<h1>བརྩོན་ལྡན་སློབ་བུ་ཚོར་ཕུལ་བའི་འབེལ་གཏམ།</h1><h1><br /></h1><h1> འོད་འཚོལ་བ།</h1><h1><br /></h1><h1>སྣ་ཚོགས་འཕྲུལ་འཁོར་གློག་གི་སྒྲོན་འོད་ཀྱི་འཇིག་རྟེན།།</h1><h1>རབ་ལེགས་ཁང་བརྩེགས་གནམ་འདེགས་ཀ་བ་ཡི་རྟེན་གཞི།།</h1><h1>གཅིག་ལས་གཅིག་མཐོ་གནའ་མཁར་ཟི་ལུང་གི་གྲོང་ནས།།</h1><h1>བརྩོན་ལྡན་སློབ་བུར་གདམས་པའི་འབེལ་གཏམ་འདི་ཤོར་བྱུང་།།</h1><h1><br /></h1><h1>ལས་བསྐལ་དུས་ཀྱི་བྱ་བ་འཇའ་ཚོན་གྱི་རི་མོ།།</h1><h1>ལྷན་འཛོམས་མ་ཡུམ་སློབ་གྲྭའི་ནམ་མཁའ་ནས་བྲལ་ཡང་།།</h1><h1>མི་འགྱངས་འཛོམས་པའི་རྟེན་འབྲེལ་གཡུང་དྲུང་གི་རི་མོ།།</h1><h1>སེམས་པའི་མེ་ལོང་ལྡེབས་སུ་གསལ་གསལ་དུ་ཡོང་ངེས།།</h1><h1><br /></h1><h1>དགེ་ལེགས་དགེ་བའི་ལམ་སྟོན་དགེ་རྒན་ཚོའི་བཀའ་དྲིན།།</h1><h1>མ་དོར་མ་ལུས་སྙིང་དབུས་པད་ཚལ་དུ་འཆིང་ནས།།</h1><h1>སློབ་བརྩོན་སློབ་མའི་ལས་ཀར་དུས་རྟག་ཏུ་གཞོལ་ཞོར།།</h1><h1>བདེ་སྐྱིད་བདེ་དགེའི་དཔལ་ན་སློབ་བུ་ཚོ་བདེ་མོ།།</h1><h1><br /></h1><h1>ས་སྟེང་མི་ལུས་བླངས་པའི་དོན་སྒོ་ནི་ཆེན་པོ།།</h1><h1>རིག་པའི་འོ་མཚོ་གཞིབས་པའི་གཏན་འདུན་གྱི་ཕུགས་འབྲས།།</h1><h1>སྣོད་གསུམ་སྐྱོན་གྱིས་མ་གོས་ལྷུན་འགྲུབ་དུ་གདའ་ན།།</h1><h1>མི་ཁ་མི་ཡིས་བཀུར་བའི་གཏན་ཚིགས་དེ་རྨད་བྱུང་།།</h1><h1><br /></h1><h1>བཤད་བཤད་དོན་གྱི་ཁ་ཏ་ཞིམ་མངར་གྱི་འོ་མ།།</h1><h1>བློ་གྲོས་ལུས་ཟུངས་རྒྱས་པའི་འཚོ་བཅུད་དུ་རྫོགས་ནས།།</h1><h1>སློབ་བྱོལ་ཕྱི་འགྱངས་མེད་པའི་འབྲས་བུ་རུ་གྱུར་ན།།</h1><h1>ཁ་བརྡ་ཁ་ནས་ཤོར་བར་རིན་ཐང་ནི་ལྡན་ནོ།།</h1><h1><br /></h1><h1>རང་བློ་རིག་པའི་མེ་ཏོག་ལྷུག་ལྷུག་ཏུ་རྒོད་པར།།</h1><h1>མཐུན་སྒྲིལ་རྡོག་རྩ་དམ་པོའི་འཆིང་ཞགས་དེ་མ་ལྷོད།།</h1><h1>སློབ་བརྩོན་བུང་བའི་གཤོག་གླུ་ལྷང་ལྷང་དུ་གྲགས་ན།།</h1><h1>ཕ་གཏམ་བུ་ལ་བཞག་པའི་ལོ་རྒྱུས་དེ་ཡག་པ།།</h1><h1><br /></h1><h1>བུ་རབ་ཚིག་གཅིག་རྟ་བཟང་ལྕག་གཅིག་གི་ལེགས་བཤད།།</h1><h1>ལྕགས་དབྱུག་ཁབ་ཀྱི་བརྩོན་འགྲུས་སེམས་ཁོང་ལ་བཟུང་སྟེ།།</h1><h1>ཤེས་རིག་ཡོན་ཏན་དགོས་པའི་གོ་རྟོགས་དེ་ཐོབ་ན།།</h1><h1>དུས་རབས་ཉེར་གཅིག་བསུ་བའི་ལག་རྗེས་ཀྱི་དྭངས་མ།།</h1><h1><br /></h1><h1>ཆེ་བཀུར་ཆུང་བྱམས་ཡ་རབས་གུས་སྲོལ་གྱི་ལམ་བཟང་།།</h1><h1>ཕན་ཚུན་བརྩི་འཇོག་སློབ་གྲྭའི་སློབ་མ་ཡི་སྒྲིག་ལམ།།</h1><h1>དཀའ་སྤྱད་སྡུག་རུས་སློབ་བརྩོན་འབྲས་བུ་ཡི་རེ་བ།།</h1><h1>ལེགས་པར་ཡིད་ལ་ཟུངས་ཤིག་བློ་གསལ་གྱི་ཁྱུ་ཚོགས།།</h1><h1><br /></h1><h1>བརྡ་འཕྲིན་རིག་པའི་དབལ་ཁ་ཉིན་རེ་ལས་ཇེ་རྣོ།།</h1><h1>ཤེས་རིག་ཡོན་ཏན་རིན་ཆེན་གསེར་དངུལ་ལས་ལྷག་པ།།</h1><h1>བློ་གྲོས་རིག་པའི་རྩལ་ལ་ད་ལྟ་ནས་དྲངས་ཏེ།།</h1><h1>རང་སེམས་རྨོངས་མུན་འཐིབས་པའི་དོང་ཞབས་དེར་མ་ལྕེབས།།</h1><h1><br /></h1><h1>གཞན་སྤྱོད་བྱ་བ་བཟང་བོ་མིག་དཔེ་ཡི་གཞི་མ།།</h1><h1>རང་སྐྱོན་དྲི་ངན་སེལ་བའི་ཐབས་ལམ་ལ་དགོངས་ཏེ།།</h1><h1>གུས་རྟག་བརྩོན་པ་བརྟན་པོས་སློབ་སྦྱོང་ལ་འབུངས་དང་།།</h1><h1>བསམ་དོན་རེ་བའི་ཉི་མ་སྙིང་དབུས་སུ་འཆར་རོ།།</h1><h1> ༢༠༠༥-༡༠-༢༦ཉིན།</h1><br /><br /><br /><br /><h3><br /></h3>