<h3> གནའ་སྔ་མོ་ཞིག་ལ་འཛམ་གླིང་འདི་རུ་སྐྱེ་བོ་གཞན་ལས་ཁྱད་དུ་འཕགས་ཤིང་བློ་གྲོས་ཀྱི་རྩལ་ལ་འགྲན་ཟླ་མི་ནུས་པ། བྱང་ཁོག་ཐུགས་རྒྱ་ཡོངས་ཤིང་ཟབ་པའི་བཙན་པོ་ཞིག་གདོང་དམར་བོད་ལ་འཁྲུངས་པ་གོ་ཐོས་བྱུང་ལ། དེ་དུས་འཇིག་རྟེན་ཁམས་ལ་བོད་བཙན་པོའི་རྒྱལ་ཁབ་ཞེས་པ་ཞིག་གཞན་གྱི་ཐོས་ན་སྙིང་རྩ་འདར་བ་ཞིག མཐོང་ཆུང་དང་སྣང་མེད་དུ་གཏན་ནས་བཞག་ཐབས་བྲལ་བ་གོ་ལ་འདི་ལ་འཚོ་ཞིང་རྒྱས་པ་གནས་ཡོད་པ་ངས་དར་ལུང་རྣ་བ་རུ་ཐོས་ཤིང་ཡིད་ལ་འཇགས་ནས་ཡོད།<br /></h3><h3> དེ་རིང་བདག་ཉིད་གཅིག་པུ་སློབ་ཁང་གི་གྲུ་ཟུར་ཞིག་ལ་བསྡད་ནས་སྔོན་བྱོན་བཙན་པོ་གདུང་རྒྱུད་དག་གི་བྱས་རྗེས་དང་ཞུམ་པ་མེད་པའི་སྙིང་སྟོབས། ཉམས་ཐབས་བྲལ་བའི་སྤོབས་པ་དག་ལོ་རྒྱུས་སུ་ཕབ་པའི་བོད་གདོང་དམར་བཙན་པོའི་ལོ་རྒྱུས་ལ་ལྟ་བཞིན་ཡོད། སློབ་ཁང་འདི་རུ་ནམ་རྒྱུན་དང་མི་འདྲ་བའི་ལྷིང་འཇགས་ཀྱི་རྣམ་པ་ཞིག་གིས་ལྟེམས་ནས་ཡོད་ལ་སློབ་ཁང་གི་ཕྱི་རོལ་དུ་སྦྲང་ཆར་ཟིམ་ཟིམ་འབབ་བཞིན་འདུག འདི་ལྟ་བུ་ཁོར་ཡུག་ཞིག་རྙེད་པ་འདི་རིན་བྲལ་གྱི་ས་ལེ་སྦྲམ་རྙེད་པ་དང་མཚུངས་ལ་ངས་ཀྱང་ཁོར་ཡུག་འདི་འདྲ་ཞིག་ལ་རེ་སྙེགས་བྱས་ནས་ཡུན་རིང་སྒུག་པ་ཡིན། མ་གཞི་ བདག་ནི་ཁོར་ཡུག་འདི་འདྲ་ལ་ཧ་ཅང་དགའ་ཞིང་དུང་། རྒྱུ་མཚན་དེའི་རྐྱེན་གྱིས་དེ་རིང་ལྟོགས་པས་ཟ་ཐོབ་དང་སྐོམ་པས་ཆུ་ཐོབ་ལྟ་བུ་དམ་འཛིན་བྱས་ནས་དུས་ཚོད་ཐུང་ངུ་འདི་ལ་བཙན་པོའི་རྒྱལ་ཁབ་ཀྱི་ལོ་རྒྱུས་ལ་བློ་དལ་མོ་སྒོ་ནས་ཐེངས་གཅིག་ལ་ལྟ་ཀློག་བྱས་པ་ཡིན།</h3><h3> དགུང་ལོ་བཅུ་གསུམ་དུས་ནས་རྒྱལ་སྲིད་ཁྲི་ལ་མངལ་གསོལ་ནས་བློན་པོ་བློས་ཐུབ་དག་ལ་མནའ་ཡ་བཙུངས་ནས་ཟང་ཟིང་ལོང་བཞིན་པའི་སྲིད་ཁྲིམས་ཞིག་ལ་སླར་ཡང་སྲ་བརྟན་བྲག་ལས་བརྟན་པ་བྱས། བཙན་པོའི་རྒྱལ་ཁབ་འདི་ལ་གཞན་ལ་ངོམ་ཆོག་པ་དང་ངོ་གནོང་མི་དགོས་པའི་མི་རིགས་རང་དང་འོས་ཤིང་འཚམ་པའི་སྐད་ཡིག་གཉིས་འཛམ་གླིང་འདི་ནས་མཚར་སྡུག་འོད་སྟོང་འབར་བའི་གཞན་དག་གི་མིག་ལ་ཚ་ཞིང་སྙིང་ན་དགོས་པའི་ངང་ནས་གསར་གཏོད་ཀྱི་གཟི་འོད་སྦྱིན། བཙན་པོ་ཁྱེད་ཉིད་གནས་པས་ང་ཚོ་ཡིས་མུན་ནག་གི་འཚོ་བ་ཞིག་ལ་ཨུ་ཁྱུད་བྲིས། མེས་པའི་བྱས་རྗེས་རྒྱུན་འཁྱོངས་བྱས་ནས་གོ་ལ་ཟླུམ་པོ་འདི་ནི་སུམ་གཉིས་བདག་འཛིན་བྱས། དེ་དུས་སྟོབས་འབྱོར་མངལ་ཐང་དར་ཞིང་གཞན་གྱི་ཡིད་སྨཅན་དང་ཕྲག་དོག་བྱེད་སའི་གནས་སུ་གྱུར་ཡོད། བཙན་པའི་སྙིང་རྩ་ལགས། ཁྱེད་ཉིད་གནས་པའི་དུས་སྐབས་འདི་ལ་ང་ཚོས་རང་གི་མགོ་བོ་མཐོ་རུ་པཏེབས་ནས་གོམ་སྟོབས་མྱུར་མོས་གནས་ གང་དགའ་བགྲོད་པ་མྱུང་། འོན་ཀྱང་དེ་ནི་འདས་ཟིན་པའི་སྔོན་ཆད་ཡིན་པས་བདག་གི་དངོས་སུ་མྱོང་མཐོང་མ་བྱུང་བའི་འགྱོད་པ་དྲག་པོ་ཞིག་གིས་བྱང་ཁོག་གི་གནས་ཤིག་ནས་གདུང་འདར་བྱུང་། མཚམས་དེ་དུས་ངའི་ཟུངས་ཁྲག་དྲོས་ནས་སྙིང་ལ་སྔར་ཡོད་མ་མྱུང་བའི་དཔའ་སྟོབས་ཤིག་རྒྱས་ཀྱང་ཡོད། ད་དུང་མུ་མཐུད་དུ་ལྟ་འདོད་ཀྱང་དུས་ཚོད་ཀྱི་འདས་པ་དང་བསྟུན་ནས་ལྟ་ཁོམ་མེད་པར་མཚམས་བཞག་དགོས་བྱུང་། སློབ་ཁང་འདི་རུ་སྔ་མོ་ནས་ཐང་ཚར་ནས་སྲིད་པའི་སྒྲོན་མེ་ཚ་རྔུབ་དང་བཅས་ནས་འཛིན་མ་ཡོངས་ལ་འཕྲོས་ནས་སྒེའུ་ཁུང་གི་ཤེལ་སྒོ་རྒྱུད་ནས་ངའི་འདིག་གནས་སུ་ཤར་འདུག ད་ནི་སླར་ཡང་བཙན་འཛུལ་བྱས་པ་ལྟ་བུ་སློབ་ཁྲིད་ལ་ཞུགས་དགོས་པའི་རྟགས་མཚན་རེད། ངས་སྔོན་བྱོན་བཙན་པོ་དག་གི་ཤུལ་རྗེས་ལ་ལྟ་ཞོར་འདྲེན་བྱེད་མིག་ཟུང་ལས་རང་དབང་མེད་པའི་མིག་ཆུ་བཞུར་སོང་། ངའི་མིག་ཆུ་དེ་སྤྱིར་བཏང་དུ་བཞུར་བ་ག་ལ་ཡིན་སྲིད། དེ་ནི་མི་རིགས་ཤིག་འདི་ལྟར་གནས་བབ་ཞིག་ལ་ལྷུང་ཞིང་རང་དབང་མེད་པའི་ལྐོག་གྱུར་གྱི་བདེ་སྐྱིད་ལ་སེམས་པའི་འཚོ་བ་ལ་སྒྱིད་ལུག་ཏུ་བརྟེན་ནས་མི་ཚེ་བསྐྱལ་བ་ལ་གདུང་བའི་མིག་ཆུ་ཤོར་སོང་། ད་དུང་གྲག་འགུལ་ཅི་ཡང་མེད་པའི་གཞན་གྱི་ལག་འོག་ ནས་དལ་འབྱོར་བཅོ་བརྒྱད་ལྡན་པའི་འབྱུང་བཞི་ཡི་གྲུབ་པའི་ལུས་ཕུང་འདི་གཞན་གྱི་བཀོལ་སྤྱོད་བྱས་པ་ལ་མིག་ཆུ་བཞུར་སོང་། རང་ཉིད་ལ་དུང་བ་དང་ཞེན་པ་ཡོད་ཀྱང་ཕྱི་རུ་མངོན་ཐབས་བྲལ་བའི་ཁ་ལྕེ་ལ་དཀག་འགོག་བྱས་པ་ལ་མིག་ཆུ་བཞུར་སོང་། ཡོད་ཚད་སེམས་ཀྱི་འཆར་སྣང་ལས་ལག་ལེན་དུ་བསྟར་ནུས་པའི་་སྡར་མ་ཇི་བཞིན་ཉམས་ཐག་གྱུར་པ་ལ་མིག་ཆུ་བཞུར་སོང་། ངའི་མིག་ཆུ་་ཐིགས་པ་རེ་རེ་ངོ་གདོང་རྒྱུད་ནས་ཟགས་སོང་། གང་ལྟར་ཀྱང་ང་ལ་མིག་ཆུ་བཞུར་བ་མ་གཏོགས་ཅི་ཡང་ཡོད་མ་བྱུང་། ཡོད་ཀྱང་ག་ལ་ཕོད། གནས་ཚུལ་འདི་འདྲ་ཞིག་ནས་ག་ལ་ཡོད་སྤོབས་སམ། ཐ་ན་རང་ཉིད་ཀྱི་ཁྱིམ་གཞི་ལྟ་བུ་རྒྱལ་ཁབ་སིལ་བུར་འཐོར་ཚར་བས་ཁྱོད་ལ་སུ་ཞིག་གི་རྒྱབ་སྐྱོར་དང་རོགས་རམ་བྱ་སྲིད། གཅིག་ཀྱང་གནས་མི་སྲིད། ཐམས་ཆད་རང་ཉིད་གཅིག་པུ་བསམ་ནས་འཚོ་བ་རོལ་བཞིན་ཡོད་པས་སུ་ཞིག་གི་དེ་དག་ལ་དོགས་སྣང་བྱ་སྲིད་དམ།</h3><h3> དེ་རིང་ངའི་སེམས་ཁམས་འདི་མངར་སྐྱུར་འདྲེས་པའི་བྲོབ་ཞིག་གིས་ལྗིད་ཏིག་ཏིག་དང་སྐྱོ་ལྷང་ལྷང་གྱུར་སོང་།མཚར་སྡུག་གི་རྟ་བདུན་དབང་པོ་ལགས། ཁྱེད་ཉིད་ཅི་ཕྱིར་ཚ་ རྔུབ་དང་བཅས་ནས་འཕྲོས་ཡོང་། ཅི་ཕྱིར་དུ་འཕྲོས་པ་ཡིན། གལ་ཏེ་ཁྱེད་ཉིད་ལྟ་བུ་ཚ་རྔུབ་ཀྱིས་ཉམས་རྒུད་ཚབས་ཆེན་འཐེབས་པའི་སེམས་ཁམས་འདི་སྡོད་ཟུག་མེད་པའི་ཚ་བའི་འཕར་འཚུབ་ཐོབ་ན་ངས་དེ་ལྟར་བྱེད་པ་མོས་མཐུན་བྱེད། ཤོར་ཟིན་པ་དང་ཉམས་ཟིན་པའི་ཁོར་ཡུག་འདི་ན་དེ་ལྟ་བུ་ཚ་རྔུབ་ཀྱི་སྲེག་པའི་འཕག་འཚག་ཅིག་ཅིས་ཀྱང་དགོས་འདུག འོན་ཀྱང་འདི་དག་ཡོད་ཚད་འཆར་ཡན་གྱི་རྣམ་པ་ལས་མངོན་ཡོད་ཀྱི་གནས་ཚུལ་དུ་འགྱུར་མི་སྲིད། གཏན་ནས་འགྱུར་མི་སྲིད། འདི་ནི་ངའི་ཐོལ་བྱུང་གི་སེམས་ཁམས་ཞིང་གི་ཚུལ་དུ་བྲིས་པ་ཡིན།</h3>