<h3><br /></h3><h3><br /></h3><h3> </h3><h3> ཚེ་རིང་སྐྱིད།</h3><h3><br /></h3><h3><br /></h3><h3>སྟོང་སང་སང་གི་སེམས་པ་དེ་འཁུར་བཞིན།</h3><h3>གྲང་ཤུར་ཤུར་གྱི་འཇིག་རྟེན་ཞིག་གི་མཁའ་དབུགས་རྔུབ།</h3><h3>ཁྱོད་ཀྱི་ཆེད་དུ་ཇ་རྐྱང་དང་མིག་ཆུ་མང་པོ་མཉམ་དུ་འཐུང་།</h3><h3>ཁྱོད་ཀྱི་ཕྱིར་དུ་རེ་སྒུག་དང་སྟོང་བསམ་ཁོ་ནས་རྨི་ལམ་བསུས།</h3><h3>ཁྱོད་ཀྱི་དོན་དུ་ལེ་བདའ་དང་འཁང་ར་མང་པོས་ལོ་ཟླར་འཁྱུད།</h3><h3>གྱེས་གདུང་ཡ། ཁྱེད་ཀྱིས།</h3><h3>དྲན་གདུང་ཇི་ཙམ་ཉར་ན་མིག་ཆུ་དེ་ཙམ་མོད།</h3><h3>ལོ་ཟླ་ཅི་ཙམ་འགོར་ན་གྱེས་གདུང་དེ་ལས་མང་།</h3><h3>ཁེར་རྐྱང་གི་འཚོ་བ་སྐྱུར་མོ་བསྐྲུན་པའི་ངས།</h3><h3>དཔག་པར་དཀའ་བའི་གྱེས་གདུང་དེ་འབྲི་བཞིན།</h3><h3>མཐར་ཐུག་གི་རྫོགས་ཚིག་ལ་ཅེར།</h3><h3>གྱེས་གདུང་། ཐོབ་སླ་བའི་སྡུག་བསྔལ་ལྗིད་མོ།</h3><h3>གྱེས་གདུང་གི་ཞིང་ཁམས་ན། རེ་སྒུག་མང་།</h3><h3>ཁ་སང་། ལྷན་འཛོམས་ཀྱི་དགོད་སྒྲ་ཡིན།</h3><h3>དེ་རིང་། གྱེས་གདུང་གི་མིག་ཆུ་རེད།</h3><h3>སང་ཉིན། མཇལ་འཛོམས་ཀྱི་སྔོན་འགྲོ་ཡིན་ཨེ་སྲིད།</h3><h3>དེའི་ཕྱིར། གྱེས་གདུང་ཡ།</h3><h3>ནམ་མཇལ་གྱི་དྲི་རྟགས་སྙིང་ལ་བཀོད་ནས་ཅི་བྱ།</h3><h3>མེས་པོའི་རྣག་ཁྲག་གི་ལོ་རྒྱུས་འདི་ལྟར་སྐྱོང་བ།</h3><h3>ང་ཚོས་འཁུར་འོས་པའི་གྱེས་གདུང་ག་ལ་ཡིན།</h3><h3>ཟླ་བ་ལ་གསང་མིག་བགྲད་ཞོར།</h3><h3>གྱེས་བྲལ་གྱི་མཛུབ་རྩིས་རྒྱག་ཐེངས་རེར།</h3><h3>ང་ཚོའི་འཇིག་རྟེན་གྱི་འཁོར་ལམ་ཇི་འདྲའི་དལ་ཨང་།</h3><h3> ༢༠༡༦ ་ ༩ ་༡༥</h3><h3><br /></h3><h3><br /></h3>