<p class="ql-block">Shata 3 nhtoi 25 ya shani,Yinkyang ginwang Jinghpo wunpong amyu sharot hpaji rumru hpung Nhkum krung garan hpung ni, gatsi pyo la ai Hkaibangya hka nong makau Namling mare ko Jinghpo Wunpong amyu htunghking maka dup sumru zuphpong woi hpo ma ai. Dup sumru hpong hta, mungdo tsang asuya rung hpaji jo salang lit gun yu ai Jinghpo wunpong amyu labau hpaji sagon sumru sara gaba Manam Tong hte mungdo Jinghpo wunpong amyu sharot hpaji sumru hpung gasa ni, Yinkyang ginwang amyu sharot hpaji hpung ningbo ni Nhkum krung Ginwang do na pati asuya ningbo ni, Sama gat mare, Nongjang gat mare hkan na gasa ni hte Nhkum krung gahtong shagu na gasa ni masha 500 daram dup sumru hpong hta du dung ma ai.</p> <p class="ql-block">Jahpot hkying 9 hta manam ni du sa wa mara hte maren, Nhkum krung buga na Jinghpo wunpong amyu sharot hpaji sumru hpung masha ni gabu gara rai Chying bau dum sharat, Htongka ka manot, madum sumpyi yu-ngui nsen sho rai manam ni hpe hkap hkalum tau la ma ai.</p> <p class="ql-block">Zuphpong hpe jahpot go htongka maka jom jahkrup, shat lit bo sharin, shana de go zuphpong hta sa du dung nga ai ningbo ni matsun madun ai mungga jom madat la, sara gaba Manam Tong Jinghpo wunpong amyu sha ni a ginru ginsa labau tsun sanglang dan ai jom madat la rai nhtom, shat jam jam sha na hpaji mung sharin hkam la sai.</p> <p class="ql-block">Sara gaba <b style="color:rgb(1, 1, 1);">MANAM TONG</b></p><p class="ql-block">Jinghpo wunpong myu sha labau ginru ginsa hkai tsun dan nga ai</p> <p class="ql-block">Yin kyang Ginwang amyu sharot hpaji sumru hpung ningbo LAHPAI NO Zunhpong hta Hpaji jo ga shaga nga ai</p> <p class="ql-block">NhkumKrung ginwang do Mungchying Asuya rung up LASHI KO Zuphpong hta Hpaji jo ga shaga nga ai</p> <p class="ql-block">NhkumKrung amyusharot hpaji sumru hpung mu gun madu NHKUM YO zuphpong hkap tau hkalum ga shaga nga ai</p> <p class="ql-block">Zuphpong hta NHKUM GUMTUNG TU go Jinghpo wunpong amyu sha ni Nbo nnyeng udi tsahku magun shat lit gun hkungga hkat ai lachyum hte Num la num ya Hpu ja nau nan lit li ai lam galai shai wa na matu tsun ginlen ndau shabra nga ai</p> <p class="ql-block">Zuphpong hta MYI-TUNG BOM SAU go Anhte amyu ni poi lamang shagu masat masa nnga ai magun lit htom gun sharuk hkat ai ron lai ni galai shai kau ga nga tang ndau nga ai</p> <p class="ql-block">Zuphpong hta SHAMHPAU WANG go Jinghpo wunpong amyu sha ni Htunghking Shatjam hpe nmai shamat kau ai nga so ndau nga ai</p> <p class="ql-block">Zuphpong hta tsun ai, anhte Jinghpo wunpong amyu ni nga ginra nbung ai majo, htongka maka loi shai hkat ai hte rau, hkungga jo jau lit, ningsin Ja ka shon lit, Dingshon poi shat lit, Hkungran poi shat lit re lit amyu myu bo yang loi shai hkat nga ai, ya daini jom sharai ton ai Htongka maka, Lit bo htunghking hpaji ni hpe Nhkum krung buga ni shong shabung shara nna, kasi gaja tai lu hkra shakut nhtom, kaga buga shagu de shachyam hkrat wa ga. Bai nna, anhte a Num bon num la htung hta mung, num sha hpe nau jahpu shanak ai nhkan e, hpu ja sen lam du mat wa ai majo, num langai mi hkungran la yang, n lu n lom nga ai dinghku grau nna yak-hkak wa nga ai, dai hpe hpu ja tso dik Mun 6 ko nna n lai ai sha, Mayu da-ma lahkong maga myit pyo hkra galo ga, poi shani shat lit gun sa ai ni mung majoi mi gun sharut bang ai hku n re sha, Jinghku agying rai nga ai ni gun sa jang rai sai, nhtang de n ta madu ni hpe sharu shayak sha ai hku go n-galo ga, Asuya tara hta masat da ai hte maren, poi lu sha hpe mung shadon sharam nna galo ai hte rau, tsom htuk ai hku lu sha ga, Tsa chyaru ka-ni nanghpam lu sha hpe koi gam let, ngui pyo ai dinghku byin tai hkra shakut ai hpe madung dat ga,nga ai.</p> <p class="ql-block">Lahta de tsun lai wa ai lam mi hpe ndai ko tsun nna ndai ko bai ton kau ai hku nre sha, Nhkum krung Jinghpo wunpong amyu sharot hpaji sumru hpung ningbo ningla ni, Mare gahtong ningbo ningla ni ko nna woi galo shatup hkrat wa ga, Nhkum krung Jinghpo wunpong amyu sharot hpaji sumru hpung ko nna mung shawa masha ni yong hkan sa lu hkra, hpung dazik dok nna shana hkyem nga ai, ya daini ndai zuphpong hta du dung nga ai gasa ni shada shana hkat nna, anhte buga hpe grau tsom htap hkra go maden hkrat wa ga,nga ai.</p> <p class="ql-block"><span style="color:rgb(1, 1, 1);">Mungdo Jinghpo wunpong amyu sharot hpaji sumru hpung gasa ni hte Nhkum krung Jinghpo wunpong amyu sharot hpaji sumru hpung ningbo ni go, nhtoi 25 ya shana hte 26 ya jahpot zuphpong hta tsun ai lam galo shatup hkrat wa na hte seng nna ladat jom sho ma ai, jahkrup ra ai jahkrup ngut nna nhtoi 26 ya shana de she bra ma ai.</span></p> <p class="ql-block">供稿:盈江县景颇族发展进步研究学会铜壁关分会</p>