<h1>ལོ་ཙཱ་ནི་མི་རིགས་ཤིག་ལ་ངེས་པར་མཁོ་ཡང་།ལོ་ཙཱ་ཡིན་ན་མི་རིགས་ཤིག་ལ་མཁོ་བའི་ངེས་པ་མེད།མི་རིགས་ལ་ལོ་ཙཱས་ཕན་ཐོགས་མིན་ནི་ལོ་ཙཱ་བའི་རྣམ་དཔྱོད་དང་བློ་གྲོས་ཀྱི་གདམ་ག་ལ་ཐུག་ཡོད།ང་ཚོའི་མེས་པོའི་ལོ་ཙཱ་བ་དག་ནི་མི་རིགས་འདིར་གདམ་གསེས་ཀྱིས་ལོ་ཙཱ་བྱས་པའི་ལོ་ཙཱ་བ་དེ་དག་ལ་ཡིད་སྨོན་མི་སྐྱེས་ག་མེད་རེད།<br /> <br />ལོ་ཙཱ་ནི་རིག་གནས་དང་ཆབ་སྲིད་དཔལ་འབྱོར།ཚན་རིག་བཅས་ཕྱོགས་མང་བོར་འབྲེལ་བ་དམ་པོ་ཡོད་པ་ཞིག་རེད།ང་ཚོའི་ལོ་ཙཱའི་གཞུང་ནི་སྐད་ཡིག་བསྒྱུར་བའི་གནད་ཁོ་ནས་བཤད་པས་བསྐྱར་དུ་བསམ་གཞིག་གཏང་དགོས་སྙམ།སྤྱིར་ན་ལོ་ཙཱ་བ་ནི་སྐད་དང་ཡི་གེ་སྒྱུར་བའི་ལས་ཀ་བྱེད་མཁན་ཞིག་ཡིན་པ་སྨོས་མ་དགོས་མོད།དེའི་ཕུགས་ཀྱི་བསམ་བློ་དང་ཕན་གནོད་དེ་ང་ཚོའི་མི་རིགས་དང་འབྲེལ་ནས་བསམ་བློ་གཏོང་རྒྱུ་གལ་ཆེ།<br /> <br />ལོ་ཙཱ་ནི་ལག་ཆ་ཞིག་དང་བྱེད་ཐབས་ཤིག་ཡིན་པའི་ཆ་ནས་འདི་ཉིད་ཆབ་སྲིད་ཀྱི་ལག་ཆར་འགྱུར་བ་ནི་སྨོས་མ་དགོས་པ་ཞིག་རེད།ཆབ་སྲིད་པ་ཚོས་ལོ་ཙཱའི་དགོས་པ་དེ་གཙོ་བོར་ཆབ་སྲིད་ཀྱི་སྟེང་དུ་གཞོལ་ཡོད།དཔེར་ན་མའོ་ཙེ་ཏུང་གི་ལིག་ཧྲོ་ཆི་ལ་དགག་པ་རྒྱག་པའི་ཆེད་དུ་ཆུ་ངོགས་གཏམ་རྒྱུད་མི་རིགས་སོ་སོའི་སྐད་དུ་བསྒྱུར་བ་བཞིན་ནོ༎<br /> <br />ལོ་ཙཱ་བ་ཞིག་གིས་མི་རིགས་ལ་གནོད་པའི་ཡིག་བསྒྱུར་ལ་བརྩོན་ན་དེ་ཁོ་ནའི་ལོ་ཙཱ་བའི་ཆེ་མཐོང་བརླག་མི་ཐུབ།འོན་ཀྱང་ལོ་ཙཱ་བ་ལ་ལའི་ཆེ་མཐོང་བརླག་མིན་དེ་ལོ་ཙཱ་རང་ལ་ལོ་ཙཱའི་ལྟ་བ་རྣམ་དག་ཅིག་ཡོད་མེད་དང་།ལག་ལེན་རྣམ་དག་ཡོད་མེད་ལ་རག་ལས་པ་རེད། ལོ་ཙཱ་ནི་ཐབས་ཤིག་རེད།དེ་གང་ཞིག་ཏུ་སྤྱོད་མིན་རང་ཉིད་རེད།<br /> <br />ལོ་ཙཱ་བ་ཞིག་གིས་མི་རིགས་ལ་ཕན་ཐོགས་མིན་ཡང་ཁོའི་ལག་ལེན་ལས་བལྟ་བ་ལས་ཐབས་མེད།གནད་འདི་དག་ལོ་ཙཱ་བས་ངེས་པར་ངེས་དགོས་པ་ཞིག་ཡིན་ནའང་ད་ལྟའི་སློབ་ཆེན་གྱི་ལོ་ཙཱའི་གཞུང་ན་ཅི་ཡང་མི་འདུག དེ་བས་འདིར་ཆེད་དུ་བཤད་པ་ཡིན།ལོ་ཙཱའི་དགེ་སྐྱོན་ཡང་ཕྱོགས་ཡོངས་ནས་བཤད་ན་འགྲིག་པ་ལས་བསྒྱུར་བ་ཙམ་གྱིས་བཤད་མི་རུང་སྟེ།དེ་ལྟར་བཤད་ན་སྤྱི་བསྡོམས་དེ་ཡང་ངོས་གཅིག་གི་སྤྱི་བསྡོམས་རེད།<br /> <br /> ནང་བསྟན་སྒྱུར་བའི་ལོ་ཙཱ་བར་གཞན་སྐྱེལ་རིང་ལུགས་ཟེར་བ་ནི་རིག་གནས་དར་སྤེལ་གྱི་དགེ་མཚན་མ་ཤེས་པའི་བྱིས་པའི་སྐད་ཆ་སྟེ།ནང་བསྟན་བསྒྱུར་བ་ལས་བྱུང་བའི་ནུས་པ་དེར་བློའི་ཡུལ་ལ་འཆུམ་གྱིན་མི་འདུག་པ་དེ་མཚོན།ཆོས་ཕྱོགས་ནས་བཤད་ན་སེམས་ཅད་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་ཤོག་ཅེས་པ་ལ་གོ་བ་མ་ཆགས་པ་ཡིན་ལ།འཇིག་རྟེན་གྱི་ཕྱོགས་ནས་བཤད་ན་་རིག་གནས་དབང་བསྒྱུར་ལ་གོ་བ་མ་ཆགས་པ་རེད།<br /> <br />རིག་གནས་བཙན་འཛུལ་ཞེས་པ་ནི་ནུབ་ཕྱོགས་ཀྱི་འཐབ་ཇུས་ཤིག་རེད་ལ།དེ་ནི་རང་གི་རིག་གནས་ཀྱིས་གཞན་གྱི་སྐད་ལ་བསྒྱུར་ཏེ་དེས་མི་རིགས་གཞན་ལ་དབང་བསྒྱུར་བར་བྱེད་པ་དེ་ཡིན། དཔེར་ན་ཡེ་ཤུའི་ཆོས་ལུགས་ལ་ཆེད་དུ་ཆོས་གཞན་དུ་བསྒྱུར་བའི་རྩ་འཛུགས་དང་ཚོགས་པ་ཡོད།མདོར་ན་གཞན་སྐྱེལ་དེ་ནི་རང་ཉིད་དར་སྤེལ་ལ་འབྲེལ་ཡོད།<br /> <br />ཆུང་བ་ཞིག་གིས་ཆེ་བ་ཞིག་འདུལ་ན་རིག་གནས་ལ་བརྟེན་དགོས།ཆེ་བ་ཞིག་གིས་ཆུང་བ་ཞིག་འདུལ་ན་དྲག་ཤུལ་དང་རིག་གནས་གཉིས་ཀ་ལ་བརྟེན་དགོས།རིག་གནས་ཀྱིས་གཞན་དབང་དུ་བསྒྱུར་ན་རིག་གནས་གཞན་ལ་སྤེལ་དགོས།སྐད་རིགས་མི་གཅིག་པ་ཞིག་ལ་རིག་གནས་སྤེལ་ན་ལོ་ཙཱ་ལ་བརྟེན་དགོས།<br /> <br />གལ་ཏེ་རང་གི་རིག་གནས་གཞན་ལ་བསྒྱུར་དུས་ལོག་པར་བསྒྱུར་ན་ཕན་པ་ལས་གནོད་པ་ཆེ།དེ་བས་ལོག་པར་མི་བསྒྱུར་བའི་ཆེད་དུ་གཞན་ལ་བསྒྱུར་བར་སྤུས་ཀར་ཁག་ཐེག་བྱ་དགོས་པས་དེ་ནི་མི་རིགས་རང་གིས་ནུས་པ་འདོན་དགོས།གལ་ཏེ་རང་ལ་གནོད་སྐྱེལ་ན་དོན་ལོག་པར་བསྒྱུར་བ་དེར་ཉེན་ཆེ་སྟེ།བོད་ཀྱི་བསྟན་བཅོས་སྐད་རིགས་གཞན་ལ་བསྒྱུར་དུས་ལ་ལས་ཆེད་དུ་བདུད་རྩི་གཅིན་སྐྱག་ཏུ་བསྒྱུར་ནས་བོད་ཀྱི་བསྟན་པར་ཞེན་པ་ལོག་པའི་ཐབས་སུ་བརྩོན་པ་ལྟར་རོ༎<br /> <br />མི་རིགས་དེའི་རིག་གནས་ཇི་ལྟར་ཁྱབ་ཆེ་ན་མི་རིགས་དེ་དེ་ལྟར་ཁྱབ་ཆེ།འཛམ་གླིང་གི་མི་རིགས་མང་བོ་བོད་ལ་དགའ་དོན་ཡང་ཐབས་འདི་ལ་བརྟེན་པ་ཡིན།རིན་པོ་ཆེ་དེ་ལྟར་གཙིགས་སུ་འཛིན་དོན་ཡང་ཆོས་ལུགས་ལ་བརྟེན་པ་ཡིན།</h1><h1> </h1> <h1>གཞན་གྱི་རིག་གནས་ནང་འདྲེན་ལོས་ལེགས།འོན་ཀྱང་ནང་འདྲེན་བྱེད་དུས་མི་རིགས་རང་དང་འཚམ་མིན་ལ་བལྟ་རྒྱུ་གལ་ཆེ། དེ་མིན་རང་གི་རིག་གནས་ཉེན་ཁ་ཆེན་པོ་ཞིག་ལ་འཕྲད་སྲིད།<br />ལོ་རྒྱུས་སྟེང་མི་རིགས་མང་བོ་ཞིག་གིས་རང་གི་རིག་གནས་ལ་གཅེས་པར་མ་བཟུང་བས་ཉམས་པ་རེད།དཔེར་ན་ནང་བསྟན་བསྒྱུར་དུས་ཀྱང་སྔོན་གྱི་རྒྱལ་བློན་དང་ལོ་པཎ་རྣམས་ཀྱིས་ནང་བསྟན་ལས་སྐོར་ཞིག་བོད་ལ་མི་འཚམ་པས་བསྒྱུར་མི་ཆོག་པར་གཏན་འཁེལ་བྱས་པ་ལྟར་རེད།<br />ཚན་རིག་ལག་རྩལ་སྐོར་མང་བོ་བསྒྱུར་ན་འགྲིག འོན་ཀྱང་ད་ལྟ་དེའི་སྐོར་ཉུང་།ལག་རྩལ་ནི་བྱེད་ཐབས་ཤིག་་དང་ལག་ཆ་ཞིག་རེད།གཞན་གྱི་བྱེད་ཐབས་ཐད་ཀར་དྲངས་ན་ཆོགདེའི་སྔོན་ཐོན་གྱི་གཞུང་ལུགས་ལ་བརྟེན་ན་སྟབས་བདེ་བས་དེང་ལག་རྩལ་གྱི་གསང་ཉུལ་བ་འབྱུང་བཞིན་པའི་གནད་ཀྱང་དེ་ལ་ཐུག་ཡོད།<br />གཞན་ལ་བསྒྱུར་པ་ལ་བསམ་བློའི་སྐོར་བསྒྱུར་དགོས་པ་ལས་ལག་རྩལ་སྐོར་བསྒྱུར་མི་རུང་།དཔེར་ན་གསོ་རིག་གི་མན་ངག་གི་བསྒྱུར་ན་བོད་ལ་གནོད་ངེས་རེད།བཀའ་རྒྱ་མའི་རིགས་བསྒྱུར་བ་ཕར་ཞོགས་མི་རིགས་ནང་དུའང་གང་འདོད་དུ་བཀྲམ་མི་རུང་།<br />དེ་བས་སྔོན་སྲོལ་ལ་སྣོད་ལྡན་སློབ་མ་བཙལ་ནས་སྤེལ་བ་ཡིན་མོད།ད་ལྟ་སྲོལ་དེ་ཉམས་པས་མན་ངག་གསང་བ་དག་ཀྱང་གཞན་ལ་བཙོང་བ་རེད།དེ་བས་གང་བསྒྱུར་བ་གང་བསྒྱུར་མི་རུང་བའི་གདམ་ཀ་དེ་མེད་ན་ལོ་ཙཱ་བ་ཚད་ལྡན་ཞིག་གཏན་ནས་མ་རེད།<br /> <br />བསམ་བློའི་གསོས་སུ་གྱུར་པ་དག་བསྒྱུར་ན་དགེ་མཚན་ལས་མེད།དཔེར་ན།༡༩༢༧ཡས་མས་ལ་ཨ་རིའི་མཁས་པ་སེམས་ཁམས་ལ་ཞིབ་འཇུག་བྱེད་མཁན་ཞིག་བོད་ཀྱི་ས་ཆར་ཡོང་།<br /> <br />སྔོན་དུ་འབྲུག་ཡུལ་དུ་བསྡད་དེ་དེ་གའི་སློབ་འབྲིང་ཞིག་གི་དགེ་རྒན་བསམ་འགྲུབ་བོད་ཡིག་གི་དགེ་རྒན་ལ་བསྟེན་ནས་ཁོ་གཉིས་ཀྱིས<<བར་དོ་ཐོས་གྲོལ>>དབྱིན་ཡིག་ལ་བསྒྱུར།དེ་བསྒྱུར་རྗེས་ནུབ་ཕྱོགས་རིག་གཞུང་གི་ཁྱབ་ཁོངས་སུ་བོད་ཀྱི་ནང་ཆོས་ནི་སེམས་ཁམས་རིག་པ་བ་གཏིང་ཟབ་མོ་རེད་ཅེས་བསྔགས་པ་ཆེས་ཆེར་བརྗོད།<br />ལྷག་པར་སེམས་ཁམས་རིག་པ་བའི་ཤིང་རྟའི་སྲོལ་འབྱེད་རྒྱ་ཡིས་རོང་གུར་ཟེར་བ་དེ་ཡིས<<བར་དོ་ཐོས་གྲོལ>>འདི་ནི་ཁོ་དང་ཁ་ལག་དང་མ་འབྲལ་བ། ཐ་ན་དགུང་མོར་གཉིད་པའི་སྐབས་སུ་ཡང་སྔས་མགོར་བཟུང་བའི་དཔེ་ཆ་ཡིན་ཞེས་བསྟོད་བསྔགས་ཆེན་པོ་བྱས།<br />དེ་བས་སེམས་ཁམས་རིག་པ་བ་དང་དེ་མིན་མཁས་པ་མང་བོས་བོད་ཀྱི་ཆོས་ལུགས་ལས་སེམས་ཁམས་རིག་པར་ཕན་ངེས་ཀྱི་གྲུབ་ཆ་མང་བོ་ལེན་རྒྱུ་ཡོད་ཅེས་ཞིབ་འཇུག་བྱས།<br /> <br />༡༩༥༩གཞུག་ནས་བསམ་བློ་གསར་བ་འཚོལ་མཁན་མང་བོ་ཤར་ཕྱོགས་དང་རྒྱ་གར་དུ་སོང་ནས་ནང་བསྟན་ལ་སློབ་སྦྱོང་བྱས་ནས་ཕྱིར་ཡོང་།བོད་ཀྱི་ནང་བསྟན་འདི་རྒྱ་ཆེན་པོ་དར་ཏེ་དགོན་སྡེ་ཁག་བཙུགས་པ་ནི་༡༩༥༩ལོའི་གཞུག་སྟེ་༡༩༦༡དང་རེ་གཉིས་ནས་བོད་ཀྱི་བསྟན་བཅོས་མང་བོ་བསྒྱུར་ཏེ་ཁྲིད་པས་ད་ལྟ་ཨ་རི་ནི་ཕྱི་སྡོད་བོད་མིའི་ཁྱིམ་གཞིས་དྲོན་པོར་གྱུར་ཡོད།<br />ནུབ་ཕྱོགས་པའི་ཁྲོད་དུ་བོད་ལ་རོགས་སྐྱོར་ཚོགས་པ་མང་བོ་བཙུགས་པའང་དོན་གྱིས་བོད་ཀྱི་རིག་གནས་ལ་རོགས་སྐྱོར་བྱེད་པ་སྟེ།གལ་ཏེ་གཞན་ལ་ངོ་སྤྲོད་མེད་ན་འདི་རིགས་འབྱུང་ཐབས་མེད་དོ༎<br />ཡེ་ཤུའི་ཆོས་ལུགས་པར་ཁོ་ཚོའི་གསུང་རབ་མི་རིགས་གཞན་གྱི་སྐད་དུ་བསྒྱུར་བའི་ལོ་ཙཱ་བ་ཡོད་ལ།ཁོ་ཚོས་བོད་པ་མང་བོར་ཆེད་དུ་སྒོར་བྱིན་ནས་བསྒྱུར་དུ་འཇུག དེ་ལྟར་བྱེད་པ་ནི་ཁོ་ཚོས་གཅིག་ནས་ལོ་ཙཱ་བར་ཡེ་ཤུའི་ཆོས་ཤེས་སུ་འཇུག་པའི་ཆེད་དུ་ཡིན་ལ།གཉིས་སུ་བོད་པས་བསྒྱུར་ན་བོད་སྐད་ཀྱི་འགྲོས་དང་མཐུན་པས་བོད་མི་འགུག་སླ་བ་སོགས་ལ་འདང་བརྒྱབས་ཡོད།<br /> <br />ཆོས་ལུགས་ལ་མི་རིགས་འདིའི་ཡིན་ཞེས་བདག་ཏུ་འཛིན་མི་ཐུབ་ལ་འཛིན་ཡང་མི་རུང་།ཆོས་ལུགས་གང་ཞིག་མི་རིགས་ཤིག་གིས་བདག་ཏུ་བཟུང་ན་ཆོས་ལུགས་ཀྱི་དགོངས་པ་དང་ཡོངས་སུ་འགལ།<br />ཆོས་ལུགས་གང་ཞིག་མི་རིགས་དེའི་ཡི་གེར་འགྱུར་རྗེས་མི་རིགས་དེའི་རིག་གནས་གྲུབ་ཆ་ཞིག་ཡིན་པ་སྨོས་མ་དགོས་མོད།མི་རིགས་ཀྱི་རིག་གནས་ཡིན་པ་ཙམ་གྱིས་གཞན་ལ་སྤེལ་མི་ཆོག་ན་ནང་བསྟན་གྱི་བདག་པོ་བོད་ཡིན་པའང་དཀའ་སྟེ།སྟོན་པ་རྒྱ་གར་བ་ཡིན་པ་ནི་སུས་ཀྱང་བསྙོན་མི་ནུས།<br /> <br />ནང་བསྟན་གཞན་ལ་བསྒྱུར་ན་བོད་ཀྱི་ནང་བསྟན་རྩ་མེད་བཏང་བ་མིན་པས་བོད་ལ་གནོད་པ་ཅི་ཡང་མི་འབྱུང་།ད་དུང་འདིའི་ཕྱག་ལེན་དང་བརྒྱུད་པ་མཐའ་དག་བོད་ན་ཡོད་པས་བསྒྱུར་བ་བརྒྱུད་ནས་བོད་ཀྱི་ཆོས་ཀྱི་གདུལ་བྱ་ཇེ་ཆེར་འགྱུར།དེ་བས་ནང་བསྟན་གཞན་ལ་བསྒྱུར་ན་ང་ཚོ་ལ་ཅི་ཡོད་ཟེར་བ་ནི་རི་བོང་གནམ་བརྡིབས་ཀྱི་འཇིགས་པ་རེད།<br />དཔེར་ན་ནང་བསྟན་བོད་ཁོ་ནས་བདག་ཏུ་བཟུང་ན་བོད་ཀྱི་གནད་དོན་རྒྱལ་སྤྱིའི་གནད་དོན་དུའང་གཏན་ནས་འགྱུར་མི་སྲིད།རིན་པོ་ཆེ་མཆོག་གི་མཛད་པ་དེ་ཡང་ཡིག་བསྒྱུར་ལ་བརྟེན་པ་ཡིན་པས་དགེ་མཚན་ལས་གནོད་པ་མེད།</h1><h1> </h1> <h1>དེང་རབས་རིག་གནས་བོད་ལ་བསྒྱུར་ན་ཉེན་ཁ་ཆེ་ཞེས་གཏན་ནས་བཤད་མེད། ངས་བཤད་པ་ནི་མི་རིགས་རང་ལ་མི་འཚམ་པའི་རིགས་བསྒྱུར་ན་གནོད་པ་ཆེ་ཞེས་པ་དེ་ཡིན།གཞན་གྱི་སྙིགས་མ་བསྒྱུར་ན་དགོས་པ་མེད།<br />ལྷག་པར་རིག་གནས་ཚུར་བསྒྱུར་བ་དེ་རང་གི་རིག་གནས་རིག་གནས་གཞན་ལ་བསྒྱུར་དགོས་པའི་སྒྲུབ་བྱེད་ལ་དེ་བས་ཀྱང་བཀོད་མེད།དེ་གཉིས་ཁ་ཁ་རེད།ཁ་ཁ་གཉིས་གཅིག་ཏུ་སྒྲུབ་པ་ནི་གླེན་པ་ལས་མ་འདས།<br /> <br />ཁུང་ཙི་བསམ་བློ་དང་ལེན་བྱས་ན་རྒྱ་ནག་པའི་ཆ་ཤས་ཤིག་ཏུ་གྱུར་བ་སྟེ།ད་ལྟ་རྒྱ་ནག་སྤྱི་ཚོགས་རིག་པ་བ་ཞིན་ཧོ་ཉིན་སོགས་ཀྱིས་རྒྱ་ནག་གི་རིག་གནས་སླར་གསོའི་ཆེད་དུ་མར་ལེ་བསྐྲོད་པའི་སྐད་འབོད་སྒྲོག་དོན་ཡང་དེ་རེད།མར་ལེ་དང་ལེན་བྱས་པས་རྒྱ་ནག་སྙིགས་མར་གྱུར་ཞེས་ཁོ་ཚོའི་སྲོལ་རྒྱུན་རིག་གནས་སླར་གསོ་ལ་བརྩོན་པའི་རྒྱུ་མཚན་ཡང་དེ་རེད།<br /> <br />བོད་ཀྱི་བཀའ་བསྟན་སྒྱུར་མཁན་ནི་བོད་ཀྱི་ལོ་ཙཱ་བ་ཁོ་ན་ཡིན་ཟེར་བ་ནི་བོད་ཀྱི་ལོ་ཙཱའི་ལོ་རྒྱུས་ལ་རྒྱུས་མེད་པའི་རྟགས་རེད།བཀའ་བསྟན་ལས་མང་ཆེ་བ་པནྜི་ཏ་དང་ལོ་ཙཱ་བ་གཉིས་ཟུང་དུ་སྦྲེལ་ནས་བསྒྱུར་ཏེ།དཔེར་ན་ཁྲིན་ཆིན་དབྱིན་དང་དོན་གྲུབ་རྒྱལ་གཉིས་ཀྱིས་ཐང་ཡིག་གསར་རྙིང་ལས་བྱུང་བའི་བོད་ཆེན་པོའི་སྲིད་ལུགས་བསྒྱུར་བ་ལྟ་བུ་རེད།<br />རང་སྟོབས་ཀྱིས་བསྒྱུར་དཀའ་ན་ཐབས་འདི་ནི་ཤིན་ཏུ་གལ་ཆེ་བ་ཞིག་ཡིན།དཔེར་ན་རྒྱ་ནག་ནས་བསྒྱུར་དུས་རྒྱའི་མཁས་པ་ཞིག་ལ་བརྟེན་ན་མ་ཡིག་གི་གོ་བ་ལོན་ཞིང་བོད་པའི་ལོ་ཙཱ་བ་ཡིན་ན་ཚིག་སྦྱོར་ཐད་ནས་བོད་སྐད་དང་མཐུན་ངེས་རེད།དེ་ནི་བཀའ་བསྟན་གྱི་དཀར་ཆག་ལ་གཟིགས་ན་གསལ་བོར་ཤེས་ངེས་རེད།<br /> <br />ང་ཚོར་རྒྱ་གར་ནང་བའི་བསམ་བློའི་གྲུབ་ཆ་ཆེན་པོ་གྲུབ་ཡོད་ལ།ད་ལྟའི་ན་གཞོན་དག་ལ་སྐྱེ་བོའི་འགྲོ་འདུག་སྤྱོད་གསུམ་ལ་རྒྱ་ནག་གི་ཤན་ཡོད་པ་མ་ཟད།བོང་རྫིས་བཤད་པ་བཞིན་རིག་གསར་གྱི་ཤན་ཡང་ཞུགས་ཡོད།<br />དཔེར་ན་ད་ལྟའི་སྐྱེ་བོ་ཕལ་བ་བཤད་མི་དགོས།བརྡ་སྤྲོད་ལའང་ཤན་ཞུགས་ཡོད།དཔེར་ན་བརྡ་སྤྲོད་དོན་འགྲེལ་དང་རིག་འཕྲུལ་སྣང་མཛོད་སོགས་现代汉语དང་བསྡུར་དང་གསལ་བོ་རེད།<br /> <br />ནང་བའི་གདུལ་བྱ་རྒྱས་པས་བོད་མི་དབུལ་ཕོངས་ཀུན་ལ་ཕན་མི་སྲིད་ཀྱང་བོད་མི་མང་བོ་ལ་དངོས་བརྒྱུད་ཅི་རིགས་ནས་ཕན་པ་རྒྱ་བླ་བསོད་དར་རྒྱས་དང་ཧཱཾ་དཀར་སོགས་རྒྱ་བླ་མང་བོས་བོད་ལ་སློབ་གྲྭ་དང་བཟོ་གྲྭ་བཙུགས་པ་དང་ཡལ་ཤུལ་ས་འགུལ་སྐབས་རྒྱ་བླ་དག་གིས་ཧ་ལས་པའི་རོགས་སྐྱོར་བྱས་པ་དེས་ཀྱང་གསལ།<br /> རྒྱལ་སྤྱིའི་གནད་དོན་དུ་འགྱུར་རྒྱུ་དེ་ཆབ་སྲིད་ཡིན་ཡང་ཆབ་སྲིད་ལ་རྒྱབ་སྐྱོར་བྱེད་མིན་ཆབ་སྲིད་དབུ་ཁྲིད་དག་ལ་རྒྱབ་སྐྱོར་བྱེད་པའི་མི་ག་འདྲ་ཡོད་མེད་ལ་ཐུག་ཡོད།གལ་ཏེ་ནང་བསྟན་ལ་དད་མཁན་མེད་ན་བོད་ལ་རྒྱབ་སྐྱོར་བྱེད་མཁན་ཡང་ཡོད་མི་སྲིད།<br /> <br /> སྲོལ་རྒྱུན་རིག་གནས་ལ་བརྟེན་ཡང་ཡར་རྒྱས་སུ་སོང་བ་ཐེ་ཝན་ལྟ་བུའོ།།མར་ལེ་ལ་བརྟེན་ཡང་ཡར་རྒྱས་སུ་མ་སོང་བ་ཁྲོའོ་ཞན་ལྟ་བུ།ཏིན་ཞི་ཕིན་གྱིས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་གསར་གཏོད་བྱས་པ་རེད།དེ་ལས་སྐམ་ས་ཆེན་པོར་ཀུན་སྤྱོད་ཀྱི་ཉེན་ཁ་བྱུང་ཡོད།<br /> <br />ང་ཆེན་པོ་ཞིག་ག་ལ་ཡིན།ཆེན་པོ་ཡིན་མིན་ཁོའི་མཛད་པ་དང་བསམ་བློ་ལ་བལྟ་དགོས་པ་ལས།གང་འདོད་དུ་སྦྱོར་མི་རུང་།ང་ལྟ་བུར་ལྷག་པར་སྦྱོར་མི་རུང་། སློབ་གསོ་བ་ལ་ཚད་གཞི་ཞིག་ཡོད་ལ།བསམ་བློ་བ་ལ་ཚད་གཞི་ཞིག་ཡོད། མཁས་པ་ཡིན་ན་སློབ་གསོ་བ་དང་བསམ་བློ་བའི་ཚད་གཞིར་ག་ལ་ལོངས།དཔེར་ན་དེང་སློབ་གསོ་བ་ཆེན་པོ་དང་བསམ་བློ་ཆེན་པོ་ཟེར་བ་དག་ལ་མ་མཐའི་ཆ་རྐྱེན་ཡང་ཚང་མེད།མང་ཆེ་བ་དེ་འདྲ་རེད།ཆེན་པོ་ཡིན་མིན་ཁོང་གི་མཛད་རྗེས་བདེན་དཔང་བྱེད་ཅིང་།ལྷག་པར་སྐྱེས་བུ་ཆེན་པོ་དག་གིས་བསྔགས་པ་བརྗོད་པ་དེས་མཚོན།<br />དཔེར་ན་སློབ་མ་ལྟ་བུ་ནས་ཀྱང་སློབ་དཔོན་ཆེན་མོར་འབོད་ཅིང་ང་ལྟ་བུ་ལའང་དགའ་མཁན་ཚོས་དེ་འདྲ་མང་བོ་འབོད་ཀྱིན་ཡོད་མོད།དེ་ནི་བོད་པའི་ནད་ཅིག་རེད།<br /> <br />མཇུག་ཏུ་གསལ་འདེབས་རྒྱུ་ནི་ང་ནི་མི་རིགས་གཞན་གྱི་སྐད་དུ་བོད་སྐད་དུ་བསྒྱུར་བའི་ལོ་ཙཱ་བ་ཞིག་ཡིན་པ་ལས།བོད་སྐད་ལས་མི་རིགས་གཞན་པའི་སྐད་དུ་སྒྱུར་བའི་ལོ་ཙཱ་བ་ཞིག་མིན།ངས་ད་ལྟའི་གཞན་དང་མཉམ་སྦྲེལ་གྱིས་རྒྱ་ནག་དང་ནུབ་ཕྱོགས་ཀྱི་དཔེ་ཆ་པོད་བཅུ་ཉེ་ལ་བོད་ཡིག་ཏུ་བསྒྱུར་པ་ལས་གཞན།བོད་དུ་འགྱུར་མེད་པའི་མདོ་དང་བསྟན་བཅོས་ཉི་ཤུར་ཉེ་བ་བསྒྱུར་ཡོད་ཅིང་།ད་ལྟ་མདོ་སྡེ་ལུང་སྡེ་བཞི་ལས་ལུང་སིལ་མ་པོད་གསུམ་བོད་དུ་སྒྱུར་བའི་འགན་བླངས་ཡོད།འདི་ནི་ཁ་བཤད་ཙམ་མ་ཡིན་པར་མི་རིགས་འདིར་རང་གི་ནུས་པ་བཏོན་པ་ཙམ་དུ་བསམ་བཞིན་ཡོད།ད་དུང་མུ་མཐུད་དུ་ལས་ཞོར་དུ་ཡིག་བསྒྱུར་ལ་གཞོལ་བའི་འདུན་པ་ཡོད།</h1><h3> </h3><h3> </h3><h1> ད་སྐུ་འབུམ་དགོན་པར་སྐོར་བར་འགྲོ་རྒྱུ།རྣམ་པ་དག་བདེ་མོ།</h1>