<h1><span style="color: rgb(22, 126, 251);"> དུས་ཚོད་ནི་བར་མེད་རྟག་ཏུ་འབབ་པའི་ཆུ་ཕྲན་ཞིག་རེད་ཨང་། ལང་ལོང་གི་རྦ་རླབས་མེད་པར་ཁུ་སིམ་སིམ་གྱི་ངང་ནས་བགྲང་ཆ་གསུམ་ཙམ་འདས་ཚར་འདུག། ཅི་ཚོར་འདི་ཚོར་མེད་པའི་ངང་ཁྱེད་ཚོ་སློབ་གྲྭ་ནས་ཐོན་པའི་དུས་ལ་སླེབས་འདུག ལོ་གསུམ་གྱི་རྔུལ་ཆུས་བརླན་པའི་ཕུགས་བསམ་གྱི་གཤིན་ས་དེར་འབྲས་བུ་བཏགས་ལ་ཉེ་འདུག ལག་རྩལ་གྱི་གཤོག་རྩལ་རྒྱས་པའི་སློབ་བུ་རྣམས་ནམ་འཕང་སྤྱོད་ལ་རན་སོང་། མ་བྲག་སྲིན་གྱི་མཛེས་སྡུག་རྒྱན་དུ་སྤྲས་ནས་ཕ་སྤྲེལ་རྒན་གྱི་སེམས་འདུན་རུམ་དུ་ཉར་ནས་མདུན་བསྐྱོད་བྱེད་རན་སོང་། དགེ་རྒན་གྱི་གདམས་ངག་དང་ཕ་མའི་བྱམས་བརྩེ་ལམ་རྒྱགས་བྱས་ནས་མདུན་བསྐྱོད་བྱེད་རན་སོང་། ལོ་གསུམ་གྱི་སློབ་སྦྱོང་གི་བརྒྱུད་རིམ་ཁྲོད་དུ་ཁྱེད་ཚོས་ང་ཚོ་དགེ་རྒན་ཚོའི་ལུས་སེམས་གཉིས་ལ་ངལ་བ་ཚད་མེད་གཏོང་མྱོང་ལ། སྤྲོ་སྣང་དང་བདེ་སྐྱིད་ཀྱང་མི་ཉུང་བ་ཞིག་སྦྱིན་བྱུང་། ལོ་གསུམ་འཚོ་བའི་བཞུར་རྒྱུན་དུ་ང་ཚོས་ཀྱང་ཁྱེད་ཚོར་གཤེ་གཤེ་དང་སྡིག་མོ། སྐབས་འགར་དབྱུག་པས་བརྡུངས་དགོས་ཀྱང་ཐུག་སོང་། འོན་ཀྱང་སྔར་སོང་གི་སྐྱིད་སྡུག་ཡོད་ཚད་ནི་དེ་རིང་ནས་བཟུང་ང་ཚོའི་སེམས་ནང་དུ་བསུབ་ཐབས་མེད་པའི་ལོ་ཟླ་ཞིག་ཏུ་གྱུར་ཟིན་ལ། མིག་ཆུ་དང་དགོད་སྒྲས་བྲིས་པའི་སྙན་ངག་རིང་མོ་ཞིག་ཀྱང་ཡིན།<br> ད་ལྟ་གྱེས་གདུང་གིས་མནར་བའི་ངའི་སློབ་མ་ཚོ། ལོ་གསུམ་གྱི་གོང་དུ་ང་ཚོ་ནི་ངོ་ཤེས་མེད་པའི་ལམ་འགྲོ་བ་ཀ་པ་དང་ཁ་པ་རེད། ལོ་གསུམ་གྱི་རྗེས་སུ་ང་ཚོ་ནི་སྐྱིད་སྡུག་མཉམ་མྱོང་བྱས་ནས་ཡོང་བའི་གྲོགས་པོ་དང་གྲོགས་མོ་རེད། དེ་རིང་ནས་ཁྱེད་ཚོ་སློབ་གྲྭ་ནས་ཐོན་ཟིན་ཀྱང་། ང་ཚོས་མིག་ཆུ་གཏོང་མི་ཉན། སྡུག་བསྔལ་བྱེད་མི་ཉན། རྒྱུ་མཚན་ནི་ཁྱེད་ཚོ་སློབ་གྲྭ་ནས་ཐོན་པ་ཙམ་ལས་དགེ་རྒན་ཚོའི་སེམས་ནས་ཐོན་མེད། གྲོགས་པོའི་ལ་རྒྱ་ལ་སློབ་ཐོན་མེད་ལ་གྲོགས་མོའི་མཛའ་བརྩེ་ལ་སློབ་ཐོན་ག་ནས་ཡོང་། དགེ་སློབ་ཀྱི་བརྩེ་སེམས་ལ་སློབ་ཐོན་དང་བར་ཐག་ནི་དེ་བས་ཅི།<br> ས་ཕྱོགས་གང་དུ་ཕྱིན་ཡང་ཁྱེད་ཚོའི་འགྲམ་དུ་ང་ཚོ་དགེ་རྒན་ཚོའི་སྨོན་ལམ་དང་རེ་བ་མངགས་ཡོད་ལ། ང་ཚོའི་གམ་དུ་ཁྱེད་ཚོའི་གཟུགས་བརྙན་དང་བརྩེ་སེམས་བཞག་ཡོད། དེས་ན་ང་ཚོ་ཁ་བྲལ་མེད་ལ་ང་ཚོའི་སེམས་ནི་ནམ་ཡང་མཉམ་དུ་འབྲེལ་ཡོད་པས་སྐྱོ་གདུང་བྱེད་མི་ཉན།<br> ང་ཚོའི་སྙིང་ནས་བརྩེ་བའི་སློབ་མ་རྣམས། ང་ཚོའི་སེམས་ནས་ཆད་པའི་ཕྲུ་གུ་ཚོ། ཁྱེད་ཚོ་ནི་ང་ཚོའི་སྤོབས་པ་ཡིན་པ་ཤེས་པར་གྱིས། ཁྱེད་ཚོ་ནི་མ་འོངས་གངས་ལྗོངས་ཀྱི་བདག་པོ་ཡིན་པ་ཤེས་པར་གྱིས། ཁྱེད་ཚོ་ནི་བོད་ཀྱི་ལག་རྩལ་ཐོན་ལས་རྒྱ་སྐྱེད་གཏོང་མཁན་གྱི་བྱེད་པོ་ཡིན་པར་ཤེས་པར་གྱིས།<br> ད་ནི་སྙིང་གཏམ་ཡོད་ཚད་སྨོན་ལམ་དུ་ཕབ་ནས་ད་ཐེངས་ཀྱི་མཐོ་རྒྱུགས་དང་ལས་རིགས་ལག་རྩལ་གྱི་ཡིག་རྒྱུགས་ནང་གཡུར་ཟའི་འབྲས་བཟང་ཐོབ་ཅིང་ཕུགས་འདུན་ཡོད་ཚད་མངོན་དུ་འགྱུར་བའི་བཀྲ་ཤིས་སྨོན་འདུན་ཞུ།།<br></span></h1><h1><span style="color: rgb(22, 126, 251);"> 2017ལོའི་ཟླ 6 ཚེས། 19 ཉིན།</span></h1><h1><span style="color: rgb(22, 126, 251);"><br></span></h1><h1><span style="color: rgb(22, 126, 251);"> དགེ་མིང་།. ཡོན་ཏན་ནས་ཕུལ།</span></h1><h1><span style="color: rgb(22, 126, 251);"><br></span></h1>