<h3><br></h3><div> ཉི་འོད་ལམ་ལམ། གྲང་འཁྱག་གི་དུས་ཚིགས་ཤིག་བརྒལ་ཆེད། ཁྱོད་ཀྱིས་དྲོད་ཁོལ་རུམ་གང་གི་ལེགས་སྐྱེས་བསྣམས་ཏེ། ངའི་མི་ཚེའི་སྒེའུ་ཁུང་ལས་དྲོད་ཀྱིས་འཛུམ་པ་ཁྱོད་ཁོ་ནའི་རེ་སྨོན་མིན་ལ། དྲོད་སྐྱིད་ཀྱི་གནས་མལ་གང་ལ་འཛུམ་མདངས་ཁོ་ནས་བསུ་མ་བྱེད་དགོས་པའང་ང་ཁོ་ནས་ལས་དབང་ག་ལ་ཡིན། ཁྱོད་ཀྱིས་སྤྲིན་དཀར་གྱི་འདབས་མར་བཏེགས་པའི་བརྩེ་འཕྲིན་དང་སྙིང་གཏམ་ཡོད་ཚད་ངའི་མཁའ་དབྱིངས་སུ་སྤུར་བ་མིན་ན། ངའི་སེམས་པའི་མཁའ་དབྱིངས་འདི་ནམ་ཡང་ཁྱོད་སར་ཕྱོགས་ཡོད། ཁྱོད་ཀྱིས་དགའ་དུངས་རྣལ་མའི་ཕྱི་ནང་རྟོགས་ན། བརྩེ་དུངས་དང་ཕུགས་བསམ་གྱི་བར་ནས་ལམ་ལ་ཆས་དང་། ངས་འུ་གཉིས་ཀྱི་སྨོན་འདུན་མ་ལུས་སྨྱུག་རྩེར་བཏེགས་ཡོད།</div><div> ཉི་འོད་ལམ་ལམ། ཁྱོད་ནི་ངའི་ནང་སེམས་ཀྱི་འཇིག་རྟེན་ཡིན་ལ། འཇིག་རྟེན་འདི་དྲོད་ཀྱིས་ཁེངས་དགོས་པའི་རྒྱུ་མཚན་ཞིག་ཀྱང་ཅི་ལ་མིན། གཏམ་རྒྱུད་ཅིག་དཔྱིད་འགོ་མའི་ཁ་བའི་དྭངས་གཙང་དང་ལྷན་དུ་ས་གཞིའི་པང་དང་གཙང་བོའི་འགྲམ་དུ་འཐོར། དེ་དུས། ངས་ནི་དཔྱིད་ཀ་འདི་ནི་འུ་གཉིས་ལ་དབང་བའི་འཇིག་རྟེན་རེད་བསམ་བྱུང་། གལ་ཏེ་ལས་དབང་གི་བགོ་སྐལ་མིན་ན། ང་ནམ་ཡང་ཁྱོད་ཀྱི་ལུས་ངག་ཡིད་གསུམ་ནས་དྭངས་གཙང་གིས་འཚོ་འདོད་ཨང་།</div><div> ཉི་འོད་ལམ་ལམ། ཁྱོད་རང་ངའི་ནང་སེམས་ནས་དཔྱིད་དཔལ་དུ་ཚེས་པ་ནས་བཟུང་། བསིལ་རླུང་འཇམ་པོར་འདྲེས་པའི་སེམས་གཏམ་དང་དགོད་སྒྲ་ཡོད་ཚད་ངས་ཁྱེད་ལ་ཕུལ་བའི་དུང་སེམས་ཀྱི་མཆོད་པ་ལོས་ཡིན།གལ་ཏེ་ལོ་ཟླའི་འགྲུལ་བཞུད་ཀྱིས་ང་ཚོ་ལ་གུ་ཡངས་གནང་སྲིད་པའི་དབང་དུ་བཏང་ན།ངའི་ལང་ཚོའི་མཛེས་པ་ཡོད་ཚད་ཁྱེད་ལ་ཕུལ་ཆོག་པའི་རྟག་བརྟན་གྱི་ལེགས་སྐྱེས་ཡིན་ན་བསམ།</div><div> ཉི་འོད་ལམ་ལམ། ཁྱོད་ནི་ངའི་རྨི་ལམ་ཡངས་བོའི་ཁ་དོག་ཡིན། སེམས་ཀྱི་མཐིལ་དུ་འཁྱིལ་བའི་འོད་ཀྱི་ཟེར་མ་རེ་རེ། ངའི་རྣམ་ཤེས་ཀྱི་རྒྱུད་སྐུད་དཀྲོལ་བའི་རོལ་དབྱངས་ཡིན། ཁྱོད་ཀྱིས་རྨི་ལམ་གྱི་མཛེས་པ་མཐོང་ན། རོལ་དབྱངས་དེའི་སྙན་པ་ཚོར་ན། འཚོ་བ་འདིའི་གྲུ་ཟུར་རེ་རེ་ནས་རེ་སྨོན་གྲངས་མེད་ཀྱི་མེ་ཏོག་གཏོར་དང་། ངས་འུ་གཉིས་ལ་སྐྱེད་ཚལ་ལྟ་བུའི་ཡིད་འོང་གི་འཇིག་རྟེན་ཞིག་ཡོད་ན་བསམ།</div>