<h3><br /></h3><h3> </h3><h3> </h3><h3> --དབལ༒བཙན་སྨྱུག</h3><h3><br /></h3><h3> ཡར་ལྟས་ལ་ཁའི་རྩེ་ལ།།</h3><h3> སྨུག་སྤྲིན་ལང་ལོང་འཁྲིག་འདུག།</h3><h3> རབ་རིབ་སྨུག་རྫའི་འོག་ན།།</h3><h3> ཡིད་མཐུན་རོགས་ལོ་ཨེ་ཡོད།།</h3><h3> </h3><h3><br /></h3><h3> དགུང་ཁའི་ཉི་མ་སེར་པོ།།<br /></h3><h3> ཡུད་ཙམ་ལ་མོ་མ་བརྒལ།།</h3><h3> མི་ཡུལ་གྲོང་ནས་བོར་བའི།།</h3><h3> བྱམས་པ་ད་དུང་རྙེད་མེད།།</h3><h3> </h3><h3>རི་རྩེའི་དར་ལྕོག་ཚོམ་བུ།།</h3><h3>བསིལ་འཇམ་རླུང་བུས་གཡུག་ཚེ།།</h3><h3>ན་མཉམ་བུ་མོའི་ལང་ཚོ།།</h3><h3>ཡ་ཆུང་སེམས་ལ་འཆར་བྱུང་།།</h3><h3><br /></h3><h3>གཤོག་རྩལ་རྒྱས་པའི་གླག་ཕྲུག།</h3><h3>ཨ་སྔོན་དབྱིངས་སུ་བཏེགས་ཚེ།།</h3><h3>ཞེ་སེམས་མཐུན་པའི་རོགས་ལོ།།</h3><h3>གང་དུ་ཡོད་ཙམ་གཟིགས་རོགས།།</h3><h3><br /></h3><h3>འཇིག་རྟེན་མི་ཡུལ་གྲོང་ནས།།</h3><h3>ཅི་བསམ་འགྲུབ་རྒྱུ་དཀའ་ཡང་།།</h3><h3>ཁྲ་ཆུང་མིག་ཟུང་དཀྱིལ་དུ།།</h3><h3>བུ་མོའི་མཛེས་ཞལ་དཔར་བཞག།</h3><h3><br /></h3><h3>ནས་ཆང་བདུད་རྩི་མངར་མོས།།</h3><h3>ཡིད་སེམས་བཟི་བར་མ་ནུས།།</h3><h3>བཅོས་མིན་འཛུམ་མདངས་ཤིག་གིས།།</h3><h3>སེམས་པའི་གཏིང་འོག་བརྗེས་སོང་།།</h3><h3><br /></h3><h3>བཟུང་བའི་ཤེས་བྱའི་མན་ངག།།</h3><h3>བློ་རུ་འཆར་རྒྱུ་མི་འདུག།</h3><h3>མ་བཟུང་བྱམས་པའི་ཞལ་རས།།</h3><h3>ཡིད་ལ་འཁོར་ཐེངས་མང་སོང་།</h3><h3><br /></h3><h3>བཅོ་ལྔའི་དུང་ཟླ་དཀར་པོ།།</h3><h3>ཡིད་ལ་མཛེས་རྒྱུ་མི་འདུག།</h3><h3>མཐོང་རྒྱུ་དཀོན་པའི་ཞལ་རས།།</h3><h3>སེམས་ཀྱི་དྭངས་བཅུད་ངོ་མ།།</h3><h3><br /></h3><h3>དྲིན་ཆེན་ཕ་མའི་ཁ་ཏ།།</h3><h3>རྣ་རྒྱབ་རླུང་བུའི་ངང་ཚུལ།།</h3><h3>བུ་མོའི་སྙིང་གཏམ་ཐུང་ཐུང་།།</h3><h3>ཐོས་འཛིན་རྣ་བའི་བུ་རམ།།</h3><h3><br /></h3><h3>ཁ་སང་བརྩེ་བའི་ལྷག་མ།།</h3><h3>དེ་རིང་སེམས་སུ་བཞག་ཡོད།།</h3><h3>སང་ཉིན་མཉམ་འཛོམས་དུས་ལ།།</h3><h3>རེ་མིག་ད་ནས་གྱེར་ཡོད།།</h3><h3><br /></h3><h3>ལས་དབང་རླུང་བུའི་འགྲོས་ལ།།</h3><h3>བསམ་ཤེས་ཅུང་ཙམ་ཡོད་ན།།</h3><h3>ཁ་ཐག་རིང་བའི་བུ་མོར།།</h3><h3>འཕྲད་པའི་དུས་ཤིག་གནང་རོགས།།</h3><h3><br /></h3><h3>དར་འབབ་བུ་མོའི་ལང་ཚོ།།</h3><h3>བཅུད་ལྡན་ཁམ་བུའི་རང་བཞིན།།</h3><h3>ཐེངས་གཅིག་ཟོས་པ་ཙམ་གྱིས།།</h3><h3>སྐམ་གདུང་ག་ལ་སེལ་སྲིད།།</h3><h3><br /></h3><h3>སྨིན་ལེགས་བུ་མོ་ཁྱོད་ལ།།</h3><h3>གཏན་ཚིག་དམ་བཅའ་ཡོད་ན།།</h3><h3>སྙིང་གཏམ་གང་སར་མ་བཤད།།</h3><h3>མི་ཚོགས་ཁ་ནས་ཁྱབ་འགྲོ།</h3><h3><br /></h3><h3>ལྷན་འཛོམས་བུ་མོའི་མིག་ཟུང་།།</h3><h3>མཐོང་རྒྱུ་ཡོད་པ་སྤྲོ་ཡང་།།</h3><h3>བྲལ་རྗེས་སེམས་ཀྱི་ན་ཟུག།</h3><h3>དྲན་ན་འཇིགས་ཀྱི་གཞི་མ།།</h3><h3><br /></h3><h3>ཐོག་མའི་ཞལ་འཛོམས་མེད་ན།།</h3><h3>མཐའ་མའི་རྨ་ཁ་མི་དགོས།།</h3><h3>མཐའ་མའི་འབྲལ་བ་མེད་ན།།</h3><h3>ཐོག་མའི་བརྩེ་བ་ལོས་དགོས།།</h3><h3><br /></h3><h3>ཕང་ཕུང་སྤྲིན་དཀར་འདབ་མ།།</h3><h3>ཨ་སྔོན་དབྱིངས་ཀྱི་མཛེས་རྒྱན།།</h3><h3>སྙིང་སྡུག་བུ་མོའི་བརྩེ་བ།།</h3><h3>མདུན་བསྐྱོད་གོམ་ཁའི་ངར་སྒྲ།</h3><h3><br /></h3><h3>གཟུར་མེད་འཆི་བའི་དུས་ལ།།</h3><h3>དེ་ཙམ་འཇིགས་རྒྱུ་མི་འདུག།</h3><h3>དུང་སེམས་དུས་ལ་འཐིམས་ན།།</h3><h3>བྲང་ཁའི་དབུགས་རྒྱུན་རིང་ངེས་།།</h3><h3><br /></h3><h3>སྐྱེ་འཆི་སྔོན་གྱི་སྐོས་བཞག།</h3><h3>དོན་ལ་སྙིང་བོ་མེད་ཀྱང་།།</h3><h3>བརྩེ་བའི་འདུ་འཛོམས་བྱུང་ཚེ།།</h3><h3>འཆི་མེད་བདུད་རྩི་གནང་རོགས།།</h3><h3><br /></h3><h3>ཉིན་རེའི་ས་སྲོད་རེ་ལ།།</h3><h3>མིག་རྒྱང་མཁའ་རུ་འཕངས་ནས།།</h3><h3>སྙིང་སྡུག་དུང་སེམས་ཅན་པོར།།</h3><h3>ཞལ་འཛོམས་བྱུང་ན་བསམ་བྱུང་།།</h3><h3><br /></h3><h3>མི་རྟག་འཁོར་བའི་གྲོང་དུ།།</h3><h3>དོན་མེད་འཆི་ན་སྐྱོ་བ།།</h3><h3>དུང་སེམས་རུམ་ཁའི་འོག་ནས།།</h3><h3>མི་ཚེ་རྫོགས་ཀྱང་ཅི་འགྱོད།།</h3><h3><br /></h3><h3>ནམ་མཁའི་སྤྲིན་ཕུང་ཞིག་ལ།།</h3><h3>སྙིང་གཏམ་ཚིག་གསུམ་བསྐུར་ཡོད།།</h3><h3>བསིལ་རླུང་ཡར་འགྲོ་གདའ་ན།།</h3><h3>བདེ་མིན་གཏམ་ཞིག་ཐོངས་ཤོག།</h3><h3><br /></h3><h3>བསིལ་འཇམ་རླུང་བུ་ཞིག་ལ།།</h3><h3>གསང་བའི་གཏམ་ཞིག་བཅོལ་ཡོད།།</h3><h3>གནམ་ལ་འགྱུར་བ་མེད་ན།།</h3><h3>མི་འགོར་ཁྱོད་ཀྱིས་ཐོས་སྲིད།།</h3><h3><br /></h3><h3>སློབ་གྲྭའི་འཁོར་ཡུག་ཆུང་ཆུང་།།</h3><h3>ལྷིང་འཇགས་ངང་དུ་འཐིམས་ཀྱང་།།</h3><h3>ཡ་ཁོག་སེམས་ཀྱི་འཇིག་རྟེན།།</h3><h3>ཅི་ཙམ་བདེ་ལ་མ་འཁོད།།</h3><h3><br /></h3><h3>དུང་སེམས་འདྲེས་པའི་བུ་མོ།།</h3><h3>ས་ཐག་རིང་པོས་སྐལ་ཡང་།།</h3><h3>བརྩེ་བའི་སེམས་ཆུང་ཁྲ་མོ།།</h3><h3>མི་འབྲལ་ཁྱོད་དང་མཉམ་འགྲོགས།།</h3><h3><br /></h3><h3>ལྷབ་ལྷུབ་ཁ་བའི་དཔུང་ཚོགས།།</h3><h3>ས་གཞི་ཡོངས་མོའི་གོད་ཆགས།།</h3><h3>ལྷུང་ལྷུང་མིག་ཆུའི་ཐིགས་པ།།</h3><h3>གཡུ་ཆུང་སྙིང་ལོའི་འཕར་སྒྲ།</h3><h3><br /></h3><h3>ཉི་མ་ནུབ་ནས་བཞུད་སོང་།།</h3><h3>ཟླ་བ་ཤར་ནས་འཆར་སོང་།།</h3><h3>མ་མཐོང་བྱམས་པའི་ཞལ་རས།།</h3><h3>ཅི་ཙམ་སྒུག་ཀྱང་མི་ཡོང་།།</h3><h3><br /></h3><h3>ཆུ་མོའི་དར་ཁ་མཐུག་སོང་།།</h3><h3>ཉ་མོའི་སེམས་པ་སྐྱོ་སོང་།།</h3><h3>སྙིང་སྡུག་རྒྱང་དུ་ཆས་སོང་།།</h3><h3>བུ་ཆུང་སེམས་པ་སྐྱོ་སོང་།།</h3><h3><br /></h3><h3>ཕུ་ནས་གྱོད་གཞི་རྩོད་སྐད།།</h3><h3>མདའ་ནས་ནང་དམེ་བྱས་རབས།།</h3><h3>འོན་ཀྱང་བྱམས་པའི་གནས་ཚུལ།།</h3><h3>ཐོས་འདོད་རྣ་ལ་མ་ཡོང་།།</h3><h3><br /></h3><h3>ས་ཐག་རིང་བའི་ཁྱོད་ལ།།</h3><h3>འགྱུར་བའི་བསམ་པ་མེད་ན།།</h3><h3>བརྩེ་བའི་མུ་ཏིག་ཕྲེང་བ།།</h3><h3>ཚེ་གཅིག་མགུལ་གྱི་རྒྱན་ཡིན།།</h3><h3><br /></h3><h3>ཉུང་ཉུང་ཚིག་གི་ཉོག་གཏམ།།</h3><h3>པིར་རྩེའི་མགོ་ནས་རྫོགས་ཀྱང་།།</h3><h3>མང་མང་སེམས་ཀྱི་སྙིང་གཏམ།།</h3><h3>སེམས་པའི་གཏིང་ལ་མཆིས་ཡོད།།</h3><h3><br /></h3><h3 style="text-align: right;"> ༢༠༡༧.༣.༡༣--༣.༡༨ བར།</h3>