<p class="ql-block">Sok Ka hti ai：Hpauyam Ma Pri</p> <p class="ql-block"> Moi shong de gahtong langai mi hta jahkrai shan woi dui hkrai nga ai htinggaw myi nga ma ai da, la nyi mi na nhtoi hta gawoi dui go gashu gaba wa sai hte maren ,ngaishu e daini nna go nang an-woi dui a yi naw sa hkyen nu ngu shangun sai da, dai hte maren gashu gaw yi sa hkyen sai da,dai shani yi sa hkyen da nna shana de nta du wa jang, gawoi dui hpe dui e daini yi ngam ganoi mahkra lu hkyen da sai, hpotnyi go sa hkren shakre la na sha ra sai ngu wa tsun tan sai da。</p><p class="ql-block"> Rai yang hpang shani shi yi sa hkyen shakre la ngu sa wa yang, shong shani lu hkyen ton da ai hpun gawa anan ni wa yong hkra hkyen hka mung n-hka ai myi na wa ro rai bai rot dong tu nga mala ai hpe sa mu jajong la nna,nta de nhtang gagat wa nna gawoi dui hpe wa tsun dan sai da.</p><p class="ql-block"> Shaloi gawoi dui go gashu ga dai hpe madat maran la nna , rai yang go ngaishu e hpotni na go ninghkrut la hpai nna she sa nu ,nang yi hkyen ngut jang dai ninghkrut hpe yi ngam ko ton nhtom, ninghtu sanyit lang garang la nna dai ninghkrut ntsa e mara ton da nhtom, nang shara mi ko makoi nga nna lagu yu nga yu,ngu shangun dat sai da ,shaloi gashu mung gawoi dui tsun dat ai hku sa galo ngut nhtom, dai shi hkyen da ai yi shingnom ko hpun hpongkro langai myi tu ai ko rong nga nna mayun yu to nga sai da.shaloi shana yuptung du jang sha nyi shi e hkyen shakrin ton ai yi ngam hta nam na sitnam nat ganu ni she ahtong sha myi lang kau rai,htongka ka nna chyom yan pru wa shajang masai da,shaloi shi yu nga yang she sitnam ganu ni ka nga ka nga rai nna ,bai bai ya go ndai hpun ga wa anam ndai ni rot tu wa na hku bai ka ga ,nga chyom tsun hkat let ka nga ma yang gaja wa dai shani shi hkyen da sai ni mahkra mi na hpun maling zon bai rot tu mat shajang masai da,shaloi shanhte mung loi hkring la nna bai rot ka let ,bai bai ya go ndai hpun kawa anam ndai ni galeng mat na hku bai ka saga, nga bai ka bang ma wa yang ,gaja sha dai hpun kawa ni mung shanyi shi hkyen ai shaloi ganing rai do galeng wa yang ganing rai na ro ro sha bai do galeng wa shajang ma sai da,dai hpang hkring la nna bai rot ka ma yang go ,ya na lang go ja lungseng sutgan lu wa na hku bai ka ga, nga chyom tsun let bai ka she ka manot bang wa ma sai da , gaja sha shanhte ka manot nga ning len shanhte makau grupyin ja lungseng ni go sumpung wa magang sai da.dai hpang ,ya go tinang hpa ra yang hpa bai dum la saga nga bai chyom dum ka manot hpang wa masai da ,shaloi shi go dai hpe mu la nna shanhte ka gabu sham bu nga ma yang dai hpun hpungkro ko nna htim gahkan pro wa nhtom shan hte hpai ai Ahtong dai hpe sa lu gashun la nu ai da ,shingrai shanhte mung hkrit gajong mat ma nna rot hprong mat ma ai majo shanhte Ahtong dai hpe lu gashun la nna nta de la wa nu ai da. Shaloi shi go nta du jang gawoi dui hpe shi yi hkyen shara ko sa mu la ai lam ni hpe a zin a yang wa tsun dan nu ai da.shingrai gawoi dui go na gabu let rai sa rai sa nga ,anwoi dui mung yako nna go hpa ra yang hpa dum la saga ngu nu ai da.dai hpang ko nna go ma dai mung shan woi dui a nta ko sut rai malu masha ni ra shagu go dai Ahtong chyu sha dum dat dat rai ,shanwoi dui a dinghku lanyi hte lanyi laning hte laning nga lusut lusu mat wa masai dai 。</p><p class="ql-block"> Dai ko nna anhte WP amyu sha ni daini du hkra htongka manot hkrang ngu ai ka hpang wa saga ai da。</p><p class="ql-block"> Dai majo ndai htongka manot ka hkrang hpe go ,anhte WP natjo dumsa mawot hkringdat ga hku nga jang hpunkro gaiwang ka hkrang ngu shamying ma ai da。</p><p class="ql-block"> Moi go anhte WP myusha ni yisun hkauna nnan wo la na rai jang htongka shong ka nna she hkyen wo hpang ai nga mung hkai ma ai.</p><p class="ql-block"> Nta galo la na raitim htingra sing ai nga ,htingra tu,shingbut ga garot ai,hpun ngau la ai,lapa sho ai,kawa chyinghkyen mup ai,share da ha sho ai,pali shit ai nga.dai ko nna go shato jun ai,numgo sharot ai,lapa noi ai,share re ai nga, dai hpang hpali hpe shingdit shajup ai,shingngu nkum bu galup ai,dapkop galo ai nga ,dapkop chyingjut mali galo ai nga,ndai hkrang ni ka ngut sai nga jang ,asut sha ing la ai nga bai ka ,hkrang ladat ni yong hpe la shapro let ka gaying nna nhtung maga de asut sha ngang la ai nga bai wa ka gaying nna she nta nnan galo ngut sai ka hkrang hku son ma ai da.</p><p class="ql-block"> Dai ko nna go mayu dama makyin jinghku ni hpe zinlum la ai hkrang hku nna bai ka bang wa ,ndai lang na ka go mayu ka ngu na go chyinghtung maga de ka ,dama ka ngu na go htingre maga de ka ,mayu dama ka ngu ai chyinghtung hte htingre hpe nmai ka nhtang ai nga ma ai.</p><p class="ql-block"> ……1……</p> <p class="ql-block"> Num-won numla htongka go ,num sa sharot la ai ko nna ka ai kumba nhpang chyun ton ai shara ko du hkra ka wa nhtom,num nnan hpe kumba nhpang e wa shadun ton nhtom , kumba do ai ,lakang do ai, kumba chyun na nhkun htu ai, lakang htan ai , kumba chyun ai , ndai hkrang ni ka ngut sai nga jang ,num nnan hpe shang wa nu ngu ai hku kumba chyun ai lakang ko dun shalai ai hkrang hku bai ka rai ,nta nhku de woi bang wa nna dodap hkam nhkring chyai ai sha kalang ta nun nnan gok de woi shang wa nna sutgan mayet maya wa sha ing ya ai nga. wunli lu mu lo ,mayat maya pring mu lo nga bai wa ka gayin ma ai da。</p><p class="ql-block"> Shana de du jang taiyong gun ai nga ,kumba nhpang gun kau ai ,lakang dom ai,shado po ai,kumba po kau ai ,shado jun hka na ga shingbut galup shara kau ai hkrang ngu hku bai ka ,dai hkrang ngut sai nga jang ,dodap ko asut sha ing ya ai nga galang bai wa ka nna she nun nnan la bang ai lamang hpe shangut ma ai da。</p><p class="ql-block"> Lahta de tsun lai wa sai ka hkrang ni hta lai nna anhte WP myu sha ni a htongka go :budang ninglo ka ,wunli shagrang ka,naimam shu la ka ,munau ka,sut ka ,si poi ka,amyu lo lo no nga nga ai.Shingrai hpa lam hku nna wa ka tim ,htongka galang ka yang go ngut hkra ka jang na-yi hkum masun jan daram ka yang she shi a lamang lachyum hpe lu ka shangut ai nga gaba ai ni tsun ma ai lo.</p><p class="ql-block"><br></p><p class="ql-block">2025-1-1</p>