<h3>《གཡུ་བྱ།》ཞེས་པའི་བྱིས་སྒྲུང་གི་བཀླགས་ཚོར།</h3><h3><br /></h3><h3> གྲུ་ཆུང་།</h3><h3><br /></h3><h3>༡ རྩོམ་པ་པོའི་གནས་ཚུལ་མདོར་བསྡུས།</h3><h3> 《གཡུ་བྱ།》ཞེས་པ་འདི་ནི་ཡོ་རོབ་པེར་ཀྲེམ（比利时）གྱི་རྩོམ་པ་པོ་མེ་ཁྲི་ལིན་ཁི་ཡི་མཚོན་བྱེད་བརྩམས་ཆོས་ཤིག་ཡིན་ཞིང་། ཁོང་ནི་དུས་རབ་ཉི་ཤུ་བའི་མགོ་ཡི་ཟློས་གར་བརྩམས་ཆོས་རྩོམ་མཁན་ཞིག་ཡིན་པར་མ་ཟད། ད་དུང་པེར་ཀྲེམ་གྱི་རླབས་ཆེ་བའི་སྙན་ངག་པ་དང་ཟློས་གར་རྩོམ་མཁན། ལྷུག་རྩོམ་འབྲི་མཁན་བཅས་ཡིན་པས། "པེར་ཀྲེམ་གྱི་ཧྲ་ཁེ་ཕེར་ཨེར"ཞེས་པའི་མཚན་སྙན་འཐོབ་ཡོད། 《གཡུ་བྱ།》ཞེས་པའི་ཟློས་གར་བརྩམས་ཆོས་འདིར་1911ལོའི་ནོ་པེར་རྩོམ་རིག་བྱ་དགའ་འཐོབ་མྱོང་བ་རེད། 1949ལོ་དེར་ཁོང་དགུང་གྲངས87སོན་སྐབས་ཧྥ་རན་སི་རུ་སྐུ་གཤེགས་སོ།།</h3><h3><br /></h3><h3>༢ ནང་དོན་གནད་བསྡུས།</h3><h3> 《གཡུ་བྱ།》ཞེས་པར་བུད་ཤིང་འཐུ་མཁན་ཞིག་གི་བུ་ཏིས་ཏིས་ཨར་དང་བུ་མོ་མུས་ཏིས་ཨར་གཉིས་ཀྱིས་རྨི་ལམ་དུ་གཡུ་བྱ་བཙལ་བའི་གཏམ་རྒྱུད་བྲིས་ཡོད་པ་སྟེ། ཡེ་ཤུའི་འཁྲུངས་སྐར་གྱི་ཉིན་སྔོན་མའི་མཚན་མོའི་རྨི་ལམ་དུ་ཁོ་གཉིས་ལྷ་མོ་དང་འཕྲད་ཅིང་། ལྷ་མོས་དེ་གཉིས་ལ་རང་གི་ཚ་མོ་ནད་པ་དེ་ལ་གཡུ་བྱ་ཞིག་ངེས་པར་འཚོལ་དགོས་ཞེས་པར། ཏིས་ཏིས་ཨར་དང་མིས་ཏིས་ཨར་གཉིས་མཉམ་དུ་གཡུ་བྱ་འཚོལ་བའི་འགྲུད་བཞུད་ཀྱི་ལམ་དུ་ཆས་པའི་གནས་ཚུལ་བྲིས་ཡོད། </h3><h3> ཁོ་ཚོ་མེ་དང་ཆུ། ཁྱི། ཞི་ལ། འོ་མ། གོར་སོབ（འདི་དག་ཚང་མས་མི་སྐད་སྨྲ་བ།）དང་མཉམ་དུ་ལྷའི་ཕོ་བྲང་ནས་ལྷ་མོ་བཙལ་ཞིང་། མཚན་མོའི་ཕོ་བྲང་ནས་འཆི་བདག་བཙལ། དེ་ནས་ནགས་ཚལ་དང་དུར་ས། ད་དུང་བདེ་སྐྱིད་རྩེད་ར་དང་མ་འོང་རྒྱལ་ཁབ་སོགས་སུ་ཕྱིན་ནས་ཉེན་ཁ་དང་དཀའ་སྡུག་གང་མང་མྱངས་ཀྱང་གཡུ་བྱ་ཟེར་བ་ཞིག་རྙེད་མ་བྱུང་། དེ་ནས་རྨི་ལམ་ནས་སད་རྗེས། ཏིས་ཏིས་ཨར་གྱིས་རང་གི་གཟེབ་ནང་གི་བྱ་ནི་སྔོན་པོ་གཡུ་ལྟ་བུ་ཞིག་ཡིན་པ་ཤེས་ཏེ། ཁྱིམ་མཚེས་ཀྱི་བུ་མོ་ནད་པ་དེར་བྱིན་པས་མོ་བལྟས་བལྟས་རིག་རིག་ལ་ནད་ལས་སངས་སོང་། འོན་ཀྱང་རྗེས་སུ་མོས་སེམས་ཆུང་མ་བྱས་པས་གཡུ་བྱ་དེ་གཟེབ་ལས་ཤོར་རོ།།</h3><h3><br /></h3><h3> ༣ རང་ངོས་ཀྱི་བཀླགས་ཚོར།</h3><h3> གཏམ་རྒྱུད་འདིར་གཡུ་བྱ་ཡིས་བདེ་སྐྱིད་མཚོན་པར་བྱས་ཡོད་དེ། ཏིས་ཏིས་ཨར་དང་མིས་ཏིས་ཨར་གཉིས་ཀྱིས་གཡུ་བྱ་འཚོལ་བ་ནི་དོན་དངོས་སུ་བདེ་སྐྱིད་འཚོལ་བའི་བརྒྱུད་རིམ་ཞིག་རེད། ཆེས་མཐའ་མཇུག་གཡུ་བྱ་དེ་རང་གི་ལག་ཏུ་ཡོད་པ་ཚོར་ཞིང་། དེས་དོན་དངོས་སུ་བདེ་སྐྱིད་ནི་རང་གི་གམ་དུ་ཡོད་པ་ལས་གཞན་གང་ན་ཡང་མེད་པར། གཙོ་བོ་རང་ལ་དེ་མཐོང་ཐུབ་པའི་སེམས་དང་མིག་ཅིག་ཡོད་དགོས་པ་དེ་བསྟན་འདུག གཏམ་རྒྱུད་ཀྱི་མཇུག་ཏུ་བུ་མོ་དེས་གཡུ་བྱ་གཟེབ་ལས་ཤོར་དུ་བཅུག་སྟེ་སྐད་ཆེན་པོས་ངུས་པ་དེས། ཡང་ང་ཚོ་ལ་བདེ་སྐྱིད་ནི་རང་ལ་བརྟེན་ནས་འཚོལ་སྙེག་དང་མཐོང་ཐབས་བྱ་དགོས་པ་བསྟན་འདུག</h3><h3> 《གཡུ་བྱ》ཞེས་གཏིང་ཟབ་པའི་བྱིས་སྒྲུང་འདིས་མི་རྣམས་ལ་བདེ་སྐྱིད་ཅེས་པ་ནི་ཐག་རིང་གང་ན་ཡང་མེད་པར་རང་གི་གམ་དུ་ཡོད་པའི་བདེན་ལུགས་བཤད་ཡོད་དེ། བདེ་སྐྱིད་ནི་དྲོ་འཇམ་གྱི་ཉི་འོད་དང་། དག་གཙང་གི་ཁ་དབུགས། ཆུ་བོའི་བཞུར་རྒྱུན་དང་འདྲ་བའི་དུས་ཚོད། ག་ས་གང་ནའང་མེད་པ་ཞིག་མིན་ཡང་། མི་རྣམས་ཀྱིས་དེ་མཐོང་གིན་མེད་པ་དེ་བརྗོད་འདུག གཡུ་བྱ་ཡི་བསྟན་དོན་ནི་ཚེ་སྲོག་དེ་མ་གཞི་ནས་བདེ་སྐྱིད་ཅིག་ཡིན་པ་དང་། དེ་ནི་དུས་གཏན་དུ་ང་ཚོ་དང་མཉམ་དུ་ཡོད་པའི་གནས་ལུགས་བརྗོད་འདུག</h3><h3><br /></h3><h3> "འཇིག་རྟེན་ལ་མཛེས་པ་དཀོན་པ་མ་ཡིན་པར། དེ་ནི་ཁྱེད་ལ་མཛེས་པ་མཐོང་བྱེད་ཀྱི་མིག་ཟུང་དཀོན་པས་རེད"ཅེས་པ་ལྟར། འཇིག་རྟེན་ལ་ཡང་བདེ་སྐྱིད་དཀོན་པ་མ་ཡིན་པར། ཏག་ཏག་བདེ་སྐྱིད་མཐོང་བའི་མིག་ཟུང་དཀོན་པས་རེད། གྲོགས་པོ་རྣམ་པ། ང་ལ་རེ་བ་ཉག་གཅིག་ཡོད་པ་ནི་ཁྱེད་ཚོ་ལའང་དེབ་འདི་བཀླག་ཐུབ་པའི་ཁོམ་ལོང་ཞིག་ཡོད་ན་ཅི་མ་རུང་སྙམ་པ་དེ་ཡིན་ཞིང་། བཀླགས་རྗེས་ང་ཚོས《གཡུ་བྱ》ཡི་སྣེ་ཁྲིད་འོག་ནས་རང་ལ་དབང་བའི་གཡུ་བྱ་དེ་བཙལ་ནས་རྙེད་པར་བྱ་ཞིང་། དེ་ལ་གཅེས་སྤྲས་བྱ་རྒྱུ་ནི་དེ་བས་ཀྱང་གལ་ཆེའོ་སྙམ།།</h3><h3> 2017.8.14ཉིན་ཕ་ཡུལ་ནས་བྲིས།</h3><h3><br /></h3>