梦花街馄饨成了网红，要排四个钟头队侪能够吃到。拥趸讲：“赞嗰，赞嗰，大馄饨里是大肉圆，小馄饨里是小肉圆。”其实，迭句闲话是错嗰。馄饨勿是以大小论英雄，大馄饨，小馄饨虽然侪叫馄饨，侪有皮子搭仔馅子，实际上厢浑身不搭界。大馄饨搭小馄饨皮子不一样搿。大馄饨皮子厚，可以尽量多包点馅子，小馄饨皮子薄，不需要多少馅子。大馄饨或者纯肉、或者荠菜、或者菜肉侪好吃，馅子多多嗰就是要吃饱，因为技术含金量勿高。每家人家侪会做，心里厢自认为伊拉姆妈做嗰顶顶好吃。所以点心店里厢出品不容易讨好。搿能一来，小馄饨就显出来了。 小馄饨是吃味道，味道一定要好。侬覅看包小馄饨像白相一样，左手摊开来摆皮子，右手拿一根竹爿刮一点肉，左手随手一捏就是一只，其实绝对不简单。水里厢一下，盖头一盖。一歇歇功夫，打开盖头，加一眼眼冷水，等到碗里舀好鲜汤，洒上蛋皮丝，再舀上馄饨，勿但勿会得散开来，外加特别飘逸。半透明搿皮子里厢，映出几点肉糜，让人产生邪念，想起“食色性也”侪句闲话。 上海人吃到难吃侪菜，欢喜骂一声“安徽料理”。其实安徽料理蛮好吃侪。而小馄饨搿“老爹”柴爿馄饨倒真搿是安徽料理。百把年前，山东人闯关东，安徽人闯上海滩。伊拉做一副“骆驼担”，皮子、馅子、碗、筷、柴爿应有尽有。 夜里厢担子挑到弄堂里，“笃、笃、笃笃笃”梆子一敲，就有篮头从贰层楼或者亭子间里厢吊下来，里厢有一只碗，几文铜钿，小贩现包现下，一歇歇下好啦。拉拉绳子，上面拉上去，一碗馄饨热气腾腾搿就可以啦。我小辰光吃过搿，味道真勿错。 <p class="ql-block">小馄饨啦“爷”叫“绉纱馄饨”，迭嗰是形容馄饨下好仔勒垃汤里厢上下飘搿辰光像“绉纱”一样。三十年前头噢我勒垃报社里厢上班，有一趟呢出去采访，回报社搿辰光肚皮里厢空空落落，乘电车回报社。一时晏不到吃夜饭搿辰光，眼睛四面嗰寻找，晏呒没寻到啥嗰好吃搿点心，鼻头里已经闻到香鲜嗰味道。勒垃一条弄堂口，挂着”绉纱馄饨“嗰牌子。三步并两步奔过去，叫了一份馄饨，等到坐好位子，一歇歇馄饨已经下好了，用铁丝手抓到我面前。虽然馋，却勿敢马上进嘴巴。等到”哧嗞、哧嗞“进嘴巴一尝，烫得鲜得来讲勿出闲话来。一直到上电车坐上位子，挨勒垃为尴里勿尴尬搿辰光，吃到介鲜搿馄饨咋嘴巴。现在侬已经晓得啦，小馄饨就像一嗰“嗲妹妹”，绝对勿是粗头粗脑嗰大馄饨可以相比搿。</p>