龙年大吉

文立

　　甲辰年是龙年，借旅日著名书法篆刻家、画家沈强的作品拜年。

　　伊拉屋里厢老大沈津是顶尖的版本学家，著作等身，享誉海内外。

　　老二沈平是著名水彩水墨画、油画家。伊向明中学初中毕业就一腔热血去了新疆，后到浙江美院学习，现定居香港。

伊有全国美协、香港文艺界等一大串艺术方面的头衔，作品拨交关美术馆、博物馆、大机构搭私人收藏。

　　不过，今朝“海上三沈”勿是重点。㑚看看照片就晓得了。

　　到老城隍庙轧闹猛去了。

　　豫园老底子叫老城隍庙，是城隍老爷接受老百姓香火搿地方。

　　现在是一大片商场，加上龙年灯会，人多得来吓煞外国人。

　　因为前二日落雨，因为年三十不开灯，因为年初一开始卖票，所以小年夜游人摩肩接踵，轧得一塌糊涂是一眼勿奇怪了。

　　票价80元，小夫妻加大宝二宝要300多，小年夜再轧，省两钿总归好咯。

　　不过还是值得去咯，毕竟五彩缤纷，流光溢彩，介许多人，有点“年”味道。

　　人侪有点怪，心里烦咯辰光想一介头清静点，望望天空发呆。

不过过年辰光听勿到炮杖，看勿见烟火，弄堂里呒沒野蛮小鬼头套野狐脸、手拿木制大刀长枪冲来冲去，勿象过年。

也懒得拜年了，覅讲上门，连拜年片也勿寄了，微信里点个表情包群发算数。

所以有地方人轧人也蛮开心咯。何况覅铜钿。

　　既然龙年，当然希望神龙赐福。

　　中国字里“九”是吉利的数字，象征完整到极致。所以有九九归一，九五之尊，九宵云，九龙壁，九龙灯彩...

　　走城隍庙九曲桥当然也是本地人过年要做咯功课。

　　“过年走走九曲桥，一年烦恼侪扫光”。

　　九曲过，万事顺。

　　走过九曲十八弯后，带来顺利搭平安。

　　上九曲桥老远就有木牌告示，排队180分钟。其实，有点吓吓野人头咯，真正排队一个多钟头就轧到桥头了。

真心佩服滿头白发，个子娇小的老太太，据讲有90多岁了，老当益壮勿是吹的。过了年，又大一岁了。

走九曲桥意思是送走曲折搭困难，迎来顺利搭平安。是祈福咯行为。

更是龙马精神，奋勇向前。

　　人家讲:老人走九曲，活到九十九；小囡走九曲，考试九十九；情人走九曲，天长又地久。

所以小小囡骑勒老爸头上也要过九曲桥，何况两旁边五颜六色、千奇百怪咯花灯。

　　轧闹猛辰光，人长有明显好处，想起老里老早一句笑话:长脚看戏，矮子急煞。

　　还好灯多、地方大、秩序尚可，尽管不可能侪看到，但总归会看到交关多风景。回去睏觉一定会做场好梦。

　　总算呒沒白来一趟，对得起一身汗了。

拨呒沒机会去轧闹猛咯亲朋好友看一眼。

真心希望祥龙降福人间，带领凡夫俗子走过九曲十八弯，平安康宁。

　　甲辰年初一。