客家民谣——十跌古

长安

[民谣] 十跌古

收集整理/简焕镇

一跌古来涯自家，

冇身衫裤做招牌；

帽子开花裤打结，

冇个亲房看承涯。

二跌古来涯最冇，

冇头青菜冇头禾；

三个石头砌个灶，

八字输人冇奈何。

三跌古来过单身，

冇个老婆来作陪；

地头园尾冇人理，

自家换衣自家洗。

四跌古来涯最穷，

上赊下借行唔通；

亲房叔伯施舍些，

唔使上庵修阴功。

五跌古来愁白头，

镬头冇米煮糠头；

你若问涯怎般煮，

浮浮滂滂满镬头。

六跌古来会发癫，

唔曾嫖赌唔郎当。

只因上代冇风水，

怎知雪上又加霜。

七跌古来真寒碜，

常是睡眠心唔安；

三餐饮汤冇么食，

裤带束紧吞口涎。

八跌古来想唔通，

只得动手锯竹筒；

上代祖宗冇经传，

背起竹筒讨饭来。

九跌古来真苦凄，

睡眠冇席又冇被；

蓑衣拿来当被盖，

缩头缩脚象鲢鲤。

十跌古来涯最衰，

十回喜事冇一回；

常愿涯有喜事做，

会将亲房都请齐！

注：

①跌古，客家话，“丢脸”的意思。

②涯，客家话“我”。

③自家，即自己。

④看承，“看得起”之意。

⑤冇，客家话，“没有”的意思。

⑥唔，客家话，“不”的意思。“唔使”，即不必。

⑦浮浮滂滂，即漂浮的样子。

⑧鲢鲤，是客家人对穿山甲的另称。

🔺此民谣上个世纪中叶在客家人中广为流传，且版本多样。这里这个版本，我认为比较有代表性，根据上下文，略作调整和个别修改后，供客家人共享，并欢迎赐教！