རྫོགས་ཆེན་དགོན་པའི་ཆོས་བརྡ།
བོད་རབ་བྱུང་བཅུ་བདུན་པའི་མེ་སྤྲེལ་ལོའི་བོད་ཟླ་དགུ་བའི་ཚེས་གསུམ་སྟེ་སྤྱི་ཟླ་བཅུ་གཅིག་པའི་ཚེས་གཉིས་ནས་དབུ་བརྩམས་ཏེ་ཉིན་སུམ་ཅུ་ཙམ་གྱི་རིང་ལ། གྲུབ་དབང་རྫོགས་ཆེན་པའི་བསྟན་པའི་མངའ་བདག་༧སྐྱབས་རྗེ་ཡིད་བཞིན་ནོར་བུ་བསྟན་འཛིན་ལུང་རྟོགས་ཉི་མ་མཆོག་གིས་རུ་དམ་ཨོ་རྒྱན་བསམ་གཏན་ཆོས་གླིང་དུ་སྔོན་འགྲོ་ཀུན་བཟང་བླ་མའི་ཞལ་ལུང་གི་བཀའ་ཆོས་ཟབ་མོ་གནང་བ་གཏན་ཁེལ་བས་རིས་སུ་མ་ཆད་པའི་དགེ་འདུན་པ་དང་བྱིས་པ་ལོ་བཅོ་ལྔ་མན་ཆད་ལས་གཞན་དད་ལྡན་ཕོ་མོ་ཚང་མ་ཁྲིད་སྦྱོང་བཅས་ཞུགས་ཆོག་པས་ཐུགས་ལ་ངེས་པར་འཚལ། ད་ལམ་གྱི་ཆོས་ཞུ་བ་ནི། མི་སྐྱ་ཕོ་མོ་ཡིན་ན་ལོ་ངོ་བཅོ་ལྔ་ཡན་སོན་པ་སྐྱབས་གསུམ་འཛིན་པ་དགེ་བསྙེན་ཡན་གྱི་སྡོམ་ལྡན། གསང་སྔགས་ཀྱི་དབང་བསྐུར་ཐོབ་པ། དམ་ཚིག་ཉམས་ཆག་ཕྱིན་མེད་པ་ཕྱིན་ཆད་ཀྱང་སྲུང་མཚམས་ལས་མི་འདའ་བ། སྔོན་འགྲོ་འབུམ་ལྔ་བསགས་ཟིན་པའམ་ཕྱིན་ཆད་བསོག་རྒྱུ་ཁས་ལེན་ཐུབ་མཁན། རབ་བྱུང་བཙུན་པ་བཙུན་མ་ཡིན་ན་དམ་ཚིག་ལྡན་ཞིང་སྲུང་མཚམས་ལས་མི་འདའ་བ་དང་། ལོ་འགའི་ནང་ཚུན་སྔོན་འགྲོའི་བསགས་སྦྱང་དམ་བཅའ་ནུས་པ། ད་ལམ་གྱི་ཆོས་ཁྲིད་སྐབས་སྔ་དྲོ་རྣམས་སུ་འབུམ་ལྔའི་བསགས་སྦྱང་དང་འབྲེལ་ཁྲིད་སྦྱང་དང་། ཕྱི་དྲོ་རྣམས་སུ་ཆོས་ཁྲིད་ཡིན་པས་དེ་ལུགས་མཁྱེན་ཆུབ་ཞུ། གཞན་སྔོན་འགྲོ་ཀུན་བཟང་ཞལ་ལུང་གི་ཡི་གེ་དང་། ངག་འདོན་རྣམ་མཁྱེན་ལམ་བཟང་། མནྡྲལ། སྙིང་ཐིག་སྨོན་ལམ་བཅས་འཛོམས་ན་ལེགས་ཞེས།
གྲུབ་དབང་རྒྱལ་བ་རྫོགས་ཆེན་དགོན་གྱི་ལས་འཛིན་ལྷན་རྒྱས་ནས་སྤྱི་ལོ་.
2016. 9. 13. ཉིན་སྤེལ།