<p class="ql-block"><b>要过新年了，一直讲"干净冬至邋遢年"，今年额冬至太阳老好，难么、伐晓得戈额年天气会的哪能🧐🧐</b></p><p class="ql-block"><b>再继续试试用上海闲话写两句——</b></p> <p class="ql-block"><b>两月两号 阴天 肆到陆度</b></p><p class="ql-block"><b>今朝是北方额小年(老早好像伐大听到戈种讲法额，要么小年夜)，是讲北方小年开始、就是"年"开始了；好伐，个么就扫扫揩揩准备过新年伐。</b></p> <p class="ql-block"><b>两月肆号 落雨 叁到陆度</b></p><p class="ql-block"><b>戈额小人阿是蛮折腾额，寻了额落雨天搬场，戈算是"有财有势(水)"？好伐好伐，借额"吉时"、接下来顺顺当当......</b></p> <p class="ql-block"><b>两月陆号 阴丝呱嗒 壹到叁度</b></p><p class="ql-block"><b>真额有点像是"干净冬至邋遢年"了？戈两天一直雨水嘀嗒、阴丝呱嗒，难过来！埔了窝里画两张图备了嗨，到辰光做两张过年祝福卡，阿算是"自创"来、伐是"舶来品"✧٩(ˊωˋ*)و✧</b></p> <p class="ql-block"><b>两月捌号 多云 壹到柒度 小年夜</b></p><p class="ql-block"><b>小年夜了，先自噶窝里三个人小年夜过起来，戈小人搬到噶远额地方去，下趟阿伐晓得会的多少辰光回来恰趟饭......</b></p> <p class="ql-block"><b>两月玖号 多云 壹到伍度 大年夜</b></p><p class="ql-block"><b>今年额大年夜窝里闹猛来，阿妹妹夫勒勒上海过年、大头外甥外甥新妇勒勒上海过年、再加上阿拉一家，老妈今年开心了。今朝勒勒阿妹窝里自噶烧，冷盆热炒、年年有鱼、柿柿如意...过年额彩头一样伐少</b></p> <p class="ql-block"><b>两月拾号到拾贰号 天老好额 叁到拾伍度之间</b></p><p class="ql-block"><b>年初一到年初三、老天爷还是老帮忙额，太阳老好、阿蛮暖热，寻了只好勒勒一道闹猛过年额地方----太阳岛森林别墅。聚勒一道看舞狮子、放烟火，到游乐场打打保龄球、射射剑、溜溜冰，捂了别墅里打牌额打牌、唱歌额唱歌，中廊相有太阳额辰光还可以勒勒外头场地埌弄弄烧烤咭，回来额辰光顺带便到朱家角去走走，埔埔太阳咭咭茶......</b></p> <p class="ql-block"><b>两月拾叁号到拾陆号 四天里头落了一天雨 </b><b>两到廿贰度</b></p><p class="ql-block"><b>年初四到年初七，四天里头从最高温度廿贰度跌到最低温度两度，戈天气真额是恰伐消：</b></p><p class="ql-block"><b>初四：休整、埔勒窝里，围炉家庭影院看《非诚勿扰3》</b></p><p class="ql-block"><b>初五：今年额迎财神跟情人节碰了一道了，天气阿老暖热，到曲水园兜了一圈</b></p><p class="ql-block"><b>初六：落雨了、但是约了好朋友，戈肯定是伐好错过额，寻了只室内额地方、咭咭下午茶嘎嘎噻唔阿是老开心额。</b></p><p class="ql-block"><b>初七：天到是蛮好额、就是有点冷，就勒勒窝里整理整理阳台埌相额花花草草伐，交关辰光么关心伊拉了</b></p><p class="ql-block"><b>...... ...... ......</b></p><p class="ql-block"><br></p> <p class="ql-block"><b>两月廿号以后 </b><b>一日到夜勒勒落雨 </b><b>冷么冷来索索抖</b></p><p class="ql-block"><b>元宵节前头几天，开始"倒春寒"了，一天到夜滴滴答答、温度阿老低，冷的来呱呱抖，只好勒勒窝里整理整理戈号头画额图。</b></p> <p class="ql-block"><b>两月份辰光少、下半额号头天又伐好，记录额事体阿就少了，只好抬慢大家随便看看了( •̥́ ˍ •̀ू )......</b></p>