<h1><b>མལ་ཐུལ་འོག་གི་སེམས་པ།</b></h1><div> [ལྷོ་ཁ]ནག་པ།</div><div>གྲང་འཁྱག་གི་དགུན་ཁ།</div><div>ངས་ཁྱོད་ལ་འཁང་ར་བྱ་དོན་མི་འདུག</div><div>ནམ་ཟླ་དུས་བཞིའི་འཁོར་བགྲོད།</div><div>རང་བྱུང་ཁམས་ཀྱི་ཆོས་ཉིད་རེད།</div><div><br></div><div>དགུན་ཁ་རྒྱུན་གཏན་ལྟར་འཆར་ཞུ།</div><div>ང་ལ་ཨ་ཕས་བཏགས་པའི་བཙུགས་ཕྲུགས་ཡོད།</div><div>ང་ལ་ཨ་མས་བསྐོལ་བའི་ཚ་ཐུག་ཡོད།</div><div>དཔྱིད་མྱུག་འབུས་འབུས་ཀྱི་འཚུབ་ཆ་ནས།</div><div>དབྱར་ཆུ་རྒྱས་རྒྱས་ཀྱི་རྫུན་ཀོང་ནས།</div><div>སྟོན་འབྲས་འདོགས་འདོགས་ཀྱི་ཡ་ཆུང་ནས།</div><div>དགུན་གྱི་ཀུན་རྫོབ་བརྡ་རྟགས་ང་ལ་སྔ་ས་ནས་འབྱོར་ཡོད།</div><div><br></div><div>དགུན་ཁ། སུ་ཞིག་གིས་བོས་པའི་མགྲོན་པོ་མ་རེད།</div><div>དགུན་ཁ། གང་ཞིག་གིས་མངགས་པའིི་ཕོ་ཉའང་མ་རེད།</div><div>དགུན་ཁ། གྲང་ངད་འདི་ཁྱོད་རང་འཁོར་བའི་ཚིགས་མལ་རེད།</div><div>འགྲམ་པ་འདི་ངས་ཁྱོད་ལ་སྦྱར་བའི་སེམས་ཚོར་རེད།</div><div>ཡང་གཅིག་བཤད་ན། </div><div>མལ་ཐུལ་ནང་ནས་གྲང་ངད་གླེང་ན་ངོ་ཡང་ཚ། འོན་ཏེ་</div><div>ལག་ཟུང་ཕྱི་ལ་སྤུ་ཟིང་བསྲིངས་ཚེ་འཁྱག་བདེན་རེད།</div><div><br></div><div>གྲང་འཁྱག་གི་དགུན་ཁ།</div><div>ངས་ཁྱོད་ལ་འཁང་ར་བྱ་དོན་མི་འདུག</div><div>ནམ་ཟླ་དུས་བཞིའི་འཁོར་བགྲོད།</div><div>རང་བྱུང་ཁམས་ཀྱི་ཆོས་ཉིད་རེད།</div> <h3><font color="#39b54a"> ཡིད་ཡུལ་ཞེས་པ་ནི་ཡིད་དེ་རྩོམ་པ་པོའི་རང་སྣང་གི་བསམ་པ་ལ་བྱ་ཞིང་། ཡུལ་ནི་རྩོམ་པ་པོས་གསར་བཞེངས་གནང་བའི་འཚོ་བའི་སྣང་བརྙན་ཏེ། དེ་ནི་གཙོ་བོ་ལྗོངས་དངོས་ལས་གྲུབ་པའི་ཡུལ་ལ་བྱེད། དེ་བས་ཡིད་ཡུལ་ནི་རྩོམ་པ་པོའི་བསམ་པའི་ཡིད་འགྱུར་དང་འཚོ་བའི་སྣང་ཚུལ་མཉམ་དུ་འདྲེས་པ་ལས་གསར་དུ་བསྐྲུན་པའི་རོ་ཉམས་ཕུན་སུམ་ཚོགས་པའི་སྒྱུ་རྩལ་གྱི་ཞིང་ཁམས་ཤིག་གམ་གོ་རྟོགས་ཤིག ཡང་གོ་ཡུལ་ཞིག་ཡིན། ཡིད་ཡུལ་ནི་ཡིད་བརྙན་འཚོལ་ཤེས་པའམ། ཡང་ན་ཡིད་བརྙན་ལམ་ནས་དོན་གོ་འདོད་པ་དང་དོན་ཤེས་འདོད་པ་ཙམ་ལ་མི་བྱ་བར། དེ་ནི་ཡིད་བརྙན་ལ་བརྟེན་ནས་དོན་གོ་བའམ། ཡིད་བརྙན་གྱི་གོ་ཡུལ་ཞིག་ལ་བྱ་བས། ཡིད་ཡུལ་ནི་ལྗོངས་དང་བསམ་པ་གཅིག་ཏུ་འདྲེས་ལ། ཡང་དེ་ལས་བྱུང་བའི་གོ་བས་བསྐྱེད་པའི་ཡིད་སྣང་གི་འཇིག་རྟེན་ཞིག་སྟེ། རྩོམ་པ་པོའི་གསར་རྩོམ་དང་ཀློག་པ་པོའི་འཆར་སྒོས་ཐུན་མོང་ཐོག་བསྐྱེད་ཅིང་བཞེངས་པའི་སྙན་ངག་སྒྱུ་རྩལ་གྱི་ཁམས་དང་ཡུལ་ཞིག་ལ་ཟེར་བ་ཡིན།</font></h3><h3><font color="#39b54a"> སྙན་ངག་པས་རྟག་ཏུ་འབྲེལ་ཡོད་ཡིད་བརྙན་དུ་མ་སྙན་ངག་གི་ཚིག་རྒྱུན་དུ་མཉམ་གཅིག་ཏུ་ཚོགས་སྤྱིར་བསྒྲིགས་ཏེ་དེར་བྱེ་བྲག་གི་དོན་སྙིང་བླ་ལྷག་ལྡན་པའི་ཡིད་ཡུལ་ལམ་གོ་ཡུལ་ཞིག་འགྲུབ་པར་གཞོལ་བ་ཡིན། ཅི་སྟེ་སྙན་ངག་པའི་ཡིད་ཡུལ་ལ་རྒྱུ་ཚེ་སྙན་ངག་པས་གསར་དུ་བཞེངས་པའི་དངོས་ཉམས་དང་ལྗོོངས་ཀྱི་རྣམ་པ་རང་ལ་བརྟེན་ནས་འཇུག་དགོས་ལ། སྙན་ངག་པའི་ནང་གི་བསམ་བློ་དང་ཡིད་ཀྱི་འགྱུར་བ་ལ་བརྟེན་ནས་ཁོང་དུ་ཆུད་པ་བྱེད་དགོས། དེའང་ལྗོངས་དངོས་ཞིབ་འབྲི་བྱས་ཏེ་ཡིད་ཀྱི་འགྱུར་བ་མཚོན་པའི་སྙན་ངག་ནང་ཡིད་བརྙན་ནི་དངོས་རྣམ་ཞིག་གམ་དངོས་ཉམས་ཤིག་ཡིན་ན། ཡིད་ཡུལ་ནི་དངོས་རྣམ་མམ་དངོས་ཉམས་དེ་དག་ལ་བརྟེན་ནས་གྲུབ་པའི་སྙན་ངག་སྒྱུ་རྩལ་གྱི་ཁམས་ཤིག་གམ་སྙན་ངག་པའི་བསམ་པའི་གོ་རྟོགས་ཤིག་ཡིན། དེར་བརྟེན་ཡིད་བརྙན་ནི་སྙན་ངག་སྒྱུ་རྩལ་གྱི་སྣང་བརྙན་སྤྱི་འགྲུབ་པའི་བྱེ་བྲག་དང་ཕྲ་བའི་སྣང་བརྙན་རེ་རེ་ཡིན་ལ། ཡིད་ཡུལ་ལམ་སྙན་ངག་སྒྱུ་རྩལ་གྱི་ཁམས་ནི་སྙན་ངག་གི་ཡིད་བརྙན་ལས་ཁྱབ་རྒྱ་ཆེ་བ་སྟེ། དེའང་ཡིད་བརྙན་ནམ་བྱེ་བྲག་གི་སྣང་བརྙན་ཕྲ་མོ་རེས་སྙན་ངག་རེ་འགྲུབ་པ་མི་སྲིད། སྙན་ངག་བརྩམས་ཆོས་ལེགས་པོ་ཞིག་གམ་སྙན་ཚོམ་ཆ་ཚང་ཞིག་འགྲུབ་པ་ལ་རིགས་མཐུན་པའི་ཡིད་བརྙན་གྱི་ཚོགས་པ་ཞིག་ལ་བརྟེན་དགོས་ལ། ཡིད་ཡུལ་ནི་རིགས་མཐུན་ལ་ཆ་ཚང་བའི་ཡིད་བརྙན་གྱི་ཚོགས་པ་དེ་ལས་འཆར་ཞིང་རྙེད་པར་བྱེད། དེ་ལྟར་ཡིད་བརྙན་གྱི་ལམ་ནས་གྲུབ་པའི་ཡིད་ཡུལ་དེ་དོན་དང་ལྡན་ལ་གོ་རྒྱུ་ཟབ་མོ་ལྡན་པའང་ཡིན་པས་ན། ཇི་སྐད་དུ། རང་སྣང་ནི་སྣང་བརྙན་ལས་རྒྱ་ཆེ། ཞེས་པའང་སྙན་ངག་གི་ཡིད་བརྙན་ལ་བརྟེན་ནས་སྙན་ངག་གི་ཁམས་དང་ཡིད་ཡུལ་འགྲུབ་པ་སྟེ། སྒྱུ་རྩལ་གྱི་ཡིད་བརྙན་ནི་སྣང་བརྙན་ཙམ་མ་ཡིན་པར། དེ་ལས་ཀློག་པ་པོ་སྙན་ངག་གི་ཡིད་ཡུལ་དུ་ཐོལ་ཕྱུང་དུ་འཁྲིད་དགོས་སྟབས། ཡིད་བརྙན་ནི་སྒྱུ་རྩལ་གྱི་སྣང་བརྙན་འགྲུབ་བྱེད་ཅིག་ཡིན་པ་ལས། སྙན་ངག་སྒྱུ་རྩལ་གི་མཐར་ཐུག་གི་ཁམས་དེ་མ་ཡིན། </font></h3><h3><font color="#39b54a"> མདོར་ན། སྙན་ངག་བརྩམས་ཆོས་ལ་སྒྱུ་རྩལ་སྣང་བརྙན་གྱི་ཁམས་དང་སྙན་ངག་པའི་བསམ་པའི་དབྱིངས་མཐོ་ས་ཞིག་ལྡན་དགོས་ཤིང་། དེ་ནི་སྙན་ངག་གི་ཡིད་བརྙན་ལམ་ནས་མཚོན་ལ། སྙན་ངག་པ་དང་ཀློག་པ་པོའི་རང་སྣང་བསམ་པས་མྱོང་བ་ཞིག་ཡིན་ན། ཡིད་ཡུལ་ནི་སྙན་ངག་སྒྱུ་རྩལ་ཞིག་ལེགས་པར་གྲུབ་མིན་གྱི་ཚད་གཞི་ཡིན་ཆོག་སྙམ་མོ། ། </font></h3>