<h1><b>མཚན་མོ་འཆར་ཚུལ།</b></h1><h3><b> [ལྷོ་ཁ]ནག་པ། </b></h3><h1>མུན་པ་རུབ་སོང་།<br>སེམས་པ་མྱོས་སོང་། <br>གློག་འོད་དང་རོལ་དབྱངས་ཀྱི་འཛིངས་ཁ་སྟུག་པོས།</h1><h1></h1><h1>ཀླད་ཁམས་དང་སྙིང་གི་རུས་པར་གཟེར་ཁ་རྒྱག</h1><h1>ཀ་ཁ་བཀླག་མ་ནུས་པའི་མགྲིན་པ་ཁྱུ་ཞིག </h1><h1>མཚན་མོ་འདིར། </h1><h1>བྲོ་གར་སྨྱོན་པ་ཞིག་གི་གོམ་སྟབས་ཀྱིས་བསླུས་སོང་། </h1><h1><br></h1><h1></h1><h1>མུན་པ་རུབ་སོང་།</h1><h1>ལྦུ་ཆང་གིས་བཟི་སོང་།</h1><h1>སྔོན་ཐོན་དང་འཕེལ་རྒྱས་ཀྱི་བསླུ་བྲིད་རྒོད་པོས། </h1><h1>སྐྱིད་ཆགས་དང་སྒྱིད་ལུག་གི་རང་མདངས་རྒྱས།</h1><h1>འཚོ་ནམ་མ་འཁྱོངས་པའི་ལྟོ་བ་ནར་མོ། </h1><h1>མཚན་མོ་འདིར། </h1><h1>འཕྱོན་མའི་མཆུ་སྒྲོས་ལ་འབྱར་བའི་སྐག་རྩི་རེད།</h1><h1><br></h1><h1></h1><h1>མུན་པ་རུབ་སོང་།</h1><h1>གློག་འོད་སྨྱོས་སོང་།</h1><h1>སྲང་ལམ་ན་ངོ་ཚ་དང་ཞེ་ཁྲེལ་དམར་རྗེན་དུ་བོར།</h1><h1>བྱས་པ་དང་དྲིན་གཟོ་དུས་ཀྱི་གད་སྙིགས་སུ་འགྱུར།</h1><h1>རྨ་ཁས་གང་བའི་སྙིང་གི་འཕར་ཁ། </h1><h1>མཚན་མོ་འདིར།</h1><h1>བསྐྱར་ཟློས་མང་བའི་བརླམ་ཚིག་དེ་དག་གི་འགྱུར་རྟ་ཡིན།</h1> <h3><font color="#39b54a"> <<<<<<<<<<<<<<<<<<<<<<<<<<<<<<<<<<<<<<<</font></h3><h3><font color="#39b54a"> ཀ་ལ་པིང་ཀ་ནི་འཕུར་རྩལ་ཆེ་ཞིང་རྟག་ཏུ་འཁོར་གྱིན་ཐད་ཀར་མདུན་དུ་འཕུར་བར་བྱེད་པའི་བྱ་ཞིག བྱ་ཀ་ལ་པིང་ཀ་འཕུར་སྐྱོད་བྱེད་པའི་གཤོག་ཟུང་གི་རྡེབ་ཚུལ་ཅུང་ཆེ་མོད། འོན་ཀྱང་རྡེབ་སྒྲ་གོ་བར་དཀའ། བྱ་དེ་སྒོ་ངའི་ཚང་གི་སྦུབས་ན་གནས་པའི་སྐབས་ནས་སྐད་འགྱུར་སྙན་པར་སྒྲོག་ཅིང་། རྟག་ཏུ་ཟམ་སྣེ་དང་ལྗོན་ཤིང་གི་ཡལ་གའི་སྟེང་དུ་བབས་ནས་སྐད་སྙན་སྣ་ཚོགས་སྒྲོག་པར་བྱེད། མཚམས་རེ་མཚན་མོའང་སྐད་སྙན་སྒྲོག་པའམ་འཕུར་གྱིན་འཕུར་གྱིན་སྐད་སྙན་སྒྲོག་པར་བྱེད། བྱ་དེའི་སྐད་སྒྲ་སྨྲེང་ཞིང་གསལ་བས། ཐག་རིང་པོའི་ས་ན་གནས་ཀྱང་གསང་ཞིང་མཐོ་ལ་སྣ་གཅིག་མའི་སྐད་སྒྲ་སྙན་པོ་དེ་ལྷང་ལྷང་དུ་གོ་ཐུབ། བྱ་དེས་སྐར་མ་གཅིག་ལ་བསྟུད་མར་སྐད་ཐེངས་མ་༢༠འབྱིན་ཞིང་སྒྲོག་པ་དང་། ཀི་ཀུ་ཞེས་གསང་ཞིང་མཐོ་བའི་སྐད་ཉིས་འགྱུར་རམ་ཡང་ན་བཞི་འགྱུར་རམ་བརྒྱད་འགྱུར་སྣ་ཚོགས་སྒྲོག་པ་ཡིན་ནོ། ། </font></h3>