གང་གཱ་ཆུང་གིས་དུག་དང་ཚད་འཁྲུ་གཅོད། ༼འཁྲུངས་དཔེར་ལས་༽གང་གཱ་ཆུང་ཞེས་བྱ་བ་ནི། ། ཁྱི་དང་བུ་མེད་མི་འགྲོ་སའི། ། མཐོ་བའི་གཡའ་ཞིབ་རྫ་ལ་སྐྱེ། ། ལོ་མ་ཐིས་ཚེ་བརྩེགས་པ་ཡི། །ཟུར་བཞི་ལོགས་བརྒྱད་མཆོད་རྟེན་བརྩེགས། །དེ་སྟེང་མེ་ཏོག་དཀར་པོ་ལ། །སྔོ་དང་དམར་བའི་མདངས་འོད་ཆགས། །དྲིལ་བུ་གྱེན་དུ་ཁ་བཟེད་འདྲ། །རྩ་བ་རྒྱུས་པ་འཛིངས་པ་འདྲ། །ཞེས་དང་། ༼དཔག་བསམ་ལྗོན་ཤིང་ལས་༽རྒྱལ་མཚན་གང་ཆུང་ཞེས་བྱ་བ། །ཟུར་བཞི་ལོགས་བརྒྱད་རྩེ་དང་དགུ། །འཇམ་པ་གངས་དཀར་ལོགས་ལས་སྐྱེ། །ལོ་མ་བརྩེགས་པ་འདྲ་བ་ཡིན། །ཤིན་ཏུ་ཁ་བས་ཁྲག་མཁྲིས་སེལ། །དུག་དང་ཚ་བའི་ནད་ཀུན་འཇོམས། །སྨུག་པོ་ཁྲག་ལམ་ཆད་པ་ལ། །ང་མེད་སྨན་པ་སྡུག་གོ་ཟེར། །ཞེས་དང་། ། ༼རྟོག་བརྗོད་ལས་༽གངས་ཅན་གཡའ་ཤག་སྐྱེས་པའི་གང་གཱ་ཆུང་། །ཟུར་ལོགས་མཆོད་རྟེན་བརྩེགས་པའི་རྩེ་མོ་ལ། །རབ་མཛེས་ཨུཏྤལ་དགོད་པའི་ཆུན་པོས་བརྒྱན། །ཚ་བ་ཀུན་སེལ་ཚ་འཁྲུ་དུག་ནད་འཇོམས། ། ཞེས་བཤད་དོ།།