<h1 style="text-align: center;"> རང་ཚུལ་སྔོག་པ། </h1><h3 style="text-align: right;"> རྣམ་འབྱེད་ཤེས་རབ། </h3><h3 style="text-align: center; "><br></h3><h3 style="text-align: center;">དབྱངས་ལྡན་ངག་གི་གྲུ་ཆར་མ།།</h3><h3 style="text-align: center; ">མགྲིན་པའི་སྤང་ལ་ལན་གཅིག་འབྱོ།།</h3><h3 style="text-align: center;">སྐྱེ་བུའི་ཡིད་ཀྱི་མིག་དག་ནི།།</h3><h3 style="text-align: center;">རྣམ་དགའ་ཚིག་གི་མེ་ཏོག་བཙའ།།</h3><h3 style="text-align: center;"><br></h3><h3 style="text-align: center;">མུ་ནས་བསྙུར་ཏེ་ཞུགས་པ་ལ།།</h3><h3 style="text-align: center;">རྗེས་སུ་རང་བའི་གནས་ཐོབ་ཀྱང་།།</h3><h3 style="text-align: center;">སྔར་ཤེས་ཕར་ཆེར་དཔེ་ཐོག་ཏུ།།</h3><h3 style="text-align: center;">ལུས་པ་འདི་འདྲ་ཉམས་རེ་སྨད།།</h3><h3 style="text-align: center;"><br></h3><h3 style="text-align: center;">ཅི་བྱས་དཀར་ཆོས་ཞག་རྩི་དང་།།</h3><h3 style="text-align: center;">འགོས་པ་རིང་དུ་བོར་ན་ཡང་།།</h3><h3 style="text-align: center;">མ་བརྟག་བློ་བདེ་ངང་ཉིད་དུ།།</h3><h3 style="text-align: center;">ཚེ་ཕྱེད་ཟད་པ་མིན་ནམ་ཅི།།</h3><h3 style="text-align: center;"><br></h3><h3 style="text-align: center;">སྐད་ཅིག་སྡོད་པ་ཡོད་མིན་པའི།།</h3><h3 style="text-align: center;">ཐག་སྒྲ་བརྟགས་ནས་མཉན་པ་ན།།</h3><h3 style="text-align: center;">འཇིགས་པས་སྙིང་ཤ་གཏེད་གྱུར་ཀྱང་།།</h3><h3 style="text-align: center;">སང་ནི་ཟུག་རྔུའི་མྱོང་བ་འདོར།།</h3><h3 style="text-align: center;"><br></h3><h3 style="text-align: center;">གསལ་སྣང་རང་ལ་གདའ་བ་ཡི།།</h3><h3 style="text-align: center;">རང་སེམས་རང་གིས་མཐོང་ཙམ་ན།།</h3><h3 style="text-align: center;">ཟོལ་མེད་ཡིད་འབྱུང་སྤུ་སུད་མ།།</h3><h3 style="text-align: center;">མཁའ་ཡི་གློག་ཞགས་རྗེས་སུ་ལྡང་།།</h3><h3 style="text-align: center;"><br></h3><h3 style="text-align: center;">ཇི་ལྟར་གཤེགས་པའི་བཤུལ་ལམ་ལ།།</h3><h3 style="text-align: center;">གཅིག་ཏུ་མཆོང་བའི་ཡིད་ལྡན་ཡང་།།</h3><h3 style="text-align: center;">རྐང་ལ་ཆགས་པའི་ལྷན་སྐྱེས་ཀྱི།།</h3><h3 style="text-align: center;">ལུས་ཟུངས་སྙུན་པ་གོར་མ་ཆག།</h3><h3 style="text-align: center;"><br></h3><h3 style="text-align: center;">མ་བསྡུས་ལན་གཅིག་འཛོམས་པའི་ཁྲོད།།</h3><h3 style="text-align: center;">འགའ་ཞིག་ད་དུང་སེམས་སུ་འཁོར།།</h3><h3 style="text-align: center;">མི་འདོད་གྱེས་པའི་ངང་ཚུལ་ནི།།</h3><h3 style="text-align: center;">མཇལ་བའི་རྒྱུ་འདི་ཁོ་ནས་ལན།།</h3><h3 style="text-align: center;"><br></h3><h3 style="text-align: center;">ཟབ་ཟབ་ཆོས་ཀྱི་རང་བཞིན་འགའ།།</h3><h3 style="text-align: center;">ཆ་ཙམ་དཔྱད་པའི་ལས་སུ་ཞུགས།།</h3><h3 style="text-align: center;">སྒྲུབ་དང་འཛིན་པ་དེ་ཡི་ཚེ།།</h3><h3 style="text-align: center;">ཁུར་དུ་སོང་བའི་ངན་རྟོག་འབུར།།</h3><h3 style="text-align: center;"><br></h3><h3 style="text-align: center;">༼ མུ་འགོད། ༽</h3><h3><br></h3><h3> 2017/7/10ཉིན། 02:39</h3>