浦东戆度抢菜记

华伦

三年前的“口罩”经历给上海人留下了一段难以抹去的记忆，特重发当时的一篇拙文，既博大家一笑，又提醒大小官僚们千万不要再犯愚昧无知的错误了。 　　1961年，国际戏剧协会奈每年3月27号定为世界戏剧日。而随着上海市防控办呃一则通知，2022年3月27日搿一天呃上海啊忒喜剧了，伊一定可以载入上海开埠一百八十年来呃史册当中。 　　夜到八点刚过，微信里不时出现各式各样蛮噱头呃调侃段子。以下两条特别有代表性。 　　农历壬寅年辰月廿七号丁亥时，勒啦屋里厢关仔两日呃一只浦东戆度，老里八早就躺啦床浪厢快到苏州去哉，瞌冲懵懂呃辰光，勒么桑头听到外头有居委会阿姨勒啦喊：“现在小区暂时解封，明朝五点钟封闭” 凹稍爬起来扎好衣裳，乃仔交乖铜佃冲出小区。 　　已经好几日冷冷清清呃马路浪厢，人是多起多来，人手一只包包袋袋，像煞去迪士尼乐园白相，还有交关汽车像勒啦进行F1比赛，反正迪个辰光啊毋麽369了，侬追我，我超伊，闹盲来遐啦。搿是做啥？原来伊拉侪是去抢菜啊！ 　　我先到离小区最近呃喀吗哆超市：哇！噶许多人啊，快眼滑脚。 　　再走过去一眼是清美鲜食店，进去一看，里厢呃么事老早就抢光了，货架浪厢空荡荡，我额骨头蛮高，最后一只面包总算属于我呃。 　　一个七老八十呃浦东老太勒啦金桥公园南门卖咸菜。 “杜佬官，伲迪呃咸菜刚开鎊，弭道遐暂呃，侬要眼哇？”老太问我。 “几钿一斤啊？”其实我老想买呃，问价钿只是假痴假眼。 “十块。” “嘎矩啊？好糨眼勿啦？” “勿来赛。” “搿麽忒伲来一斤。” “好呃，十只洋钿。” 管伊几钿，买着就是好呃。 “伲呃咸菜自噶腌呃，好吃来遐啦”，走开不远，浦东老太呃声音还勒啦叫。 　　胶东路肉摊头呃江苏老板一面斩肉，一面哇啦哇啦：“快点嘎子来煞，我这快的肉新鲜纳”。 　　台儿庄路胶东路转弯角子浪厢呃超市门口有交乖人勒啦排队，几只五斤横六斤呃黑猫奈仔电喇叭喊：“大嘎排好队，覅插档，补充呃货色再过半个钟头就来哉。” 　　里厢呃货架浪厢空荡荡。 　　水果摊头浪呃么事，只有一眼眼落脚货，马上要毋麽了，我模子大，硬劲轧进人堆，总算抢着了几斤丑八怪。 　　已经11点多了，走到台儿庄路，看到平常一直勒啦伊搿搭买鱼呃小曹老板刚好进了一车鱼，“爷叔，快点嘎来买，拨侬便宜眼，覅称了，25元一条”，我还麽开口，伊倒先问我了。迪搿辰光勿关便宜勿便宜了，就要了鲫鱼、鳊鱼各一条，搿呃恐怕是今朝夜道抢着最满意呃么事了。 　　再走到前一呛经常去白相呃“783棋牌室”呃辰光，看到楼下炒粉店门口摆了一排烂污糟糟呃黄芽菜，几个老俵妹子呃一口江西腔：“快嗲子来卖撒……” “娜妮鬼，还有西里菜莫？” “卯有了，都在郭里了” “那郭个几多钱一斤？” “三十块一颗” “郭贵啊？哈死巴人哦。” 拍拍屁股差路。 　　路过一家小饭店门口，几只赤佬勒啦出送存货，我马上进去又抢了两棵卷心菜，30只洋。生怕等忒一歇歇还要涨价，我啊勿忒伊拉讨价还价了，奈仔就跑。 　　抢着勿少么事了，鲜格格回转屋里厢起哉。伲浦东大娘子开门迎接：“侬转来嘚，买着眼啥么事啊？”我刚要汇报，“哈哈哈！侬迪只戆度，哪恁两只鞋子勿一样呃啦？”低头一看：戆忒了！ 　　搿个就是我迪只浦东戆度昨日夜到抢菜呃全过程。 但愿疫情尽快结束，但愿魔都早日恢复常态。