<h3 style="text-align: left;">ས་གསུམ་ཚངས་པ་དཀར་པོའི་འཕྲིན་ལས་ཀྱི་སྣེ་ཐག་རིང་མོ་འཛིན་པ་འཛམ་གླིང་བྱང་ཕྱོགས་ཐུབ་པའི་རྒྱལ་ཚབ་ཅེས་ཡང་ཡང་བསྔགས་པའི་དཔལ་ལྡན་ས་དཀར་པོ་སེང་གེའི་གདོང་ཅན་གྱི་འཁྲུལ་མེད་ལྷ་ཡི་སྲས་པོ། འཕགས་མཆོག་ཕྱག་ན་པདྨོ་དང་རྗེ་བཙུན་འཇམ་དབྱངས་མགོན་པོ་ལ་སོགས་པ། ཁྱད་དུ་འཕགས་པའི་མཚན་མཆོག་སུམ་ལྡན་གྱི་ངོ་བོར་བཞེངས་པའི་གདུང་སྲས། ངོ་མཚར་ཕོ་བྲང་གཉིས་ལས་ཕུན་ཚོགས་ཕོ་བྲང་གི་༧གདུང་སྲས་ཨ་བྷི་ཀྲྀ་ཏ་བཛྲ་རིན་པོ་ཆེ་གཙོ་བོར་གནང་བའི་རྒྱལ་ཡུམ་འཕགས་མ་སྐུ་འཁོར་དང་བཅས་པ། སྤྱི་ལོ་༢༠༡༧ལོའི་བོད་ཟླ་༧་པའི་ཚེས་༡༦ཉིན་གྱི་ཞོགས་པ་དཔལ་ལྡན་ས་སྐྱའི་གདན་ས་གཉིས་པ་དཔལ་ངོར་ཨེ་ཝཾ་ཆོས་ལྡན་དུ་ཞབས་སོར་འཁོད་སྐབས། དཔལ་ངོར་དགོན་མཁན་སློབ་འདུས་ཚོགས་ཡོངས་ནས་བསུ་བ་སེར་སྦྲེང་ཟབ་རྒྱས་དང་བཅས་པས་གདུང་སྲས་ཨ་བྷི་ཀྲྀ་ཏ་བཛྲ་རིན་པོ་ཆེ་མཆོག་དཔལ་ཨེ་ཝཾ་རྡོ་རྗེའི་ཕོ་བྲང་དུ་མི་འཇིགས་གདོང་ལྔས་བཏེགས་པའི་ངོར་ཆེན་རྒྱལ་བའི་ཁྲི་འཕང་མཐོན་པོར་བཞུགས་སོ་གསོལ་ནས། ངོར་ཆེན་རྒྱལ་བའི་རྒྱལ་ཚབ་ཕན་བདེ་མཁན་རིན་པོ་ཆེ་༧འཇམ་དབྱངས་ཐུབ་བསྟན་སྙིང་པོ་མཆོག་གིས་དབུས་པའི་དགེ་འདུན་པ་བརྒྱ་ཕྲག་གསུམ་ལ་ཉེ་བས་མཎྜལ་སྐུ་གསུང་ཐུགས་རྟེན་དང་། བཀྲ་ཤིས་རྫས་བརྒྱད་སོགས་འདེགས་འབུལ་མཛད་པ་དང་། གནས་དེའི་ཐུན་མོང་མ་ཡིན་པའི་ནང་རྟེན་དག་ལ་གནས་གཟིགས་ལེགས་པར་མཛད་པའི་དུས་བཟང་དགེ་བའི་ཉིན་མོར་སྙིང་ནས་རྟེན་འབྲེལ་ཞུའོ།། །། </h3> <h3>༧གདུང་སྲས་ཨ་བྷི་ཀྲྀ་ཏ་བཛྲ་རིན་པོ་ཆེ་མཆོག་དང་ངོར་ཕན་བདེ་མཁན་རིན་པོ་ཆེ་༧འཇམ་དབྱངས་ཐུབ་བསྟན་སྙིང་པོ་མཆོག་ཕན་ཚུན་གཟིམ་ཆུང་བཀྲ་ཤིས་དགའ་འཁྱིལ་དུ་གསུང་མོལ་ལྷུག་པོར་གནང་བཞིན་པ།</h3> <h3>༧གདུང་སྲས་ཨ་བྷི་ཀྲྀ་ཏ་བཛྲ་རིན་པོ་ཆེ་མཆོག་སྐུ་འཁོར་དང་བཅས་པ་གདན་ས་ཆེན་མོ་ངོར་ཨེ་ཝཾ་ཆོས་ལྡན་དགོན་ནས་ཆིབས་ཞལ་བསྒྱུར་གནང་མཛད་པའི་སྐབས་ངོར་དགོན་གྱི་དགེ་འདུན་འདུས་མང་ཡོངས་ནས་བླ་སློབ་དམ་ཚིག་གཅིག་མཐུན་ཐོག་ཐུགས་འཁྲེང་བའི་སྒོ་ནས་ཕེབས་སྐྱེལ་ཞུ་བཞིན་པ།</h3> <h3>འགྲོ་ལ་བདེ་སྐྱིད་འབྱུང་བའི་སྒོ་གཅིག་པུ། །<br>ཀུན་མཁྱེན་རྒྱལ་བའི་བསྟན་པ་རིན་པོ་ཆེ། །<br>ཡུལ་དུས་གནས་སྐབས་ཀུན་ཏུ་མི་ཉམས་པར། །<br>ཕྱོགས་མཐར་དར་ཞིང་རྒྱས་པར་མཛད་དུ་གསོལ། །</h3> <h1><font color="#ff8a00">སྒྲིག་སྦྱོར་བ། ཨེེ་ཝཾཾ་གྱིི་དུང་ཟླ།</font></h1>