<p class="ql-block">རྨ་ཆུ་རྫོང་དབལ་པཎ་ཚང་ཞག་སྡོད་སློབ་གྲྭའི་བོད་སྐད་ཡིག་ཁྲིད་དཔྱོད་ཁང་གིས་བསྒྲུབས་པའི་རིག་གནས་ཡར་སྐུལ་ཞེས་པའི་སྐབས་གཉིས་པའི་བོད་སྐད་ཡིག་གི་བློ་འཛིན་བྱེད་སྒོ།</p> <p class="ql-block"> ཇི་སྐད་དུ། དང་བོ་ཚིག་ལ་བྱང་བྱ་ཞིང་། །དེ་ནས་དོན་ལ་མཁས་པར་བྱ། །ཞེས་པ་ལྟར། སྐད་ཡིག་བློ་རྒྱུགས་འགྲན་སྡུར་སྤེལ་བའི་དམིགས་ཡུལ་ནི་སློབ་མའི་སློབ་སྦྱོང་གི་འགན་བབས་ལེགས་འགྲུབ་དང་སྐད་ཡིག་ལ་སྦྱངས་བརྩོན་གྱི་འདུན་པ་ཇེ་ཆེར་འགྲོ་བ། སློབ་མར་སྐད་ཡིག་སློབ་གཉེར་གྱི་གོམས་གཤིས་བཟང་པོ་རྒྱུད་ལ་གོམས་པ། སློབ་མའི་བློ་འཛིན་ནུས་པ་གསོ་སྐྱོང་དང་སློབ་རའི་སྐད་ཡིག་གི་སློབ་སྲོལ་བཟང་པོ་རྒྱུན་འཁྱོངས་བྱས་ཏེ། ཚིག་ལ་བྱང་བ་དང་དོན་ལ་གཞིགས་ཐུབ་པ་ལྟ་བུའི་བོད་སྐད་ཡིག་གི་རྨང་གཞི་མཐོར་འདེགས་དང་སྲ་བརྟན་ཡོང་བར་དམིགས་པ་ཡིན། </p><p class="ql-block"><br></p> <p class="ql-block">དཔེ་ཀློག་གི་མྱོང་བས་བསམ་གཞིགས་ཀྱི་སྒོ་མོ་ཕྱེས་ཐུབ་ལ། དཔེ་ཀློག་གི་འཚོ་བས་ནང་སེམས་ལ་རང་དབང་བསྣམས་ཡོང་བས་མཉམ་དུ་སྤྲོ་སྐྱིད་ལྡན་པའི་དཔེ་ཀློག་ལ་ཞུགས།</p> <p class="ql-block"> དཔེ་ཀློག་ནི་སྤྱི་སྒེར་ཡོངས་སུ་མ་ལུས་པ་ཡར་རྒྱས་སམ་རྒྱལ་ཁའི་བརྩེགས་ཐོག་ཏུ་འཛེག་པའི་སྐས་རིམ་ཡིན། དཔེ་ཀློག་ནི་ཁྱེད་དང་ངའི་སྔ་ན་མེད་པའི་བློ་རིག་གི་སྒོ་མོ་ཕྱེ་བའི་ལྡེ་མིག་ཉག་གཅིག་པུ་དེ་ཡིན། དཔེ་ཀློག་ནི་ཁྱེད་དང་ངའི་གཞན་ནས་མི་རྙེད་པའི་འཆར་སྣང་དང་གསར་རྩོམ་གྱི་འབྱུང་ཁུངས་ཡིན། དཔེ་ཀློག་ནི་ཕྱགས་ཆས་ཤིག་དང་འདྲ་བར་མི་རྣམས་ཀྱི་རྣམ་ཤེས་ཁྲོད་ཀྱི་ནག་ཐིག་མེད་པར་བཟོ་ངེས། དཔེ་ཀློག་ནི་ངའི་བདེ་སྐྱིད་ཀྱི་འབྱུང་ཁུངས། མི་ཚེ་ཡི་མགུལ་རྒྱན། མདུན་དུ་བསྐྱོད་པའི་སྤོབས་ཡིན་པས། མི་ཚེ་གང་བོར་ལོངས་སུ་སྤྱོད་ངེས།</p> <p class="ql-block">བཤེས་གཉེན་ཁྲི་གདུགས་ཉི་མའི་ཐུགས་རྒྱུད་ཀྱི།།</p><p class="ql-block">ཡོན་ཏན་འོད་ཀྱི་ཟེར་བརྒྱས་ཡོངས་འཁྱུད་པའི།།</p><p class="ql-block">བློ་གསལ་ཉིན་རེར་འཕེལ་བའི་ཟླ་བ་གཞོན།།</p><p class="ql-block">སྨིན་ཏེ་རྒུད་པའི་མུན་པ་སེལ་གྱུར་ཅིག།།</p> <p class="ql-block">རྨ་ཆུ་རྫོང་དབལ་པཎ་ཚང་སློབ་གྲྭའི་བོད་སྐད་ཡིག་ཁྲིད་དཔྱོད་ཁང་གིས།༢༠༢༡ལོའི་ཟླ༡༠་བའི་ཚེས༡༨ཉིན།</p>