<h1 style="text-align: center;"><b>རྨི་ལམ</b></h1><h5 style="text-align: center;"><b> ལྡོང·མུན་སད་ནས</b></h5><h3 style="text-align: center;"><b><br></b></h3><h3 style="text-align: center;"><b>ལོ་ཟླའི་གཙང་ཆུ་མདུན་ནས་མདུན་དུ་སྐྱོད།།</b></h3><div style="text-align: center;"><b>སྙིང་གི་དམར་ཁ་ཡུན་ནས་ཡུན་དུ་རྒྱས།།</b></div><div style="text-align: center;"><b>མདང་གསུམ་རྨི་ལམ་ཅ་ཅོའི་ཀི་སྒྲ་ལ།།</b></div><div style="text-align: center;"><b>བཞིན་བཟང་འཛུམ་པའི་གད་མོ་ཐ་ཐོར་འདུག།</b></div><div style="text-align: center;"><b><br></b></div><div style="text-align: center;"><b>མངར་མོའི་ཚུལ་ལ་གདུང་བའི་རོ་ཞིག་གདའ།།</b></div><div style="text-align: center;"><b>གདུང་བའི་མདངས་ལ་དགའ་བའི་ཉམས་ཤིག་གདའ།།</b></div><div style="text-align: center;"><b>སྐྱིད་སྡུག་མཉམ་དུ་རོལ་བའི་ངང་ཚུལ་ལ།།</b></div><div style="text-align: center;"><b>དམར་པོའི་ཁྲག་གིས་དགྱེས་པའི་དབྱངས་ཤིག་འདུག།</b></div><div style="text-align: center;"><b><br></b></div><div style="text-align: center;"><b>མེ་ཏོག་སེར་ཆེན་ལང་ཚོ་འབར་བའི་དུས།།</b></div><div style="text-align: center;"><b>དཔྱིད་རླུང་འདབ་མས་དྲི་ཞིམ་ཁྱེར་བའི་སྐབས།།</b></div><div style="text-align: center;"><b>སྙིང་གཏམ་ཚིག་འགར་འཕྲིན་དུ་སྐུར་བའི་རྗེས།།</b></div><div style="text-align: center;"><b>བཞིན་བཟང་འུ་གཉིས་མཇལ་བའི་སྐབས་ཤིག་འཕྲད།།</b></div><div style="text-align: center;"><b><br></b></div><div style="text-align: center;"><b>རྗེས་དྲན་ལོ་ཆུང་བྱིས་པའི་སྣང་ཡན་དག།</b></div><div style="text-align: center;"><b>མིག་ཟུང་མཆི་མས་གདུང་བའི་ལོ་ཟླ་དག།</b></div><div style="text-align: center;"><b>འདས་སོང་བགྲང་མེད་བརྩེ་བའི་ལོ་རྒྱུས་དག།</b></div><div style="text-align: center;"><b>སྙིང་ཁའི་དཀྱིལ་ནས་གསལ་ནས་གསལ་དུ་འཆར།།</b></div><div style="text-align: center;"><b><br></b></div><div style="text-align: center;"><b>དེ་རྗེས་སྐྱེ་རྒུའི་སྲང་ལམ་འགྲིམ་བཞིན་དུ།།</b></div><div style="text-align: center;"><b>བཞིན་བཟང་ལྷ་མོའི་གྲིབ་གཟུགས་བཙལ་ནས་སོང་།།</b></div><div style="text-align: center;"><b>མིག་ཕྱོགས་ཤར་ལྷོ་ནུབ་བྱང་བཞི་ལ་ཅེར།།</b></div><div style="text-align: center;"><b>བཙུམ་བཙུམ་གཅིག་ཀྱང་མ་བྱས་རིང་དུ་འཚོལ།།</b></div><div style="text-align: center;"><b><br></b></div><div style="text-align: center;"><b>ཤིང་རྒན་འདབ་ལོས་རྒྱན་པའི་གྲོང་ལམ་ཞིག།</b></div><div style="text-align: center;"><b>ཐ་ཐོར་མི་ཚོགས་འགྲིམ་པའི་སྲང་ལམ་ཞིག།</b></div><div style="text-align: center;"><b>གཟུགས་མཛེས་ལྷ་ཡི་བུ་མོ་བཞིན་བཟང་མ།།</b></div><div style="text-align: center;"><b>ང་ཡི་མིག་ལམ་དཀྱིལ་དུ་འཁོར་ནས་འོང་།</b></div><div style="text-align: center;"><b><br></b></div><div style="text-align: center;"><b>འཛུམ་བག་ཟླ་ཞལ་པདྨའི་མཛེས་མདངས་རྒྱས།།</b></div><div style="text-align: center;"><b>སུམ་ཅུ་ཚེམས་འདི་མུ་ཏིག་ཕྲེང་གིས་སྦྲེལ།།</b></div><div style="text-align: center;"><b>ཁྲ་ཆུང་གཟི་མིག་ནམ་མཁའི་སྐར་རྒྱན་བཞིན།།</b></div><div style="text-align: center;"><b>གཟིགས་ཐེངས་གཅིག་གིས་བུ་ངའི་ཡིད་དབང་དཀྲུག།</b></div><div style="text-align: center;"><b><br></b></div><div style="text-align: center;"><b>ད་ཕན་མཇལ་མྱོང་ཡོད་དེ་དུས་མང་འགོར།།</b></div><div style="text-align: center;"><b>ད་ཕན་རྒྱུན་ཡོད་རེད་དེ་ལོ་མང་བྲལ།།</b></div><div style="text-align: center;"><b>སྐབས་ཤིག་མཇལ་བའི་གོ་སྐབས་འཕྲད་འོས་ཏེ།།</b></div><div style="text-align: center;"><b>ད་ཕན་དེ་ལྟའི་གོ་སྐབས་ཡོད་མ་ཡིན།།</b></div><div style="text-align: center;"><b><br></b></div><div style="text-align: center;"><b>དེ་རིང་ཉི་མའི་གཟི་བརྗིད་སྔར་ལས་འཕེལ།།</b></div><div style="text-align: center;"><b>དེ་རིང་རླུང་གི་རང་བཞིན་སྔར་ལས་འཇམ།།</b></div><div style="text-align: center;"><b>དེ་རིང་ཁྱོད་ཀྱི་མཛེས་སྡུག་སྔར་ལས་མཛེས།།</b></div><div style="text-align: center;"><b>དེ་རིང་ཁོ་བོའི་འཛུམ་མདངས་སྔར་ལས་འཛུམ།།</b></div><div style="text-align: center;"><b><br></b></div><div style="text-align: center;"><b>སྟག་ཤར་གཞོན་སྐྱེས་དཔལ་བོའི་སྤོབས་པ་ལ།།</b></div><div style="text-align: center;"><b>སེེང་གེ་ཁྲོ་བའི་ཚུལ་ལ་འཇིགས་མི་སྲིད།།</b></div><div style="text-align: center;"><b>ཡིན་ཡང་བཞིན་བཟང་མཇལ་བའི་དུས་སྐབས་འདིར།།</b></div><div style="text-align: center;"><b>སེང་གེ་འདྲ་བའི་སྤོབས་པ་རླུང་གིས་ཁྱེར།།</b></div><div style="text-align: center;"><b><br></b></div><div style="text-align: center;"><b>སྙིང་ཁའི་བུ་ཆུང་འཕར་ལྡིང་འཕྲུལ་ལ་བསྒྱུར།།</b></div><div style="text-align: center;"><b>ལུས་པོའི་ཁྲག་རྒྱུན་ལང་ལོང་མེ་ལྟར་འབར།།</b></div><div style="text-align: center;"><b>འཆད་པའི་སྐད་ཆ་མགྲིན་པའི་ཁུགས་སུ་འགག།</b></div><div style="text-align: center;"><b>བསམ་པའི་སྣང་ཚུལ་རང་གར་འཁྱམ་མེད་གྱུར།།</b></div><div style="text-align: center;"><b><br></b></div><div style="text-align: center;"><b>དུས་ཚོད་སྐར་མ་ཡུན་ནས་ཡུན་དུ་བགྲོད།།</b></div><div style="text-align: center;"><b>སྐད་ཅིག་ཙམ་ལས་འགོར་མེད་འཕྲུལ་སྣང་ཞིག།</b></div><div style="text-align: center;"><b>དགྱེས་འཛུམ་ལག་བརྡ་གཡུགས་པའི་སྤྲོ་སྣང་ཁྲོད།།</b></div><div style="text-align: center;"><b>རྨི་ལམ་རེ་བའི་འདུན་པ་སེམས་སུ་ཞུགས།།</b></div><div style="text-align: center;"><b><br></b></div><div style="text-align: center;"><b> 2017 8 25ཉིན་བྲིས</b></div><div style="text-align: center;"><b><br></b></div><div style="text-align: center;"><br></div>