<h3><br></h3><div><br></div><div style="text-align: right;">རྩེ་ རྣམ་ཤེས།</div><div><br></div><div>གླིང་བཞིའི་རྒྱ་ཁྱོན་ནས་རབ་ཏུ་གསལ་བའི་ཆུ་ཤེལ་དཀར་པོ་ལགས།</div><div>ངའི་ཤ་རུས་ཁྲག་གསུམ་གྱི་གས་སྲུབས་ནས་འབར་གྱིན་པའི་མེ་ལྕེ་དམར་པོ། </div><div>ཁྱེད་རང་དྲན་པའི་ལོ་ཟླའི་གཅོང་རོང་ནས་བདག་གི་ཆུང་སྙིང་དམར་པོ་ཐེངས་མང་འདྲར།</div><div>མེས་པོ་ཚོས་ཁྱོད་ཀྱིས་མཛེས་པ་གླེང་དུས།</div><div>བདག་གི་སྙིང་ཤ་དམར་པོ་གཟེར་གྱིས་བགས།</div><div>གསལ་ལ་མི་གསལ་བའི་ཟླ་འོད་ངོགས་ནས།</div><div>ངས་དམར་སྨུག་གི་ངོ་གདོང་སྒྲིབ་ནས་རྣམ་ཤེས་ཀྱི་འཕར་རྒྱུན་རེ་རེ་ནས་ཁྱོད་འབོད་ཀྱིན་པའི་ཞོགས་པ་དེར། </div><div> ཁྱོད་ནི་ལ་ཁའི་སྨུག་སྤྲིན་དང་ཆར་རླུང་གི་ཁྲོད་ནས་གང་ཞིག་ཏུ་བཞུད་སོང་།</div><div>ངས་དཀའ་ཚགས་ལ་མ་འཛེམ་པར་ང་ཡི་གཤིས་ཁམས་སུ་གྲུབ་པའི་ཡིད་དུ་འོང་བའི་ཆུ་ཤེལ་གྱི་མཛེས་པ་འཚོལ་བཞིན་ཡོད།</div><div>ཁྱེད་ཀྱིས་རང་གི་གནས་མལ་དང་རྩེ་ར་མཐའ་དག་བསྐྱུར་ནས་ཐག་རིང་དུ་ཕེབས་དོན་ཅི།</div><div>ཁྱེད་མེད་པའི་ལོ་ཟླའི་བར་གསེང་ནས་ངས་རང་ཉིད་ཡང་སྙིང་ཅི་ཞིག་གི་ཆེད་དུ་གསོན་དགོས་པའི་གནས་ལུགས་དེ་རྙེད་མ་སོང་། </div><div>ནམ་མཁའ་དང་ས་གཞི་མགོ་སྟེང་བསློགས་ནས་གང་དུ་བཙལ་ཡང་རྙེད་མི་ཐུབ་པའི་ཁྱེད། </div><div>ཅི་ལྟར་བོས་ཀྱང་ཡ་ལན་མི་འདུག </div><div> འོད་སྣང་མཐོང་མི་ཐུབ་པའི་བདག་གི་འཇིག་རྟེན་ནས།</div><div>ས་གཞི་གྲང་ཞིང་འཁྱག་ལ། </div><div>མཐའ་འཁོར་ན་མུན་ནག་གི་ཟབ་ཚད་ཧ་ཅང་འཐུག </div><div>ད་དུང་དེ་ལས་ཅང་ཁ་བ་ནག་པོ་འབབ་བཞིན་འདུག</div><div>ཉི་མ་རེ་རེའི་ཞོགས་པ་ནས་ས་སྲོད་ཀྱི་བར་དུ། </div><div>བདག་གིས་རང་ཉིད་ཀྱི་ངོ་གདོང་མི་གསལ་བར་བྱས་ནས།</div><div>མཐའ་མེད་པའི་འཇིག་རྟེན་ནས། </div><div>རྩྭ་ལྡུམ་དག་ལ་རེག་པར་སྐྲག་ནས། </div><div>དུས་ཚིགས་དང་ལོ་ཟླ་ངེས་མེད་ཀྱིས། </div><div>ཁྱེད་རང་བཙལ་བའི་སྟ་གོན་བྱས། </div><div>སུན་སྣང་དང་ངལ་བ་མེད་པར་ཡུན་རིང་ཞིག་ལ་ང་རང་མུན་པའི་དཀྱིལ་དབུས་སུ་དཀའ་སྡུག་གིས་འགྲེངས་ནས། </div><div>གཉོམ་དུང་དུང་གི་ངུ་སྐད་ཀྱིས་ཁྱེད་དང་ཁྱེད་ཀྱི་རྣམ་ཤེས་ཀྱི་འབོད་ཀྱིན་ཡོད། </div><div>འོན་ཀྱང་། </div><div>རྒྱང་རིང་གི་གནམ་སའི་ཧྲག་བར་ནས། </div><div>བདག་གི་ངུ་སྐད་གཉོམ་པོ་དེ་ཁྱེད་ཀྱིས་གཏན་ནས་ཐོས་མི་སྲིད། </div><div> དེ་ནི་མུན་ནག་གིས་བསྐལ་བའི་བར་ཐག་ཡིན། བར་ཐག་དེས་ཅི་ཙམ་རིང་ཡང་།</div><div>ང་རང་སྔར་བཞིན་ཆུ་ཤེལ་ཀྱི་མཛེས་པ་ཁོ་ན་འཚོལ་བའི་ལམ་དུ་ཆས་འདོད།</div><div>རྒྱུ་མཚན་ནི་ཨ་མས་དད་ཕྱག་འབུལ་སའི་ཕོ་བྲང་དམར་པོ་ཧྲག་དམག་གིས་འཇབས་རྒོལ་ཐེབས་པའི་གཟུགས་རེས་མཐོང་བ་ནས།</div><div>ང་རང་ངལ་དུབ་དང་སྐྱོ་སྣང་གི་ཀློང་དུ་ཉུལ་བཞིན་ཁྱེད་རང་བཙལ་བར་བྲེལ་ཞིང་། </div><div>ཁྱེད་རང་བཙལ་བ་ནི་བདེ་སྐྱིད་ཀྱི་སྙིང་བོར་རློམ་ཡོད།</div>