<p class="ql-block"> 今朝蒙西菜场开张了，好象搿是抗疫以来第一家开市咯正正经经咯大型室内小菜场。朋友一早去过了，觉着呒啥气氛，因为菜场一天规定要消杀三趟，而且控制50%人流，摊位也呒没全部摆出来。伊发了几张照片给我，而且问我为啥勿写点埃歇辰光买小菜咯好白相事体？</p><p class="ql-block"> 当年，买小菜对有点要求咯人家来讲，可以算作是一桩大事体了。屋里呒没冰箱，买菜一定要算好，勿多勿少，还要荤素搭配。买鱼买肉买素菜，以及买鸡蛋豆制品侪要凭票，勿可以吃了月初苦了月末。</p><p class="ql-block"> 冬天咯小菜场，天还呒没亮就闹猛起来了。菜场营业勿叫开门，也不叫开市，叫作“开秤”，一般是清晨六点钟。所以，要买到好小菜一定要五点钟起来，六点前到小菜场合适咯摊位前就位。住勒愚园路江苏路附近咯居民，侪到“诸安浜菜场”去买菜。菜场横跨江苏路，分东浜脱仔西浜，买肉勒东浜，买鱼勒西浜。出门买菜要盘算清爽，先到了小菜场简单兜一圈，捡要花最多辰光咯队伍后面立脱一歇，地上摆好一只屋里带去咯旧蓝头，再寻块砖头放勒里厢。等到身后有两三个人排上来了，就客客气气地叫一声阿姨：“谢谢侬帮我照顾一下哦！”然后，抽只空档去买其它小菜，后头咯阿姨会顺便帮我一路倷旧蓝头踢上去。</p><p class="ql-block"> 咸朝子，小菜场里排队摆只旧蓝头是常有咯做法，大家相互关照，从来勿会吵相骂。后来，挂蓝头（集合竞价）、刮鱼鳞（进进出出赚点小钞票）还流行到了股市交易。“半斤八两”、“摆勒蓝里侪是菜”、“斤斤计较”等，还运用到了日常生活当中。</p><p class="ql-block"> 中学毕业，阿拉班里有好几个同学分勒区副食品公司，听起来蛮好听，其实就是就近分配到小菜场工作，一个女同学为此哭了几天几夜。伊哭煞，阿拉暗地里笑煞，买菜好便当交关！后来，每当排队到肉摊面前还有一两个人咯辰光，伊会从柜台下面，拖出一块最好咯肋排……我一个中学同班同学现在还勒卖肉，当然伊老早做老板了，阿拉屋里咯阿姨去买肉，总归会得到照顾。</p><p class="ql-block"> 卖肉师傅开秤，手里有三样必备工具，一把磨得锃亮的月牙形大劈刀，一杆红木带铜弯钩咯称，还有一只方方咯铜鈿箱。小木箱最上面一格是一只可以滑动咯小木盘，下面竖向分成两隔，木盘里放分币，下面分别放大面额和小面额钞票。卖肉师傅咯绝技就是一刀准，当然还要用秤钩倷肉钩起来复称一遍给顾客看。当年买肉是桩大事体，大家侪算好了钞票买，如果师傅老是倷肉切多了，弄下来就变成了零碎，买到最后要亏本咯！</p><p class="ql-block"> 肉票往往不够用，假使有肉摊师傅帮忙，就可以经常买点肉骨头或者猪脚爪，回去笃一镬子黄豆汤，鲜得不得了！一到春节前，肉摊师傅绝对行巧，因为每家每户侪希望买一只多带点腿肉咯猪后蹄，再买几块勿要忒大咯大排。大家侪赶早去排队，我认得卖肉师傅当然要心定交关。如果辰光晏忒勒，热气肉（没有入过冷库的新鲜猪肉）买光，剩下来咯侪是冷气肉就煞风景了，一早浪厢排队算白排，明朝还要再赶早。</p><p class="ql-block"> 埃歇辰光，谈婚论嫁，时髦咯是一把大刀（菜场营业员）、白衣战士（医生）、车轮滚滚（司机）、红旗飘飘（当兵的）。当然勒菜场里工作买肉是最嗨威咯，由于欢喜吃肉，所以我买肉最起劲。如今吃肉已经勿稀奇了，但复杂了交关，一是，怕吃多了发胖；二是，黑毛猪、白毛猪，爱森肉、正大肉，搞也搞勿清爽，还歇歇不停听讲有瘦肉精脱仔糜猪肉。</p><p class="ql-block"> 小菜场里咯故事交关多，有空再聊年轻人看不懂咯“盆菜”哦！</p>