སྡེ་ དཔོན་ལྷག་བསམ་ཅན་ཡོན་ཏན་བསམ་འཕེལ་ནས་སྣེ་ཁྲིད་ཅིང་། ཆོས་སྐྱོང་དང་ཚེ་དཔག་རྡོ་རྗེ། མགོན་འགྲོ དབང་སྡུད་སོགས་གཙོ་བྱས་ཏེ་རྣམ་ཐར་ཚོགས་པ་སྒྲིག་འཛུགས་ཀྱིས་ཆོས་རྒྱལ་སྲོང་བཙན་སྒམ་པོའི་རྣམ་ཐར་འཁྲབ་སྟོན་གྱི་འགོ་བཙུགས་པ་དང་། ཕྱིས་སུ་ཨ་སྟག་ལྷ་མོ་དང་འགྲོ་བ་བཟང་མོ་གཉིས་ཀྱི་རྣམ་ཐར་ཡང་འཁྲབ་སྲོལ་བྱུང་བ་བཅས་ཁྱོན་རྣམ་ཐར་གསུམ་འཁྲབ་སྲོལ་ཡོད་ལ། ལོ་རེའི་ས་ག་ཟླ་བའི་ཚེས་བཅུ་བཞི་ནས་བཅུ་དྲུག་བར་འཁྲབ་ཀྱི་ཡོད་པ་དང་ད་ལྟའི་བར་མི་ལོ་སོ་བདུན་སོན་ཡོད།</span></h3><h3><span style="color: rgb(176, 79, 187);"> ཐེངས་འདིའི་འཁྲབ་སྟོན་རྣམ་ཐར་ནི་ཆོས་རྒྱལ་སྲོང་བཙན་སྒམ་པོའི་རྣམ་ཐར་ཏེ། ཁ་བ་རི་བའི་ཁྱོན་ཡོངས་སྟོབས་ཀྱི་འཁོར་ལོས་དབང་དུ་བསྒྱུར་མཁན།སྤུར་རྒྱལ་བཙན་པོའི་གདུང་རབས་སོ་གསུམ་པ་ཆོས་ཀྱི་རྒྱལ་བོ་སྲོང་བཙན་སྒམ་པོའི་མཛད་རྣམ་ལས།ཆོས་བློན་ཐོན་མི་སམྦྷོཊ་རྒྱ་གར་དུ་མངགས་ཏེ་དཀའ་བ་ཁྱད་དུ་བསད།ངལ་བ་དང་དུ་བླངས་ནས།པནྜིཏ་ལྷ་རིག་པའི་སེངྒེ་དང་བྲམ་ཟེ་ལེགས་བྱིན་སོགས་སློབ་དཔོན་དུ་མ་བསྟེན་ཏེ་རིག་པའི་གནས་མཐའ་དག་ལ་མཁས་པར་སྦྱངས། སླར་བོད་དུ་ཕེབས་ཏེ་བོད་རང་གི་སྐད་དང་ མཐུན་པའི་བོད་ཡིག་གསར་དུ་བཟོས་ཚུལ་དང་། བློན་ཆེན་པོ་མགར་སྟོང་བཙན་སྔ་ཕྱིར་རྒྱ་ནག་དང་བལ་བོའི་ཡུལ་དུ་མངགས་ཏེ།རྒྱ་བཟའ་ཀོང་ཇོ་དང་བལ་བཟའ་ཁྲི་བཙུན་གཉིས་ཁབ་ཏུ་བསུས་ཤིང་།རྫོང་སྐལ་དུ་ཇོ་བོ་ཤྰཀྱ་མུ་ནེ་དང་ཇོ་བོ་མི་སྐྱོད་རྡོ་རྗེ་རྣམ་གཉིས་གདན་དྲངས་ཏེ་བསྟན་སྲིད་སྤེལ་ཚུལ་སོགས་བརྗོད་བྱར་བྱས་ནས་འཁྲབ་པའི་རྣམ་ཐར་ཞིག་ཡིན་ལ།བཀའ་དྲིན་ནམ་མཁའི་ཁྱོན་ལས་བརྒལ་བའི་མེས་བོ་གོང་མ་དག་གིས་ཁྲག་དང་རྔུལ་ཆུས་བསྐྲུན་པའི་རིག་གནས་འཛིན་སྐྱོང་སྤེལ་གསུམ་ལ་ཕྱི་རབས་པ་རྣམས་སྐུལ་བ་སོགས་ཕན་པ་རྒྱ་ཆེར་ལྡན་ནོ།།</span></h3><h3><br /></h3>