<h3> རྩྭ་ཟིལ། </h3><h3> འཇུ་སྐལ་བཟང་།</h3><div> </div><div>རལ་གྲིའི་ཡང་རྩེར་འཛེགས་ཟིན་པའི།</div><div>ཚེ་སྲོག་གི་གོང་བུ་ཞིག་སྟེ།</div><div>ད་ནི་འགུལ་པ་ཙམ་གྱིས་ཀྱང་འཐོར་ཞིག་ཏུ་འགྲོ་སྲིད།</div><div><br></div><div>ཁྱོད་ལ་དྲི་མ་ཐམས་ཅད་ཀྱིས་མ་གོས་པས།</div><div>གཞོན་ནུ་མའི་ཁ་རླངས་ཀྱིས་ཀྱང་ཁྱོད་ལ་རེག་པར་མི་ཕོད།</div><div>ཁྱོད་ཉིད་སྒྲིབ་པ་ཐམས་ཅད་དང་བྲལ་པས།</div><div>ཕྱི་ནང་ཐམས་ཅད་ཁོར་ཡུག་ལ་གསལ་ཞིང༌།</div><div>ཁོར་ཡུག་མ་ལུས་ཕྱི་ནང་ལ་གསལ།</div><div><br></div><div>ཆེས་མཐར་ཐུག་གི་དྭངས་མ་ནི།</div><div>ཆེས་འཇིག་པར་སླ་བ་ལགས།</div><div><br></div><div>ཁྱོད་ནི་འཚང་རྒྱ་ཁ་མའི།</div><div>སྐད་ཅིག་གི་མངོན་སྟངས་ཤིག་སྟེ།</div><div>མཚམས་འདིར་བསླེབས་ཚེ།</div><div>ཅིས་ཀྱང་འོད་ལུས་སུ་དྭངས་དགོས།</div> <h3>ན་ཕྲ་མཚར་སྡུག་གི་ལམ་གྲོགས་བུ་མོ། །</h3><div>དྭངས་བསིལ་ཆར་རྒྱུན་གྱིས་བརླན་པའི་བཞིན་ན། །</div><div>སྨིན་ལེགས་མཁུར་ཚོས་ཀྱི་ཀུ་ཤུ་གསལ་ཞིང་། །</div><div>ཡིད་འོང་ཟུར་མིག་གི་བུང་བ་ཁྱུག་ཁྱུག །</div><div>གནག་སྣུམ་ལན་བུ་ཡིས་ཕྱེད་ཙམ་བསྒྲིབས་པའི། །</div><div>བིམ་པའི་མཆུ་སྒྲོས་དེ་སྙིང་ལ་འབབ་ཅིང་། །</div><div>ཆུ་ལྡན་སྟོད་གོས་དང་ཀུན་ནས་མཛའ་བའི། །</div><div>བྲང་སྐྱེས་མྱོས་བུམ་དེ་མིག་ལ་གཟན་པ། །</div><div>དཔྲལ་བའི་མེ་ལོང་ན་རྒྱུན་མར་འབབ་པའི། །</div><div>སྦྲང་ཆར་ཐིགས་ཕྲེང་དེ་ང་རང་ཡིན་ན། །</div><div>དབྱིབས་ལེགས་དྲི་འཛིན་གྱི་སྡོང་བུ་བརྒྱུད་དེ། །</div><div>མཆུ་སྒྲོས་ཡལ་འདབ་ལ་མངོན་པར་ཕྱོགས་འགྲོ། །-----འཇུ་སྐལ་བཟང་། </div> <h3>༼ས་སྲོད་ཀྱི་རྩྭ་ཐང་།༽</h3><div> འཇུ་སྐལ་བཟང་།</div><div>དགོང་ཁའི་ཉི་མས་གྲིབ་མ་རིང་དུ་བསྲིངས།།</div><div>བལ་ལྡན་མ་བུ་འཕྲད་པས་འབའ་སྒྲ་སྒྲོག།</div><div>རྒྱང་རིང་མགྲོན་པོར་སྒུག་པའི་གཞོན་ནུ་མས།།</div><div>རྡུལ་རླུང་བསྐྱིལ་བའི་ལམ་ལ་རྒྱང་མིག་བལྟ།།</div><div>༿ལོ་རབས་བརྒྱད་ཅུ་བའི་རྩྭ་ཐང་གི་རྣམ་པ༾</div><div>༼ས་སྲོད་ཀྱི་རྩྭ་ཐང་།༽</div><div> མང་བུ།</div><div>དགོང་ཁའི་ཉི་མས་གྲིབ་མ་རིང་དུ་བསྲིངས།།</div><div>སྐད་འཕྲིན་སྒང་ན་ཆགས་གཏམ་འུ་རུ་རུ།།</div><div>སྟབས་བདེ་ཐུག་པ་འཐུང་བའི་གཞོན་ནུ་མས།།</div><div>སྣུམ་ལམ་རིང་མོའི་སྣེ་ལ་རྒྱང་མིག་བལྟ།།</div><div>༿དེང་གི་དུས་ཀྱི་རྩྭ་ཐང་གི་རྣམ་པ༾</div> <h3>འཇུ་སྐལ་བཟང་།</h3><div><br></div><div>ཁོ་ཚོས་ཡིག་ནོར་བྲིས་བཞག</div><div>ཡིག་ནོར་འདི་ཚོ ང་ཚོའི་མུན་པ་རེད འུག་པ་རེད</div><div>ཁྭ་ཏ་བཞིན་ཨག་སྐད་འཛེར་འཛེར་འབྱིན་གྱིན་འདུག</div><div>སྡིག་སྲིན་བཞིན་ཡན་ལག་ཤིགས་ཤིགས་འགུལ་གྱིན་འདུག</div><div>གོས་སྲུབས་སུ་འཚང་བའི་སོ་མ་བཞིན་བསལ་དུ་མེད་པར་འདུག</div><div>དེ་ཚོས་ང་ཚོར་སྐྱི་གཡའ་རུ་འཇུག་བཞིན ཞེ་མེར་དུ་འཇུག་བཞིན</div><div>ཟུག་རྔུ་བསྐྱེད་བཞིན དངངས་སྐྲག་སློང་བཞིན་འདུག</div><div><br></div><div>ཡིག་ནོར་ཚོས་གཞུང་ལུགས་ན་གཡེང་རྐྱལ་བྱེད་ཀྱིན་འདུག</div><div>བསླབ་བྱ་ན་གཡོ་སྟོན་བྱེད་བཞིན་འདུག</div><div>རྩོམ་རིག་ན་བཅོས་འཛུམ་སྟོན་བཞིན་འདུག</div><div>ལོ་རྒྱུས་ཀྱི་འགག་མདོ་ན་རྩོད་གཞི་སློང་གིན་འདུག་ཅིང</div><div>མཚམས་ཁང་གི་སྒོ་དྲུང་ནས་ལོག་སྟོན་བྱེད་ཀྱིན་འདུག</div><div>ཐ་ན་སྨན་རྐྱལ་དུ་འཛུལ་ནས</div><div>ཤི་གསོན་གྱི་གྱེས་སོ་ན་བརྡ་ལོག་རྒྱག་གིན་འདུག</div><div>མདོར་ན་ཡིག་ནོར་དེ་ཚོས་ཆོས་ལོག་འཆད་ཀྱིན་འདུག</div><div>སྲིད་ནོར་དུའང་འཁྲིད་ཀྱིན་</div><div>འདུག་སྟེ་ཁོ་ཚོས་ག་སར་ཡིག་ནོར་བྲིས་བཞག</div><div>གཞུང་ཡིག་ན་ཡིག་ནོར་བྲིས་བཞག</div><div><br></div><div>ཐམ་ག་ན་ཡིག་ནོར་བྲིས་བཞག</div><div>སྒོ་བྱང་ན་ཡིག་ནོར་བྲིས་བཞག</div><div>ཡིག་ནོར་གྱི་སྙན་ཞུ་ལ</div><div>ཡིག་ནོར་གྱི་ཆོག་མཆན་འགོད་ཅིང་།</div><div>ཡིག་ནོར་གྱིས་ལག་བསྟར་བྱེད་ཀྱིན་འདུག</div><div><br></div><div>ད་ལྟ་དེ་ཚོ་ཡམས་ནད་བཞིན་ག་སར་ཁྱབ་ཟིན</div><div>ནམ་མཁའ་ནས་འབབ་ཀྱིན་འདུག</div><div>གྲོང་མཐའ་ན་ཉུལ་གྱིན་འདུག</div><div>ལྷས་འདབས་སུ་རུལ་བཞིན་འདུག</div><div>ང་ཚོས་ཁ་ནས་ཡིག་ནོར་ཟོས་ཟིན</div><div>ང་ཚོའི་རྒྱབ་ཏུ་ཡིག་ནོར་གྱོན་ཟིན</div><div>ད་ལྟ་ང་ཚོ</div><div>ཡིག་ནོར་དང་ཁ་འབྲལ་ཐབས་མེད་པར་གྱུར་འདུག</div><div><br></div><div>ཁོ་ཚོས་ག་སར་ཡིག་ནོར་བྲིས་བཞག</div><div>ང་ཚོའི་གཙང་བོ་དང་ལོ་རྒྱུས་ཀྱི་མགོ་ཁུངས་ནས ཡིག་ནོར་གྱིས་རྙོག་གིན་འདུག</div><div>མཐོ་སྒང་གི་རུས་སྒྲོམ་ཧྲིལ་བོ་ཡིག་ནོར་གྱིས་ཟ་གིན་འདུག</div><div>ཡིག་ནོར་ཚོ་མའི་མངལ་དུ་ཞུགས་ཟིན་པས</div><div>རིགས་རྒྱུད་ཀྱི་ཕྱི་མ་ཚོ་རྙོག་འཐོམ་མེར་བཏང་འདུག</div><div><br></div><div>ཁོ་ཚོས་ག་སར་ཡིག་ནོར་བྲིས་བཞག</div><div>ཨ་ཁ་ཁ ཁོ་ཚོས་ངའི་ཆེས་གཅེས་ཐང་ཆེ་བའི་རུས་མིང་དེ</div><div>ཡིག་ནོར་གྱིས་བྲིས་བཞག</div><div>ངའི་དུར་བྱང་ལ་ཡིག་ནོར་བཏབ་བཞག</div>