<h3> </h3><h3> ༧ ཞང་སྟོན་བསྟན་པ་རྒྱ་མཚོས། </h3><h3> ࿑བཀའ་བཞིན་སྒྲུབ་པ་ནི་མཆོད་པ་ཐམས་ཅད་ཀྱི་མཆོག་ཡིན་པས། སྐྱེས་རབས་ལས། ཕན་པའི་ལན་དུ་མཆོད་པ་བྱ་བ་ནི། ། བསྒོ་བའི་ངག་བཞིན་ཉམས་སུ་ལེན་པ་ཡིན། ། ཞེས་གསུངས། གཞན་གྱི་བླ་མ་བྱས་ན་འདི་ལ་མྱོང་བ་ཞིག་ཐོན་རྒྱུ་འདུག ཁྱེད་མཁྱེན་ཞེས་ཨར་༼ཕར་༽ ལ་གཏད་ཀྱང་བཤད་པའི་ཁ་མི་ལེན་ན་སངས་རྒྱས་ཀྱིས་ཀྱང་ཕན་མི་ཐོགས། འདིས་ངས་བཤད་པའི་ཁ་ལེན་གི་འདུག་སྙམ་ནས་སེམས་གཏིང་ནས་དགའ་བ་ཞིག་ཡོང་གི་འདུག བཤད་པ་གང་གནང་བ་ཐམས་ཅད་ཉམས་སུ་ལེན་པ་དཀའ་ཡང་། རང་ལ་ཆེད་དུ་གཉེར་ནས་གསུངས་པ་དེ་མ་བསྒྲུབ་ན་ཤིན་ཏུ་མི་མཉེས་པས་དེ་འདྲ་དེ་འདུལ་བའི་ཐབས་མེད། ལེགས་ཚོགས་ཐམས་ཅད་ཀྱི་རྟེན་འབྲེལ་བླ་མ་ལ་བརྟེན་ནས་འགྲིགས་དགོས་པས་རྗེ་བླ་མས་ལམ་གྱི་རྩ་བ་བཤེས་གཉེན་བསྟེན་ཚུལ་གསུངས་པ་ལ་ངེས་པ་རྙེད་པ་ཞིག་གལ་ཆེའོ།། ཞེས་ཀྱང་གསུངས་སོ།།</h3><h3> དམ་ཆོས་གདམས་པ་མཐའ་དག་རང་མྱོང་གིས།། སྐལ་ལྡན་གཞན་ལ་བརྩེ་བས་འདོམས་མཁས་པ།།</h3><h3> བཀའ་གདམས་མཁས་པའི་མཇུག་སྡུད་ཞང་སྟོན་རྗེ།། རྟོག་གེ་མགོ་མཁྲེགས་རྣམས་ཀྱིས་བསྒྲུན་དུ་མེད།། 2017/6/15ཉིན། </h3>