<h3 style="text-align: center;">ཡུལ་མདོ་སྨད་ལྷོ་རྒྱུད་འཛིན་མའི་རྒྱན།།</h3><h3 style="text-align: center;">མགོན་མི་འཁྲུག་རྒྱལ་བ་བཞད་པའི་ཞིང་།།</h3><h3 style="text-align: center;">ཆོས་མདོ་སྔགས་བཤད་སྒྲུབ་འབྱུང་བའི་སྡེ།། </h3><h3 style="text-align: center;">དཔལ་བླ་བྲང་བཀྲ་ཤིས་འཁྱིལ་བ་དྲན།། </h3><h3 style="text-align: center;"><br /></h3><h3 style="text-align: center;">ལམ་བསླབ་གསུམ་ཏིང་འཛིན་སྒོམ་གྱིས་སྒྲུབ།།</h3><h3 style="text-align: center;">ལུང་སྡེ་སྣོད་འཆད་ཉན་རིགས་པས་རྩོད།།</h3><h3 style="text-align: center;">འཁོར་བུ་སློབ་བྱམས་བརྩེ་འཛུམ་གྱིས་བསྐྱངས།།</h3><h3 style="text-align: center;">མགོན་བཤེས་གཉེན་སྐུ་དྲིན་ཆེ་རྣམས་དྲན།།</h3><h3 style="text-align: center;"><br /></h3><h3 style="text-align: center;">དུས་ད་ལྟ་འཇིག་རྟེན་འདུ་འཛིའི་ཁྲོད།།<br /></h3><h3 style="text-align: center;">ང་བློས་ཐུབ་གྲོགས་མེད་གཅིག་བུར་འཁྱམ།།</h3><h3 style="text-align: center;">སེམས་དམུ་རྒོད་ཁ་ལོ་གཅུན་པར་དཀའ།།</h3><h3 style="text-align: center;">སྒོས་ཉོན་མོངས་བག་ཆགས་མཐུ་དཔུང་བཙན།།</h3> <h3 style="text-align: center;">མཐོ་བླ་མས་དཔལ་འབྱོར་དབང་ཐང་རྩོད།།</h3><h3 style="text-align: center;">ཆོས་རྨོངས་དད་ཕྱོགས་རིས་གདོན་གྱིས་བརླམས།།</h3><h3 style="text-align: center;">བླུན་ནོར་རྐྱལ་ཐོགས་པའི་དཔོན་ཐོབ་བཟུང་།།</h3><h3 style="text-align: center;">ལས་དྲང་བདེན་མི་གཙོ་གཡོ་སྒྱུ་བྲིན།།</h3><h3 style="text-align: center;"><br /></h3><h3 style="text-align: center;">ངས་ལན་རེར་དད་པས་དག་སྣང་སྦྱངས།།</h3><h3 style="text-align: center;">ངས་ལན་རེར་ལས་ངན་འབྲས་བུར་སྒོམ།།</h3><h3 style="text-align: center;">ལན་མང་བོར་ཁ་ཡག་ངོ་དགའ་བྱས།།</h3><h3 style="text-align: center;">དུས་རྒྱུན་པར་ཤེས་རབ་ཐབས་ཀྱིས་བསྐྱངས།།</h3><h3 style="text-align: center;"><br /></h3><h3 style="text-align: center;">ང་ལན་རེར་ཡིད་ཆད་བློ་ཕམ་བྱུང་།།</h3><h3 style="text-align: center;">ངས་ལན་རེར་སྙིང་སྟོབས་སྤོབས་པ་བསྐྱེད།།</h3><h3 style="text-align: center;">དུས་རྒྱུན་པར་བླ་མ་བཤེས་གཉེན་རྣམས།།</h3><h3 style="text-align: center;">གསུང་ཡིད་ལ་དྲན་ནས་གསོལ་འདེབས་བྱས།།</h3><h3 style="text-align: center;"></h3><h3><br /></h3> <h3 style="text-align: center;">ཚེ་མི་རྟག་ནམ་མཁའི་གློག་བཞིན་བསམ།།<br /></h3><h3 style="text-align: center;">སྡིག་འཁོར་བའི་གནས་ལ་ཞེན་པ་བསྟུངས།།</h3><h3 style="text-align: center;">སྒོས་བྱང་ཆུབ་སེམས་དང་བསྡུ་བཞི་བསླབ།།</h3><h3 style="text-align: center;">དགེ་གང་བྱས་དོན་གཉིས་འགྲུབ་པར་བསྔོས།།</h3><h3 style="text-align: center;"><br /></h3><h3 style="text-align: center;">གཞུང་བཀའ་པོད་ཐོས་བསམ་བརྩོན་པས་སྦྱངས།། </h3><h3 style="text-align: center;">ལམ་ཉམས་ལེན་ལྟ་བ་རྒྱུད་ལ་སྦྱར།།</h3><h3 style="text-align: center;">སྔགས་རྒྱུད་སྡེའི་དབང་ལུང་མན་ངག་དེ།།</h3><h3 style="text-align: center;">སེམས་འོད་གསལ་འཆར་བའི་གྲོགས་སུ་བསྟེན།།</h3><h3 style="text-align: center;"><br /></h3><h3 style="text-align: center;">ཕྱི་སྣོད་བཅུད་སྤྲོས་པ་སེམས་སུ་སྡུད།། </h3><h3 style="text-align: center;">ནང་སེམས་ཉིད་རྗེས་གཞིག་བསམ་གཏན་སྒོམ།།</h3><h3 style="text-align: center;">བསམ་མི་ཁྱབ་ཕྱག་རྒྱའི་ཀློང་ཡངས་ན།།</h3><h3 style="text-align: center;">སྟོང་བདེ་ཆེན་སྒྱུ་མའི་རོལ་པ་འཛིན།།</h3><h3><br /></h3> <h3 style="text-align: center;">རྣོ་ཤེས་རབ་རལ་གྲི་འབར་བ་ལ།། </h3><h3 style="text-align: center;">སྟོབས་བསོད་ནམས་རྡོ་རྗེའི་ཡུ་བ་བརྟན།། </h3><h3 style="text-align: center;">དགྲ་ཉོན་མོངས་མཁར་སྒོ་བཙན་ན་ཡང་།། </h3><h3 style="text-align: center;">སྔགས་ནུས་མཐུའིདཔུང་སྡེ་ཇི་ལྟར་ཁོག།</h3><h3 style="text-align: center;"><br /></h3><h3 style="text-align: center;">ཡིད་ལྷ་ཚོགས་སྤྲོ་བསྡུའི་ཀློང་ཡངས་ན།། </h3><h3 style="text-align: center;">ངག་གཟུངས་སྔགས་ཟབ་མོའི་བརྗོད་པ་བདེ།།</h3><h3 style="text-align: center;">ལུས་སྐྱོན་བྲལ་ཟླ་བའི་ལང་ཚོ་ལ།།</h3><h3 style="text-align: center;">ལྷའི་བྱིན་རླབས་བདུད་རྩི་འོད་ལྔ་འཁྱིལ།།</h3><h3 style="text-align: center;"><br /></h3><h3 style="text-align: center;">རྗེ་བླ་མའི་བྱིན་རླབས་དྲོད་ཀྱིས་གསོ།།</h3><h3 style="text-align: center;">ལྷ་འཁོར་ལོ་སྡོམ་པས་དངོས་གྲུབ་སྙིལ།།</h3><h3 style="text-align: center;">མགོན་ཆོས་སྐྱོང་སྡོང་གྲོགས་ཚུལ་བཞིན་སྒྲུབ།།</h3><h3 style="text-align: center;">མ་མཁའ་འགྲོའི་འཁོར་ཚོགས་གར་གྱིས་བྲེལ།།</h3><h3 style="text-align: center;"><br /></h3><h3 style="text-align: center;">གླུ་ལེན་པ་རང་སྣང་རྡོ་རྗེའི་ཤུགས།།</h3><h3 style="text-align: center;">བྲོ་བརྡུང་བ་གཤིས་ལུགས་སྒྱུ་མའི་རྩལ།།</h3><h3 style="text-align: center;">ཨ་ལ་ལ་འདི་འདྲའི་སྐྱིད་པ་ལ།།</h3><h3 style="text-align: center;">ཨེ་མ་ཧོ་སྤྲོ་བའི་མགུར་ཞིག་བཞེངས།།</h3><h3 style="text-align: center;"><br /></h3><h3><br /></h3> <h1>ཞེས་ཨོའུ་རྒྱ་སྤྲུལ་མིང་བས་དཔལ་འཁོར་ལོ་སྡོམ་པའི་ཐུན་མཚམས་སུ་གྱེར་པའོ།།</h1><h1>ཉིས་སྟོང་བཅུ་བདུན་ལོའི་ཟླ་དང་པོའི་ཚེས་བཅུ་གསུམ་ཉིན། </h1> <h1>༧ རིག་གནས་བྱང་ཆུབ་གླིང་གི་འཕྲིན་སྟེགས་ནས།<br /> སྤྱི་ལོ ༢༠༡༧ ལོའི་ཟླ ༡བོའིཚེས ༢༥ལ<br /> <br /></h1><h3><br /></h3>