སྤོས་ཤེལ། རྫ་ཆུ་ཁ་བ།
ཞལ་ལ་མདངས་གསལ་ཚེམས་དཀར་ཕྲེང་བ་ཉ་ཕྱིས་མུ་ཏིག་བུ་མོོའི་སྤུན།།
སྒེག་པའི་ངོ་གདོང་ཟླ་བ་ཡིས་ནི་ཁྲུས་བྱས་རྫིང་ནས་ཐོན་པ་ཡི།།
དཀར་ཆགས་འོད་ལྡན་སྦར་མོ་དེ་ཡིས་རྒྱུ་སྐར་རྣམ་ནི་རྨས་པ་བཞིན།།
འདོད་ལྡན་དག་གི་མིག་ཁར་འབྱར་ཞིང་དེ་ནས་སྙིང་རྩ་རྨས་པར་བྱེད།།
མ་ཁྱོད་གདན་ལ་འཁོད་པའི་ངག་གི་འཁྲི་ཤིང་།།
རྩེ་མོར་ཁུ་བྱུག་ཅིག་གིས་སྐད་ཅོལ་འབྱིན་འདུག།
མིན་ཚེ་རླུང་ཁར་ཡན་པའི་འཇག་མའི་གླུ་རེད།།
མིན་ཚེ་ཧྥ་སིའི་རོལ་མོའི་དབྱངས་རྟ་སྙོན་མེད།།
དེ་འདྲའི་སྐད་ངག་འཁྲི་བའི་ཁྲུང་ཁྲུང་ཁྱུ་ཞིག།
དགུན་ཁ་བྱོལ་གྲབ་བྱས་ཀྱང་གངས་གསེབ་ལུས་སོང་།།
སྐབས་དེར་སྐར་མ་ཁ་ཤས་ཉན་བློ་སྐྱེས་ཏེ།།
ལུས་ཁྲུས་གཙང་བོའི་ནང་དུ་སྟུག་གེར་ལྕེབས་སོ།།
དེ་སླད་ཉ་རྒྱས་མདངས་རྫོགས་པ།།
རང་ཉིད་ལས་གཞན་ཡོད་མིན་པས།།
པད་མའི་འདབ་མ་གསར་བ་དག།
དེ་ག་ཉིད་ནས་ཕམ་པར་བྱེད།།
རང་ནས་ཚེ་རབ་དུ་མ་ལ།།
ལས་ཀྱི་སྐལ་བའི་ཨུ་པལ་ལ།།
ཕྱག་འཚལ་གུས་བར་བྱེད་པ་ཡིས།།
སེམས་ཀྱི་མེ་ལོང་དཀྱིལ་དུ་ཕོབ།།
ཀྱེ་མ་ང་ནི་འཁོར་བ་པོ།།
དེ་རིང་སྐྱིད་ལ་སང་ཉིན་སྡུག།
འགྱོད་དུང་ཁུར་གྱིས་ལྕི་བ་ན།།
ལྷ་མོའི་ཐུགས་ནས་མ་བོར་ཅིག།
སྔོན་མའི་ལུགས་སུ་བྱས་ནས་བྲིས་པ་དགེའོ།།