དྲན་པའི་མེ་ལྕེ།
ཟླ་རྒྱུད་པ། བརྗོད་མེད།
སྐྱིད་སྡུག་རེས་མོའི་འཁོར་བའི་རི་གྲོང་ནས།།
ལུས་སེམས་ཀུན་པོ་བརྩེ་བའི་གནས་མལ་དམྱལ།།
ལྷན་འཛོམས་བྱུང་བའི་གནས་གཞི་མཛེས་པོ་དེ།།
ད་བར་ཁྱེད་ཉིད་མེད་པས་མཛེས་ཉམས་ཤོར།།
ཡུལ་དེའི་གནས་དེ་རིག་ན་ཁྱོད་དྲན་པས།།
མེ་ལྕེ་དམར་པོས་བློ་སྙིང་མཆིན་གསུམ་བསྲེགས།
དགུང་དེའི་མཚན་དེར་ཁོ་བོ་ཁེར་རྐྱང་ཡིན།།
དམ་རོགས་མེད་པས་ཆོ་ངེས་ལ་ལང་བཀང་།།
ཁྱོད་རང་དྲན་ཚེ་ཁྲག་གི་མིག་ཆུ་བཞུར།།
རི་སྤྱང་སྔོན་མོའི་མཚན་མཐུན་རྨི་ལམ་དཀྲོགས།
ཁྱེད་ཀྱི་རྒྱབ་གཟུགས་དེ་ལ་ལྟ་བཞིན་དུ།།
གཉིད་ཀྱང་མ་ཁུག་དྲན་པའི་ན་ཟུག་བསླངས།།
རྨི་ལམ་ནང་གི་མི་མོ།
.......... བརྗོད་མེད།
མ་ཉལ་སྔོན་ལ་ཁྱེད་རང་མ་སྒོམ་ཡང་།།
རྨི་ལམ་ཀློང་ན་ཁྱེད་ཉིད་གཅིག་པུ་རེད།།
ཁྱེད་ཀྱི་ཁྲ་ཆུང་མིག་གི་ལྟས་ཙམ་གྱིས།།
ལུས་ཀྱི་བ་སྤུ་གཡོ་ཞིང་གྱེན་དུ་ལངས།།
མཚན་ཐུན་རྨི་ལམ་མ་ཤི་ཁྱེད་རང་རྨིས།།
ཞོགས་ཀྱི་མཚམས་སྤྲིན་ཤར་ན་ཁྱེད་རང་དྲན།།
ལུས་འདི་ཁྱེད་དང་ཁ་ཁ་གྱེས་ཀྱང་རུང་།།
སེམས་འདི་ཁྱེད་ཀྱི་གམ་ན་འཚུབ་ཀྱིན་ཡོད།།
རྟེན་འདི་བྲང་ཁའི་ཤ་དང་འབྲལ་མེད་རེད།།
ཚིག་འདི་སྙིང་ལ་ཟུག་པའི་ཀ་བ་རེད།
མི་འགྱུར་སེམས་ཀྱི་སྙིང་གཏམ་དུམ་གཅིག་པོ།།
ང་ཡི་སྨྲ་ལྕེའི་དབར་ནས་གློད་ལ་འཇོག།
གཞན་གྱི་དུག་ལྕེ་འབར་བ་འཇིགས་སྣང་གིས།།
དྲན་རབས་དུང་རབས་མང་ང་སྨོས་མི་སྤོབས།།
འོན་ཀྱང་མ་བཤད་སྙིང་གི་དཀྱིལ་བཟུང་ན།།
བྲག་ལྟར་ལྕི་བའི་ནད་ཀྱིས་མི་བཟོད་ཀི།།
ཚོར་བའི་སྣང་བརྙན།
ཡིག་རིས་པ། ✒️____བརྗོད་མེད།
མཚན་མོའི་ཟླ་འོད་ངོགས་ནས།།
ལྷ་མོའི་མཛེས་སྡུག་འཚོལ་བྱུང་།།
མིག་གིས་ཅེར་ཅེར་བལྟས་པས།།
སེམས་འདི་གཡོ་འགུལ་ཆེ་དྲགས།།
དགའ་བདེ་བཙན་དྲག་ཆེ་བས།།
འཁོར་བའི་འདམ་དུ་སྙིལ་སོང་།།
འཁོར་བའི་བུ་མོ་ཞིག་གིས།།
ང་རང་བསླུ་ནས་ཚར་རེན།།
ཕྱིར་ན་ཐོབ་བྱ་དབེན་པའི།།
བྱ་དངོས་ཞིག་གི་ཆེད་དུ།།
འདུར་འདུར་རྒྱུགས་རྒྱུགས་ཁྲོད་ནས།།
མི་ཚེའི་རིན་ཐང་ཤོར་སོང་།།