གྲགས་སྙན་གདུགས་དཀར་གཅིག་གིས་ས་སྟེང་ཀུན།།
མངོན་མཐོར་བྱེད་པ་གྲུབ་དབང་རྫོགས་ཆེན་པ།།
ཡབ་སྲས་བརྒྱུད་པར་བཅས་པའི་ཞབས་ཀྱི་རྡུལ།།
ས་གསུམ་ཀུན་དགར་བྱེད་པས་ཤིས་གྱུར་ཅིག།
འཇམ་མགོན་མི་ཕམ་པས།
དགེ་ལེགས་ངོ་མཚར་བྱེ་བ་འབྱུང་པའི་གནས།།
ཐུབ་བསྟན་ཡོངས་རྫོགས་པདྨོ་དགྱེས་པའི་གཉེན།།
སྨྲ་པའི་ཉིན་བྱེད་གྲུབ་དབང་རྫོགས་ཆེན་པའི།།
ཐུགས་བསྐྱེད་བསྟན་པ་མཐའ་རྒྱས་བཀྲ་ཤིས་ཤོག།
མཁན་ཆེན་པདྨ་བཛྲས།
མདོ་རྒྱུད་རིག་གནས་བཅས་པའི་གཞུང་ལུགས་ཀྱི།།
ཆོས་ཀྱི་རྔ་ཆེན་ལེགས་པར་སྒྲོག་པ་ཡི།།
ཆོས་ཀྱི་སྡེ་འདིར་ཆོས་དང་སྲིད་ཀྱི་དཔལ།།
ཐམས་ཅད་ཡིད་བཞིན་ལྷུན་གྱིས་གྲུབ་གྱུར་ཅིག།
འཇམ་མགོན་མི་ཕམ་པས།
ཐེག་པའི་ཡང་རྩེ་ཤིན་ཏུ་རྣལ་འབྱོར་སྡེ་གསུམ་ཀློང་དགུའི་ཤིང་རྟ་ཆེ།།
རྫོགས་ཆེན་པ་ཞེས་མཚན་གྱི་གྲགས་པས་ཁོར་ཡུག་རི་བོའི་ཁོངས་ཁྱབ་པ།།
ཡབ་སྲས་བརྒྱུད་པར་བཅས་པ་ཀུན་གྱི་བཞེད་དོན་ཕྲིན་ལས་ལྷུན་གྲུབ་ཅིང་།།
བསྟན་འཛིན་འདུས་པའི་སྡེ་ཚོགས་རྣམས་ཀྱང་དབྱར་གྱི་མཚོ་ལྟར་རྒྱས་གྱུར་ཅིག།
མཁན་ཆེན་པདྨ་བཛྲས།