<h3 style="text-align: right; ">ཞུ་འཛིན་ལྷུན་གྲུབ། <br /></h3><h1 style="text-align: center;"><b>ཕ་མ། </b></h1><h3> <br /></h3><h3>ཁ་ཤ་རྨ་དང་སེན་རྩ་ཁྲག་གིས་འདྲེས།</h3><h3>སྒལ་པ་གནམ་དང་གདོང་པ་ས་ལ་ཕྱོགས། </h3><h3>རྒྱང་རིང་གི་ཁྱེད་ཚོའི་འདུན་པ། </h3><h3>འཚོ་གནས་ཀྱི་སྙིང་པོ་རུ་སྒོམ་ཞིང་། </h3><h3>བདེ་སྐྱིད་ཀྱི་རྩ་བ་ཁྱེད་ཀྱི་ཕུགས་འདུན་ལ་བསམ།</h3><h3>ཐ་ན། གཤིན་རྗེའི་ཞགས་ཐག་གཡོགས་ནའང་།</h3><h3>མིག་ཟུང་གི་ཞེན་མདངས་རེ་ལྟོས་ཀྱིས་ཁྱེད་ལ་འཕེན་བཞིན།</h3><h3>རེ་བ་དང་ཡིད་ཆེས་སྒོམ་གྱིན།</h3><h3>འཆི་བ་ཞེས་པའི་ལམ་མདོར། </h3><h3>ཁྱེད་ཀྱི་ཕུགས་འདུན་རྒྱགས་ཕྱེར་བསྣམས།</h3><h3><br /></h3><h1 style="text-align: center;"><b>སློབ་མ། </b></h1><h3><b><br /></b></h3><h3>དཔེ་ཁུག་ཁྲ་ཁྲ་དག་རྒྱབ་ཏུ་འཁྱེར་ཞིང་། </h3><h3>བུ་མོ་གཞོན་གསར་ཚོ་ལག་པས་སྦྲེལ་གྱིན།</h3><h3>འཐོམ་སིག་སིག་གིས་སློབ་ཁང་དུ་འཛུལ།</h3><h3>རྒྱ་ཡན་དུ་ཤོར་བའི་སེམས་པ།</h3><h3>སྟོང་བསམ་གྱི་ཐག་སྣེར་མཐུད་ཅིང་། </h3><h3>འཚོ་བའི་འདུ་འགོད་ལ་འཆར་འགོད་ཙམ་འཐེན་མི་ནུས་ཀྱང་། </h3><h3>མི་ཚེ་ཧྲིལ་པོར་མཛའ་བཅུགས་ཀྱི་དམ་བཅའ་འཇོག</h3><h3><br /></h3><h1 style="text-align: center;"><b>སློབ་ཁང་། </b></h1><h3>སློབ་ཁང་ནི་མ་གཞིར་སློབ་ཁྲིད་ཀྱི་ཁུལ་རེད། </h3><h3>སྒྲོག་རྩེ་དང་རྐུབ་བཀྱག་ཡོད་དགོས། </h3><h3>སློབ་ཁང་དུ་དཔེ་ཆ་དང་སྨྱུ་གུ་ཡོད་དགོས། </h3><h3>སློབ་ཁང་དུ་དགེ་རྒན་གྱི་བྱམས་བརྩེ་ཡོད་དགོས་ལ། </h3><h3>སློབ་ཁང་དུ་སློབ་མའི་ལྷག་བསམ་དང་སྦྱོང་འདོད་ཡོད་དགོས།</h3><h3><br /></h3><h3>སློབ་ཁང་ནི་སློབ་མའི་སྟོང་བསམ་སྒོམ་སའི་ཞིང་ཁམས་དང་། </h3><h3>སློབ་ཁང་ནི་དགེ་རྒན་གྱི་དྲག་སྤྱོད་ངོམས་སའི་སྟེགས་བུར་གྱུར།</h3><h3><br /></h3><h3>སློབ་ཁང་དུ་སློབ་ཆས་མེད་པར། </h3><h3>མ་གཞིར་སློབ་མའི་བཟའ་ཆས་ཁེངས་ལ། </h3><h3>རྒན་ལགས་ཀྱི་ཁྲིད་དབྱུག་ཀྱང་ཟད་ལ་ཉེ། </h3><h3><br /></h3><h3 style="text-align: right;">༢༠༡༧ལོའི་ལོའི་ཟླ་༨པའི་ཚེས་༡༥ དགོང་མོར་གྲུབ། </h3><h3><br /></h3>