<h1> ༼ ཁྱེད་མི་བརྗེད།</h1><h3> ---དབལ༒བཙན་སྨྱུག</h3><h3>དམར་པོ་ཁྲག་གིས་སྙིང་ཁ་བརླན་ཡང་།།</h3><h3>ཁེར་རྐྱང་སྐྱོ་བས་སེམས་པ་བཤག་ཀྱང་།།</h3><h3>ཡ་ཁོག་སྙིང་ལ་དྲོད་ཅིག་ཡོད་ཚེ།།</h3><h3>ཁྱེད་རང་ཁོ་བོའི་སེམས་ནས་མི་བརྗེད།།</h3><h3>ཁེར་རྐྱང་དུས་ཀྱི་ན་ཟུག་གཟན་ཡང་།།</h3><h3>རེ་མིག་འོག་གི་འཚོ་བ་དཀའ་ཡང་།།</h3><h3>དབུགས་རིང་ཐེངས་གཅིག་འབྱིན་རྒྱུ་ཡོད་ཚེ།།</h3><h3>ཁྱེད་རང་མི་བརྗེད་ཡིད་ལ་འཆར་ངེས།།</h3><h3>སྟོང་བསམ་འཁྲུལ་གྱི་སྒོ་མོ་འབྱེད་ཀྱང་།།</h3><h3>རྨོངས་པའི་དྲ་རྒྱར་ཡིད་སེམས་འཐིམ་ཡང་།།</h3><h3>སང་ཉིན་ཟེར་བའི་ཉིན་ཞིག་ཡོད་ན།།</h3><h3>མི་འགྱུར་སེམས་སུ་ཁྱེད་རང་གསལ་ངེས།།</h3><h3>སྡང་མིག་རྣོན་པོའི་མདའ་མོ་བསྣུན་ཡང་།།</h3><h3>ཟུར་ཟ་ངར་མོའི་མེ་ལྕེས་ཚིག་ཀྱང་།།</h3><h3>སྨྲ་ཤེས་དོན་གྱི་གོ་བ་ལྡན་ན།།</h3><h3>ཁྱེད་རང་ཅིས་ཀྱང་སེམས་འདིར་མཛེས་ངེས།།</h3><h3>མིག་ཁར་མཛེས་པའི་སྒོར་དངུལ་མེད་ཀྱང་།།</h3><h3>ཡིད་སེམས་ཞེན་སའི་རྐུབས་སྟེགས་མེད་ཀྱང་།།</h3><h3>སེམས་པའི་དཀྱིལ་དེར་ལྡིར་སྒྲ་ཡོད་ཚེ།།</h3><h3>ཁོ་བོའི་སེམས་སུ་ཁྱོད་མིང་ཡོད་ངེས།།</h3><h3>ས་རྡུལ་ཁྲོད་དུ་མི་ཚེ་འཐིམ་ཡང་།།</h3><h3>གྲང་ངར་གསེབ་ཏུ་ལང་ཚོ་རྒུད་ཀྱང་།།</h3><h3>ངེས་མེད་སེམས་འདིར་གས་ཁ་མེད་ཚེ།།</h3><h3>ཁྱེད་འཛུམ་ཁོ་བོའི་སེམས་སུ་བཀྲ་ངེས།།</h3><h3>ཤ་རུས་ཁྲག་གི་ཟུངས་བ་ཟད་ཀྱང་།།</h3><h3>སྐྱོ་གདུང་མཆི་མས་ཉལ་ས་བརླན་ཡང་།།</h3><h3>སྙིང་དམར་དཀྱིལ་དུ་དྲན་ཤེས་ཡོད་ན།།</h3><h3>ཁྱེད་ཉིད་ཁོ་བོའི་དྲན་རྟེན་ཡིན་ངེས།།</h3><h3>མ་དགའི་མཆི་ཞགས་གདོང་ངོར་བབས་ཀྱང་།།</h3><h3>ཁྲེལ་དགོད་མདའ་མོས་སེམས་རྩ་གཏོར་ཡང་།།</h3><h3>དབུགས་ཐག་རིང་མོར་ཆད་པ་མེད་ན།།</h3><h3>ཁྱེད་ཞལ་དྭངས་མོ་ད་དུང་མཛེས་ངེས།།</h3><h3>མི་ཚེའི་ལམ་ཕྲན་ཇེ་དོག་གྱུར་ཡང་།།</h3><h3>རེ་བའི་མིག་ཐག་ཇེ་རིང་སོང་ཡང་།།</h3><h3>ཁ་བའི་མདོག་ལྟར་སེམས་པའི་ངོས་འདིར།།</h3><h3>འུ་གཉིས་དམ་ཚིག་ད་དུང་སྲ་ངེས།།</h3><h3>ཡིད་ཆད་དབུགས་རིང་སེམས་སུ་གཟེར་ཡང་།།</h3><h3>སེམས་སྡུག་གྲང་མོས་ཚོར་བ་འཁྱགས་ཀྱང་།།</h3><h3>ཤ་རུས་གསེབ་ཀྱི་ཁྲག་རྒྱུན་ཡོད་ན།།</h3><h3>དྲན་པའི་ཁ་དར་ཁྱེད་ལ་འཐེན་ངེས།།</h3>