<h1><b> ཨ་སྔོན་ནས་ཤར་བའི་ཉི་ཟླ་གཉིས།</b></h1><h3></h3><h3><b> </b></h3><h3><b> ཤེས་བྱ་རབ་གསལ།༼ཉག་རོང་།༽</b></h3><h3><b><br /></b></h3><h3><b>ལྔ་བདོ་སྙིགས་མའི་དུས་འདིའི་འདྲེན་མཆོག་རྗེ།།</b></h3><h3><b>རྣམ་གསུམ་བསྟན་པའི་བདག་ཉིད་འགྲོ་བའི་མགོན།།</b></h3><h3><b>ལུས་ཅན་ཡོད་དོ་ཅིག་གི་དེད་དཔོན་མཆོག།</b></h3><h3><b>མཉམ་མེད་བླ་མ་ཁྱེད་ལ་ཕྱག་བགྱིད་དོ།།</b></h3><h3></h3><h3><b><br /></b></h3><h3><b>མཁྱེན་པས་ཤེས་པར་བྱ་བའི་ཡུལ་ཀུན་མཁྱེན།།</b></h3><h3><b>བརྩེ་བས་འགྲོ་བ་རྣམས་ལ་བུ་བཞིན་བརྩེ།།</b></h3><h3><b>ནུས་པས་ལུས་ཅན་ཡོངས་ཀྱི་དོན་ཆེན་ནུས།།</b></h3><h3><b>རྒྱལ་བ་དངོས་བྱོན་ས་གསུམ་ཁྱོན་ན་རྒྱལ།།</b></h3><h3></h3><h3><b><br /></b></h3><h3><b>དྲང་ངེས་གང་ལ་གང་འདུལ་སྟོན་མཁས་ཤིང་།།</b></h3><h3><b>ལྷག་བསམ་རབ་དཀར་ཟླ་བ་ཉ་གང་བཞིན།།</b></h3><h3><b>བསྟན་དང་འགྲོ་བའི་དོན་དུ་སྐུ་ཚེ་གང་།།</b></h3><h3><b>ངལ་མེད་གཞན་དོན་སྐྱོང་བ་འདི་རྨད་བྱུང་།།</b></h3><h3></h3><h3><b><br /></b></h3><h3><b>བསླབ་གསུམ་རྣམ་དག་རིན་ཆེན་གསེར་ཞུན་མ།།</b></h3><h3><b>ས་གསུམ་བདེ་བར་འདྲེན་མཛད་ཀུན་མཁྱེན་རྗེ།།</b></h3><h3><b>སྲིད་གསུམ་བདེ་ལ་འགོད་མཛད་མཁན་སློབ་གཉིས།།</b></h3><h3><b>རིགས་གསུམ་གདུལ་བྱའི་མགོན་དུ་ལན་བརྒྱར་བསྔགས།།</b></h3><h3></h3><h3><b><br /></b></h3><h3><b>གུས་སློབ་བྱེ་བ་ཕྲག་བརྒྱའི་ཞིང་ས་ལ།།</b></h3><h3><b>ངེས་ལེགས་དོན་བཟང་སྨིན་པའི་ས་བོན་འདེབས།།</b></h3><h3><b>ནམ་ཡང་བརྗེད་ཐབས་བྲལ་བའི་བཀའ་དྲིན་ཅན།།</b></h3><h3><b>སྨྲ་སེང་མི་གཟུགས་འཛིན་ལ་གུས་བརྒྱས་བསྟོད།།</b></h3><h3></h3><h3><b><br /></b></h3><h3><b>གསང་གསུམ་བོན་གྱི་མཛོད་འཛིན་བླ་མ་མཆོག།</b></h3><h3><b>དུས་མཐའི་གཤེན་བསྟན་གཉེན་འཕྲང་སྐྱོབས་པའི་མགོན།།</b></h3><h3><b>རྒྱལ་བསྟན་ཚུལ་བཞིན་སྐྱོང་བའི་བྱེད་པོ་བ།།</b></h3><h3><b>རྒྱལ་བའི་རྒྱལ་ཚབ་མཁན་སློབ་རྣམ་གཉིས་བསྟོད།།</b></h3><h3></h3><h3><b><br /></b></h3><h3><b>བསྟན་འགྲོའི་དོན་ཆེན་ལྷོ་ཕྱོགས་ཡུལ་དུ་མཛད།།</b></h3><h3><b>སྐལ་ལྡན་སྐུ་བསོད་ཅན་རྣམས་བོན་གྱིས་སྐྱོང་།།</b></h3><h3><b>གཡུང་དྲུང་བོན་བསྟན་ཕྱོགས་མཐར་སྤེལ་བ་ལ།།</b></h3><h3><b>ཟླ་བྲལ་མཁན་སློབ་ཉི་ཟླའི་བཀའ་དྲིན་དྲན།།</b></h3><h3><b> </b></h3><h3><b>མཚན་དཔེའི་ལྗོན་བཟང་བསིལ་ལྡན་ལྗོངས་སུ་འཁྲུངས།།</b></h3><h3><b>མཛད་བཟང་ཡལ་འདབ་གཞན་ཕན་ཁུར་གྱིས་ལྕི།།</b></h3><h3><b>ཐུགས་ཀྱི་བརྩེ་ཆེན་ལུས་ཅན་ཀུན་ལ་སྙོམས།།</b></h3><h3><b>དྲིན་ཅན་མཁན་སློབ་རྣམ་གཉིས་གུས་པས་འདུད།།</b></h3><h3></h3><h3><b><br /></b></h3><h3><b>མདོར་ན་མཛད་བཟང་རྒྱ་མཚོའི་མཐའ་མི་དཔོག།</b></h3><h3><b>འདི་ཞེས་བརྗོད་པའི་ཚད་ཅིག་ཡོད་མ་ཡིན།།</b></h3><h3><b>སྐུ་དྲིན་ཆ་ཙམ་ཡི་གེའི་གཟུགས་སུ་ཕབ།།</b></h3><h3><b></b></h3><h3><b>ནོངས་པ་ཅི་མཆིས་སྐྱབས་ཡུལ་རྣམས་ལ་བཤཊ།།</b></h3>