<h3> ལྕགས་མོ་ཕུན་ཚོགས་ཐུབ་ཆེན་ནམ་པད་དཀར་འབངས་ནི། སྤྱི་ལོ་༡༩༧༣ ལོར་ཟི་ཁྲོན་རྔ་བ་ཁུལ་རྔ་བ་རྫོང་རྔ་སྟོད་ཨ་འདུས་ཡུལ་ཚོར་སྐྱེས་ཤིང་། རང་ལོ་༢༢སྟེང་རབ་ཏུ་བྱུང་སྟེ་རྔ་ཡུལ་སྒོ་མང་དགོན་དགའ་ལྡན་བཤད་སྒྲུབ་འཕེལ་རྒྱས་གླིང་གི་རྨད་བྱུང་ཐོས་བསམ་གླིང་གི་ཆོས་སྒོར་ཞུགས་ཤིང་། སློབ་ གཉེར་གྱི་ཞོར་དུ། ༸མ་ཧཱ་པཎྜི་ཏ་རྗེ་བཙུན་དམུ་དགེ་བསམ་གཏན་རྒྱ་མཚོ་མཆོག་གིས་ལོ་མང་རིང་དངོས་སུ་བསྐྱངས་ནས་བསྔགས་བརྗོད་ཀྱི་མེ་ཏོག་འཐོར། དབང་ལུང་མན་ངག་གི་མཛོད་དུ་གྱུར་ཏེ་དེའི་རྒྱུད་འཛོན་དུ་དབང་བཀུར་བ། སཾསྐྲྀཏ་སོགས་གནའ་དེང་གི་ཡིག་རིག་སྣ་ཚོགས་ལ་ནང་བྱན་ཆུབ་པ་སྒོ་མང་དགོན་གྱི་སྤྲུལ་བའི་སྐུ་མཆོག་༸སྒང་བ་བསམ་གཏན་བསྟན་པའི་རྒྱལ་མཚན་ཚང་གི་ཞལ་སྔ་ནས་ལྡན་བཀྲ་ཤིས་འཁྱིལ་གྱི་བཤེས་གཉེན་ཆེན་མོ་ལྷ་མོའི་ཚུལ་ཁྲིམས་ཚང་ནས་མ་ཧཱ་པཎྜི་རྗེ་བསམ་གཏན་རྒྱ་མཚོ་ཚང་ལ་གནང་བའི་ལཉྪའི་ཁྲིད་དང་། དབུ་ཅན་དང་། ༸པེ་ཅེེན་མཐོ་རིམ་ནང་བསྟན་སློབ་གླིང་ནས་སློབ་མཐར་ཕྱིན་པ་སྒྲ་རྩེས་སོགས་ལ་ཧ་ཅང་མཁས་པའི་ཨ་ཁུ་རང་བྱུང་རྒྱ་མཚོ་ལས་ཚུགས་རིང་དང་ཚུགས་ཐུང་། ༸མགོ་ལོག་སྡེར་ནང་དགོན་གྱི་དཔལ་ལྡན་རྒྱུད་བཞི་ཆེན་མོ་སྡེར་ནང་ས་བྲིས་ཀྱི་ལམ་ནས་ཕྱག་བྲིས་གནང་ནས་མཚན་སྙན་གྱི་གྲགས་པ་འབར་བའི་རྒན་སེང་གེ་དར་རྒྱས་ལགས་ཀྱི་ཞལ་སྔ་ནས་སྡེར་ནང་ས་བྲིས། བོད་ལྗོངས་སློབ་ཆེན་གྱི་དགེ་རྒན་ཆེན་མོ་བོད་ཀྱི་རིག་གཞུང་མཐའ་དག་ལ་ནང་བྱན་ཆུབ་པ་འབྲུ་ཚ་སོགས་ཡིག་རིག་སྣ་ཚོགས་ལ་ཤིན་ཏུ་མཁས་པ་༸རྒན་ཞབས་ཤར་ཟླ་བ་ཚེ་རིང་ལགས་ཀྱི་མདུན་ནས་འབྲུ་ཚ་དང་ཚུགས་མ་འཁྱུག་སོགས་ཡིག་གཟུགས་སྣ་ཚོགས་ལ་སྦྱངས། 2015ལོར་དབུས་ཀྱི་ཡིག་མཁན་ཆེན་མོ་རྒན་བསྟན་འཛིན་ལགས་ཀྱི་དྲུངས་ནས་༸ཅོག་གྲྭ་རིན་པོ་ཆེ་ཆོས་ཀྱི་སེང་གེ་མཆོག་དང་༸རྩེ་དྲུང་བྱམས་པ་འཕྲིན་མཆོག་རྣམ་གཉིས་ནས་གནང་བའི་གཞུང་རིས་འཁྲུལ་མེད་ཚུགས་རིང་དང་ཚུགས་ཐུང་ཚུགས་ཆུང་ཀྱི་བཅས་ཁྲིད་རྒྱུན་ཞུ་ཁུལ་དང་།2016ལོར་དམུ་དགེ་དགོན་གྱི་ཨ་ཁུ་རྨད་བྱུང་ཚང་གི་མདུན་ནས་དཔལ་ལྡན་བཀྲ་ཤིས་འཁྱིལ་གྱི་བཤེས་གཉེན་ཆེན་མོ་ལྷ་མོའི་ཚུལ་ཁྲིམས་ཚང་ནས་མ་ཧཱ་པཎྜི་རྗེ་བསམ་གཏན་རྒྱ་མཚོ་ཚང་ལ་གནང་བའི་ཝརྟིའི་ཁྲིད་རྒྱུན་ཞུ་ཁུལ་དང་།ལྟ་ད་རྔ་ཡུལ་སྒོ་མང་དགོན་དུ་སློབ་གཉེར་གྱི་བགྱི་བ་དང་དུ་ལེན་པའི་ཁུལ་དང་། ཞོར་དུ་ཡིག་གཟུགས་སྣ་ཚོགས་ལ་སྦྱོང་བཞིན་ཡོད།</h3>