<p class="ql-block">ཨོཾ་བདེ་ལེགས་སུ་གྱུར་ཅིག །</p><p class="ql-block">འཕགས་མཆོག་ཕྱག་ན་པདྨོའི་གདུལ་བྱའི་ཡུལ།།</p><p class="ql-block">གངས་ལྗོངས་ས་ལའི་སྨན་གྱི་ཡུལ་ཁམས་ཀྱི།།</p><p class="ql-block">མདོ་སྨད་རྟ་ཡི་ཆོལ་ཁའི་ཞིང་ཁམས་ཀྱི།།</p><p class="ql-block">འབའ་ཡུལ་མཐོང་བ་ཀུན་སྨོན་ནང་རོལ་དུ།།</p> <p class="ql-block">ལྷ་དང་བླ་མའི་ཐུགས་རྗེའི་བྱིན་མཐུ་དང་།།</p><p class="ql-block">ཡི་དམ་དཔའ་བོ་མཁའ་འགྲོའི་ནུས་མཐུ་དང་།།</p><p class="ql-block">སྔོན་གྱི་ཚོགས་བསགས་བཟང་པོའི་བཀོད་པ་ཡིས།།</p><p class="ql-block">རྙེད་དཀའ་དལ་བའི་ལུས་རྟེན་བཟང་པོ་ཞིག །</p> <p class="ql-block">སྤྱི་ལོ་ཉིས་སྟོང་བཅུ་དགུའི་ཚེས་བཟང་སྟེ།།</p><p class="ql-block">ཉི་ལྡོག་བྱེ་འགྱུར་དུས་ལ་བདག་ཁྱིམ་དུ།།</p><p class="ql-block">ངུ་ངག་དབྱངས་ལ་འདྲིས་ནས་མགྲོན་དུ་སླེབས།།</p><p class="ql-block">ཕོ་མཆོག་མོ་དམན་ལྟ་བ་མེད་ཡང་།།</p><p class="ql-block">གཡང་ཁྱིམ་གྲུ་བཞིར་མི་ལོ་གཉིས་ཙམ་འགོར།།</p><p class="ql-block">གཅེས་པའི་བུ་ཁྱོད་ཨ་ཕའི་ལག་རྟེན་ཡིན།།</p><p class="ql-block">སྙིང་གི་བུ་ཁྱོད་ཨ་མའི་སེམས་རྟེན་ཡིན།།</p> <p class="ql-block">དལ་འབྱོར་ལུས་རྟེན་ཡང་ཡང་རྙེད་དཀའ་བས།།</p><p class="ql-block">ཆུད་པར་མ་བཟོ་མི་ཚེ་དོན་བྱོས།།</p><p class="ql-block">ལས་དང་རྒྱུ་འབྲས་རང་གི་མིག་བཞིན་སྲུངས།།</p><p class="ql-block">ཕ་མ་རྒན་པ་མགོ་བོའི་ཞྭ་བཞིན་བཀུར།།</p><p class="ql-block">མཉམ་པ་གྲོགས་ལ་བརྩེ་བའི་དར་གྱིས་ཆོངས།།</p> <p class="ql-block">རིག་པའི་གནས་ལ་ཉིན་མཚན་ཁྱད་མེད་སྦྱོངས།།</p><p class="ql-block">ཕ་མེས་སྲོལ་བཟང་རྒྱུན་པར་རྒྱུན་འཁྱོངས་གྱིས།།</p><p class="ql-block">གཡོ་སྒྱུ་ཁྲམ་གསུམ་བྱ་བ་རིང་དུ་སྤོངས།།</p><p class="ql-block">གཡོ་མེད་དྲང་བའི་ལམ་ལ་ལེགས་ཞུགས་ནས།།</p><p class="ql-block">རང་གི་ནུས་པས་ཀུན་ལ་ཕན་སེམས་སྐྲུན།།</p> <p class="ql-block">འདི་འདྲའི་རེ་བའི་ཚིག་གིས་མདུན་བསུས་ནས།།</p><p class="ql-block">གཅེས་ཕྲུག་བུ་ཡི་སྐྱེས་སྐར་དུས་བཟང་ལ།།</p><p class="ql-block">བཀྲ་ཤིས་ཁ་གཡང་སྟོང་གི་མཆོད་པ་འབུལ།།</p><p class="ql-block">ཚེ་དཔག་མེད་ཀྱིས་ཚེ་ཡི་དངོས་གྲུབ་བསྩོལ།།</p><p class="ql-block">འཇམ་པའི་དབྱངས་ཀྱིས་ཐུགས་ཀྱི་དངོས་གྲུབ་བསྩོལ།།</p><p class="ql-block">འཕགས་མ་སྒྲོལ་མས་འཕྲིན་ལས་རྒྱས་པར་མཛོད།།</p><p class="ql-block">དཀོན་མཆོག་བླ་མའི་དུས་རྒྱུན་སྐྱབས་སུ་བཟུང་།།</p> <p class="ql-block">ཁ་ལས་ཁྱུང་ཆེན་བཞིན་དུ་བསྐྱོད་པར་ཤོག །</p><p class="ql-block">སྙན་གྲགས་འབྲུག་སྒྲ་བཞིན་དུ་གྲགས་པར་ཤོག །</p><p class="ql-block">དབང་ཐང་སེང་གེ་བཞིན་དུ་བརྟན་པར་ཤོག །</p><p class="ql-block">དཔལ་རྩལ་རྒྱ་སྟག་བཞིན་དུ་ཆེ་བར་ཤོག །</p><p class="ql-block">མདོར་ན་ཅི་བསམ་མ་ལུས་འགྲུབ་པར་ཤོག །</p> <p class="ql-block">སྤྱི་ལོ་༢༠༢༡ལོའི་ཟླ་༡༢པའི་༢༢ཉིན་དབང་མིང་བས་བུའི་སྐྱེས་སྐར་ལ་རང་མལ་དུ་ཤར་མར་བྲིས་པ་དགེའོ།</p>