<h1 style="text-align: center;">གངས་རི་ར་བས་སྐོར་བའི་ཞིང་གི་ཕུལ།།</h1><h1 style="text-align: center;">རྡོ་རྗེ་ས་འཛིན་ཙོང་ཁའི་སྐྱེས་རིའི་འདབས།།</h1><h1 style="text-align: center;">གངས་རིའི་མཛེས་རྒྱན་མདོ་སྨད་གཅན་ཚ་ཞེས།།</h1><h1 style="text-align: center;">གྲགས་པ་ཕྱོགས་ཀྱི་མེ་ཏོག་འཛུམ་པ་ཡོད།།</h1> <h1 style="text-align: center;">ལ་ལས་སྔོན་གྱི་བཙན་པོའི་དཔུང་དུ་འབོད།།</h1><h1 style="text-align: center;">ལ་ལས་རྒྱ་སྟག་འཛུམ་པའི་ཡུལ་དུ་སྒྲོག།</h1><h1 style="text-align: center;">ལ་ལས་རིག་པ་འབར་བའི་ཞིང་ཁམས་ཞེས།།</h1><h1 style="text-align: center;">བསྔགས་པའི་མེ་ཏོག་དཀར་བོ་ཕྱོགས་སུ་འགྲེམ།།</h1> <h1 style="text-align: center;">སྣང་རའི་གསེར་ཁང་བསྟན་པའི་གསོས་སུ་བཞེངས།།</h1><h1 style="text-align: center;">བདེ་ཆེན་ཆོས་འཁོར་འགྲོ་བའི་དཔལ་དུ་བཞུགས།།</h1><h1 style="text-align: center;">མགུར་གྱི་ཇོ་བོ་མཆོད་པའི་ཞིང་དུ་གྲུབ།།</h1><h1 style="text-align: center;">མཐོང་ཐོས་དྲན་རེག་གྲོལ་བ་ཕྱོགས་སུ་ལྷམ།།</h1> <h1 style="text-align: center;">སྔོན་དུས་བོད་ཀྱི་མཁས་པ་མི་གསུམ་གྱིས།།</h1><h1 style="text-align: center;">ཉམས་བཞེས་མཛད་དེ་རྟོགས་པ་འབར་བའི་གནས།།</h1><h1 style="text-align: center;">རྨ་འགྲམ་རྡོ་རྗེ་བྲག་ཅེས་སྙན་པའི་གླུ།།</h1><h1 style="text-align: center;">ཕྱོགས་ཀྱི་བློ་ལྡན་དག་གི་ངག་ན་མཛེས།།</h1> <h1 style="text-align: center;">དཔལ་གྱི་ལྷ་མོ་ཁྲོས་པའི་མཐུས་བསྐུལ་བས།།</h1><h1 style="text-align: center;">ལྔ་ཟུང་ཞིང་ལྡན་མཐོ་རིས་སྐྱེལ་བའི་འཕྲུལ།།</h1><h1 style="text-align: center;">སྒྲོ་ལྡན་གནམ་རུ་བཅུད་དུ་སྦས་པ་ཡི།།</h1><h1 style="text-align: center;">གསང་བའི་ངོ་མཚར་མཛད་པ་ལྡན་ཞེས་གྲགས།།</h1> <h1 style="text-align: center;">འཇིག་རྟེན་མིག་གཅིག་ས་པཎ་ཉིན་བྱེད་ཀྱིས།།</h1><h1 style="text-align: center;">ཆེན་པོའི་ཧོར་གྱི་པད་མོའི་སྦུབས་གྲོལ་བར།།</h1><h1 style="text-align: center;">ཐུགས་བསྐྱེད་ཁྱུང་སྔོན་སྐྱེས་བཟང་འཛུམ་པའི་དུས།།</h1><h1 style="text-align: center;">འོད་སྲུངས་འཕེལ་གདུང་སྐྱེ་དགུའི་གསོས་སུ་སྦས།།</h1> <h1 style="text-align: center;">རྨ་ཀླུང་གསེར་ལྡན་དལ་གྱིས་འབབ་པའི་འགྲམ།།</h1><h1 style="text-align: center;">ལོ་བའི་ཁོག་ཏུ་གྲགས་པའི་འཛིན་མའི་གཞིར།།</h1><h1 style="text-align: center;">སྔོན་ཚེ་བོད་ཀྱི་མཁས་པ་མི་གསུམ་གྱིས།།</h1><h1 style="text-align: center;">བསྟན་པའི་སྐྱ་རེངས་བསུ་བའི་ཐུགས་དམ་བསྐྱེད།།</h1><h1 style="text-align: center;"><br /></h1> <h1 style="text-align: center;">རྣལ་འབྱོར་དབང་ཕྱུག་གསེར་རིའི་ཕྲེང་བ་ཡིས།།</h1><h1 style="text-align: center;">ཉམས་རྟོགས་ནམ་མཁའི་མཛོད་ཀྱི་སྒོ་འབྱེད་པར།།</h1><h1 style="text-align: center;">བྱོན་པ་མིན་ནམ་མཁས་དང་གྲུབ་པ་དག།</h1><h1 style="text-align: center;">མ་བོས་ན་འང་ངང་གིས་གནས་འདིར་བྱོན།།</h1> <h1 style="text-align: center;">གསང་བ་སྔགས་ཀྱི་གནས་ལ་གདེངས་ཐོབ་པའི།།</h1><h1 style="text-align: center;">ལོ་ཁོག་སྔགས་འཆང་སྒྲུབ་པ་མཛད་པའི་ཚེ།།</h1><h1 style="text-align: center;">ཁོལ་སའི་སྔགས་པས་གནམ་ལྕགས་ཆར་བབས་པ།།</h1><h1 style="text-align: center;">ཐུ་བས་བཟུང་ཞེས་རྒན་པོའི་གཏམ་ལ་གྲགས།།</h1> <h1 style="text-align: center;">ངོ་མཚར་དགའ་བ་བརྒྱ་ཡིས་ཉེར་མཛེས་པ།།</h1><h1 style="text-align: center;">སྐྱེ་རྒུ་ཕན་བདེ་གསོས་གྱུར་གསེར་ཡུམ་དང་།།</h1><h1 style="text-align: center;">མཐོང་ཐོས་རེག་པས་གྲོལ་བའི་རྟེན་གསུམ་གྱིས།།</h1><h1 style="text-align: center;">ཕྱུར་བུར་གཏམས་ཞེས་མེས་པོས་ཡང་ཡང་གླེང་།།</h1> <h1 style="text-align: center;">ལོ་ཁོག་མི་རིང་ཞེས་པའི་དཔའ་རྒོད་ཀྱིས།།</h1><h1 style="text-align: center;">ཀླ་ཀློར་བརྙས་པའི་འཁོན་གྱི་རྗེས་འབྲངས་ནས།།</h1><h1 style="text-align: center;">མུ་སྟེགས་དཔུང་གིས་ཞེ་སྡང་བསྲེགས་ཟ་ཡིས།།</h1><h1 style="text-align: center;">གཙེས་པའི་དུད་དྲེག་ལོ་རྒྱུས་སྟོན་ཕྱིར་བཞུགས།།</h1> <h3 style="text-align: center;">འཇིགས་མེད་འཕྲིན་གྱི་ལས་ལ་དབང་འབྱོར་བའི།།</h3><h3 style="text-align: center;">མདོ་སྔགས་རྒྱ་མཚོའི་མཛོད་ཀྱི་སྒོ་འབྱེད་པ།།</h3><h3 style="text-align: center; ">གང་དེའི་ཐུགས་རྗེ་ཟེར་མ་འཛུམ་པའི་ཚེ།།</h3><h3 style="text-align: center;">རྫོགས་ལྡན་བཞིན་རས་སླར་ཡང་བྱི་དོར་བྱས།།</h3><h3 style="text-align: center;"><br /></h3><h3><br /></h3> <h1 style="text-align: center;">མདོ་སྨད་འགྲོ་བའི་མགོན་པོ་ཐར་ཤུལ་བས།།</h1><h1 style="text-align: center;">གནས་འདི་ཀ་ལཱ་པ་རུ་བསྒྲུབས་པའི་ཚེ།།</h1><h1 style="text-align: center;">རིགས་ལྡན་དམག་གིས་གནས་འདིར་དཔུང་བསྒྲིགས་པས།།</h1><h1 style="text-align: center;">མ་ཁའི་ཀླ་ཀློ་དག་གི་སྙིང་རྩ་འདར།།</h1> <h1 style="text-align: center;">གཞུང་ཆེན་གསེར་གྱི་ཐང་མ་བརྡལ་བའི་འཕྲུལ།།</h1><h1 style="text-align: center;">བདག་གིར་བཞེས་པ་དགེ་འདུན་རྒྱ་མཚོའི་དཔལ།།</h1><h1 style="text-align: center;">གང་དེས་ལྷར་བཅས་སྐྱེ་དགུའི་ཕན་བདེའི་དཔྱིད།།</h1><h1 style="text-align: center;">འདི་རུ་དྲངས་པའི་དགའ་སྟོན་ལྷ་རྣམས་སྒྲོག།</h1> <h1 style="text-align: center;">ཕན་བདེའི་རྒྱལ་མཚན་མངོན་པར་བསྒྲེང་ངོ་ཞེས།།</h1><h1 style="text-align: center;">ཕྱོགས་ཀྱི་སྐྱེ་བོ་མཐའ་དག་འདིར་འཛོམས་ཚེ།།</h1><h1 style="text-align: center;">འདོད་པའི་རོལ་རྩེད་སྟོངས་པར་ཡལ་ལོ་ཞེས།།</h1><h1 style="text-align: center;">ཉ་ཡི་ཏོག་ཅན་མུན་པའི་ཁུང་བུར་འཇུག།</h1> <h1 style="text-align: center;">ཁྱད་པར་འགྲོ་བའི་ཉེར་འཚེ་བཟློག་པའི་ཕྱིར།།</h1><h1 style="text-align: center;">ཆོས་སྲིད་གསེར་གྱི་འཁོར་ལོ་བསྐོར་བ་ཡི།།</h1><h1 style="text-align: center;">ཕྱག་ན་རྡོ་རྗེ་ངུར་སྨིག་གར་རོལ་པའི།།</h1><h1 style="text-align: center;">ལ་མོ་ན་རིམ་གསེར་གྱི་ཕྲེང་བས་བསྐྱངས།།</h1> <h1 style="text-align: center;">སྔོན་ཚེ་བཙན་པོའི་དཔུང་གི་རུ་འདྲེན་དུ།།</h1><h1 style="text-align: center;">དགྲ་སྡེ་ཁྲག་ལ་རྔམ་པའི་དཔའ་བོའི་སྡེ།།</h1><h1 style="text-align: center;">འཇིགས་མེད་ང་རོ་སྒྲོག་པའི་ལོ་བའི་ཁོག།</h1></h1><h1 style="text-align: center;">མདུན་དུ་<span style="font-size: 16px;">ལྷོད་ཀྱིས་ཆགས་པའི་མཛེས་པ་</span>མངོན།།</h1><h3><br /></h3> <h1 style="text-align: center;">དད་པའི་གསེར་གྱི་མེ་ཏོག་འདབ་གྲོལ་པ།།</h1><h1 style="text-align: center;">མེས་པོའི་ཉམས་བཞེས་དཔལ་གྱི་མཆོད་པ་རུ།།</h1><h1 style="text-align: center;">སྦྲེངས་པའི་རིག་བྱེད་ངག་གི་མགྲིན་ཡངས་པ།།</h1><h1 style="text-align: center;">ཁོ་བོ་གནས་འདིར་འཁོར་ལོའི་འཕྲུལ་གྱིས་སླེབས།།</h1> <h1 style="text-align: center;">རྡོ་རྗེ་བྲག་རི་སྔོན་བྱུང་གཏམ་ལས་འགྱིང་།།</h1><h1 style="text-align: center;">མང་རའི་མཇལ་བ་གནའ་བོའི་གཏམ་ལ་དགའ།།</h1><h1 style="text-align: center;">ལོ་ཁོག་བུ་ཡིས་ལོ་རྒྱུས་ཐང་མར་བརྡལ།།</h1><h1 style="text-align: center;">བཀྲ་ཤིས་གསེར་གྱི་མཆོད་རྟེན་བཞེངས་པ་འདྲ།།</h1></h1><h3><br /></h3> <h1 style="text-align: center;">གཤིས་བཟང་གཡུ་ལོ་རྒྱས་པའི་ལྗོན་པ་ལ།།</h1><h1 style="text-align: center;">ངག་རིག་མེ་ཏོག་བཞད་པའི་འཛུམ་མངའ་ཞིང་།།</h1><h1 style="text-align: center;">དོན་བཟང་གཡར་དུ་ཟ་བའི་དཔལ་གྲུབ་པ།།</h1><h1 style="text-align: center;">རིག་པའི་རྒྱལ་མཚན་འཛིན་དེས་བསྐུལ་བས་བྲིས།།</h1> <h1 style="text-align: center;">འདི་ལས་བཀྲ་ཤིས་ཉི་མ་མཁའ་རུ་འཛུམ།།</h1><h1 style="text-align: center;">བདེ་ལེགས་ལྷ་ཡི་མེ་ཏོག་ཕྱོགས་སུ་བཀྲ།།</h1><h1 style="text-align: center;">ཕུན་ཚོགས་གཡང་གི་དྲི་བསུང་འཁྱིལ་བ་ཡིས།།</h1><h1 style="text-align: center;">ལུས་ངག་ཡིད་གསུམ་དགེ་བའི་དཔལ་འཛུམ་ཤོག།</h1><h3><br /></h3><h3>ཅེས་མདོ་སྨད་ལོ་རྡོ་རྗེ་བྲག་གི་གནས་བསྟོད་དཔྱིད་ཀྱི་རྒྱལ་མོའི་གླུ་དབྱངས་ཞེས་བྱ་བ་འདི་སྣང་རའི་གསེར་ཁང་དང་ཀུན་མཁྱེན་འཇིགས་མེད་དབང་བོའི་འཁྲུངས་ཡུལ།ལོ་རྡོ་རྗེ་བྲག་སོགས་སུ་མཇལ་སྐོར་བའི་སྐབས་སུ་ངག་རིག་ཡངས་པའི་དགེ་རྒན་ལོ་ཁོག་དོན་འགྲུབ་རྒྱལ་གྱིས་ནན་གྱིས་ཡང་ཡང་བསྐུལ་བ་ལས་མང་རའི་ཡུལ་གྱི་རིག་བྱེད་མགྲིན་པ་ཅན་ངག་གི་མདུད་རྒྱ་རང་སར་གྲོལ་བས་སྦྱར་ཏོ།།</h3>