<p class="ql-block">དབྱངས་གསལ་སོ་བཞིའི་གླུ་ཆུང་སྙན་པའི།།</p><p class="ql-block">ཤེས་རིག་སློབ་གྲྭའི་སྒོ་ཐེམ་རེ་རེར།།</p><p class="ql-block">ཐོས་བརྩོན་རིག་པའི་སྐོར་བྲོ་འཁྲབ་བཞིན།།</p><p class="ql-block">མི་ཚེའི་འདུན་མ་འོད་ཀྱིས་ཕྱེས་ཤོག།</p><p class="ql-block">ཨ་རིག་སྤྲུལ་མིང་བས།</p><p class="ql-block"><br></p> <p class="ql-block">དབྱངས་གསལ་སོ་བཞིའི་གླུ་ཆུང་སྙན་པའི།།</p><p class="ql-block">ཤེས་རིག་སློབ་གྲྭའི་སྒོ་ཐེམ་རེ་རེར།།</p><p class="ql-block">ཐོས་བརྩོན་རིག་པའི་སྐོར་བྲོ་འཁྲབ་བཞིན།།</p><p class="ql-block">མི་ཚེའི་འདུན་མ་འོད་ཀྱིས་ཕྱེས་ཤོག།</p><p class="ql-block">ཨ་རིག་སྤྲུལ་མིང་བས།</p><p class="ql-block"><br></p> <p class="ql-block">སྔོན་བྱོན་ལོ་པཎ་དག་གི་རྔུལ་ཆུའི་རིན།།</p><p class="ql-block">ཕ་དང་མེས་པོའི་སྲོག་གི་དྭངས་མ་སྟེ།།</p><p class="ql-block">ཀ་ཁའི་དབྱངས་རྟ་སྙན་མོ་མཛེས་རྒྱན་དུ།།</p><p class="ql-block">འཛིན་པའི་བུ་མོ་ཁྱོད་རང་ཚེ་ཐག་རིང་།།</p><p class="ql-block">ཙང་བ་སྤྲུལ་མིང་བས།</p><p class="ql-block"><br></p><p class="ql-block"><br></p> <p class="ql-block">བོད་ཡིག་བོད་སྐད་སྨྲ་བའི་སློབ་གྲྭ་རུ།།</p><p class="ql-block">བོད་ཀྱི་དབྱངས་གསལ་ཉི་མ་ཟླ་བ་ཟུང་།།</p><p class="ql-block">བོད་པའི་གཙུག་རྒྱུན་མ་ཟད་འཛམ་གླིང་གི།།</p><p class="ql-block">བོད་འདི་འདེགས་ན་བོད་ཀྱི་གཅེས་ཕྲུག་རྣམས།།</p><p class="ql-block">གྲོགས་གསེར་ལག་པས།</p><p class="ql-block"><br></p><p class="ql-block"><br></p> <p class="ql-block">ཀ་ཁའི་དབུ་ཁྱུད་ཐོག་མ་འབྲི་བའི།།</p><p class="ql-block">ཁ་བའི་དུང་དཀར་ཕ་ལོས་བུ་མོ།།</p><p class="ql-block">ག་ཐག་ཤེས་བྱ་བློ་ངོར་ཟུངས་དང་།།</p><p class="ql-block">ང་རང་དགའ་བའི་ཤིས་ཚིག་སྤྲིངས་ཡོད།།</p><p class="ql-block">རྩོམ་གྲོགས་དཀོན་བཟང་ལྡན་ནས།</p><p class="ql-block"><br></p><p class="ql-block"><br></p> <p class="ql-block">གཅེས་ཕྲུག་མ། </p><p class="ql-block">དེ་རིང་གི་ཉི་མ་འདི་ཁྱོད་ཀྱི་མི་ཚེ་ལ་བྲིས་པའི་གསེར་གྱི་</p><p class="ql-block">དབུ་ཁྱུད་ཡིན་པས།འགོ་བཀྲ་ཤིས་ཤིང་མཇུག་དོན་འགྲུབ་</p><p class="ql-block">པའི་ཁ་གཡང་འབོད།</p><p class="ql-block">དེ་རིང་ཨ་ཕའི་རེ་བ་ཡོད་ཚད་ཁྱོད་ལ་བཅོལ་ཏེ་ཤེས་རིག་གི་</p><p class="ql-block">ཞིང་ཁམས་ལ་ཕྱོགས་པའི་གོམ་སྟབས་རེ་རེ་ནི།</p><p class="ql-block">ཁྱོད་ཀྱི་མ་འོངས་འབྱུང་འགྱུར་ཀྱི་འདུན་མའི་ཡར་ཐོན་རེ་རེ་</p><p class="ql-block">ཡིན་པར་སྨོན། དེ་རིང་ཨ་མའི་དུང་བ་ཡོད་ཚད་ཁྱོད་ལ་ཕྱོགས་པའི་བྱམས་བརྩེའི་མིག་མདངས་རེ་རེ་ནི།ཁྱེད་ཀྱི་མི་ཚེའི་རེ་བསྙེག་ཁྲོད་ཀྱི་རླབས་ཆེའི་བྱ་བཞག་རེ་རེ་ཡིན་པར་སྨོན། </p><p class="ql-block">ཚེ་བསོད་རྒྱས། དབང་ཐང་དར།</p><p class="ql-block">ཞེས་རྒན་དུང་འཇམ་ལགས་ཀྱི་གཅེས་ཕྲུག་མས་སློབ་འགོ་གསར་བ་བརྩམས་པར་ཁ་གཡང་ཞིག་གི་ཚབ་ཏུ་་་གངས་ཁ་བས།</p><p class="ql-block"><br></p><p class="ql-block"><br></p> <p class="ql-block">རིག་པའི་གཤོག་རྩལ་རྒྱས་ཤོག་གཅེས་ཕྲུག་མ།།</p><p class="ql-block"> བརྩོན་པའི་ཆུ་བོ་འཕྱུར་ཤོག་རིག་བཟང་མ།། </p><p class="ql-block">མ་འོངས་མདུན་ལྗོངས་ཡངས་པའི་ས་ཆེན་ལ།། </p><p class="ql-block">ཤེས་རིག་སྒྲོན་མའི་འོད་ཀྱིས་ཁྱབ་གྱུར་ཅིག། </p><p class="ql-block">ཅེས་ཚ་མོ་གངས་དཀར་སྒྲོལ་མ་ཐོག་མའི་སློབ་གྲྭའི་སྒོ་ཐེམ་</p><p class="ql-block">བསྙེགས་པ་ཐོས་རྗེས་དགའ་ཚོར་འགོག་མེད་ངང་དཀར་མོ་</p><p class="ql-block">འཇང་གཞུང་ནས་མཚོ་ལྷོ་བསིར་ཆར་དུ་འབོད་པས་ཤར་མར་བྲིས་སོ།།</p><p class="ql-block"><br></p><p class="ql-block"><br></p> <p class="ql-block">བོད་པའི་བུ་མོ་ཆུང་ཆུང་ཉིན་དེ་རིང་ནས་བཟུང་དབྱངས་གསལ་</p><p class="ql-block">སོ་བཞིའི་བདག་པོ་དེ་ཁྱེད་ཡིན་པས། ཉིན་མཚན་དབྱེར་མེད་དུ་བརྩོན་པར་རེ་སྐུལ་དང་བཅས། ས་ཐག་ཧ་ཅང་རིང་བོ།</p><p class="ql-block"> ཉིན་མཚན་མི་གཅིག་པའི་ས་ཆ(New York)ནས། </p><p class="ql-block">ཁྱེད་ཀྱི་ཨ་ཕའི་དགེ་གྲོགས་རྨོག་བཤད་སྒྲུབ་ནས་ཕུལ།</p><p class="ql-block"><br></p><p class="ql-block"><br></p><p class="ql-block"><br></p> <p class="ql-block">གངས་རི་རྩེ་དགུའི་ཡུལ་ནས་འཁྲུངས་པའི་རིགས་ཀྱི་སྲས་མོ་རིག་ཡག་མ།། དཀར་གསུམ་མངར་གསུམ་བཅུད་ཀྱིས་གསོས་པ་བློ་གྲོས་བདུད་རྩི་འཇོ་བའི་བརྡ།། ལྷ་མཆོག་འཇམ་དབྱངས་ཕྱག་གི་རལ་གྲིས་རྨོངས་པའི་རྩ་བ་ཀུན་བཅོམས་ནས།། མོ་བཙུན་ཁྱེད་ཀྱི་ཐབས་ཤེས་ཉི་ཟླ་གོ་ལའི་མགོན་དུ་འཁོར་བར་ཤོག། </p><p class="ql-block">འཇང་འབྲུག་གིས་རྟེན་འབྲེལ་དུ་ཕུལ་བ། </p><p class="ql-block"><br></p><p class="ql-block"><br></p> <p class="ql-block">འཇམ་དབྱངས་ཕྱག་གི་རལ་གྲི་སྟེ།།</p><p class="ql-block">རྒྱ་མཚོའི་སྟེང་གི་ནོར་བུ་ཡིན།།</p><p class="ql-block">བསོད་ནམས་ཅན་གྱི་བུ་མོ་ལ།།</p><p class="ql-block">སྒྲོལ་མ་དཀར་མོའི་མགོན་སྐྱོབས་མཛོད།།</p><p class="ql-block">ཨ་ཞང་འབའ་རླུང་རྟས།</p><p class="ql-block"><br></p><p class="ql-block"><br></p> <p class="ql-block">ཁྱེད་ཀྱི་བློ་གྲོས་སྣང་བའི་ལང་ཚོ་ཡིས།།</p><p class="ql-block">ཤེས་བྱའི་གནས་ལུགས་རི་མོའི་རྒྱན་ཁུར་ཚེ།།</p><p class="ql-block">སྲིད་པའི་བ་དན་གཡོ་བའི་འཇིག་རྟེན་ནས།།</p><p class="ql-block">ཁྱེད་ཀྱི་སྙན་པ་ཕྱོགས་བཅུར་རྒྱས་བར་ཤོག། </p><p class="ql-block"> རྒན་ལགས་ཀྱི་བུ་མོའི་ཆེས་ཐོག་མའི་སློབ་གླིང་ལ་</p><p class="ql-block">དབུ་ཁྱུད་བྲིས་བར་སློབ་བུའི་མིང་ཙམ་འཛིན་པ་</p><p class="ql-block">འཇང་སྲས་ཧ་ལོ་ནས་གུས་ཕུལ།</p><p class="ql-block"><br></p><p class="ql-block"><br></p> <p class="ql-block">བློ་རིག་དྭངས་གཙང་ཆུ་བོའི་འགྲམ་ངོགས་ལ།།</p><p class="ql-block">ཤེས་རིག་མེ་ཏོག་མཐའ་དག་བཞད་གྱུར་ཅིག།</p><p class="ql-block">སློབ་རའི་ཀ་ཁའི་དབྱངས་དང་དགེ་རྒན་གསུང་།།</p><p class="ql-block">མི་ཚེའི་དགེ་བའི་གྲོགས་སུ་འགྱུར་བར་ཤོག། </p><p class="ql-block">ཨ་ཞང་འབའ་འབྲོག་ཕྲུག་གིས།</p><p class="ql-block"><br></p><p class="ql-block"><br></p><p class="ql-block"><br></p> <p class="ql-block">ལྷ་དར་དཀར་པོ།</p><p class="ql-block">མིག</p><p class="ql-block"> </p><p class="ql-block">རྐང་ཆུང་གོམ་པ་རེ་རེས།།</p><p class="ql-block">རྩྭ་ལྗང་སིལ་བ་གཏོར་བ།།</p><p class="ql-block">འོད་ཀྱི་ཟེགས་མར་གྱུར་ནས།།</p><p class="ql-block">འདུན་ལམ་ཉི་མས་ཚེས་ཤོག།</p><p class="ql-block"> </p><p class="ql-block"><br></p> <p class="ql-block">སློབ་གྲྭའི་སྒོ་ཐེམ་འགྲིམ་ནས།།</p><p class="ql-block">ཀ་ཁའི་གླུ་ངག་སྐྱོར་བ།།</p><p class="ql-block">གངས་ཀྱི་འདབ་མར་གྱུར་ནས།།</p><p class="ql-block">གཤིས་རྒྱུད་དུང་གིས་འབྲི་རོགས།།</p><p class="ql-block"> </p><p class="ql-block"><br></p> <p class="ql-block">དྲིན་ཆེན་ཕ་མ་བསྐྱུར་ནས།།</p><p class="ql-block">ཤེས་བྱའི་ཐང་ལ་རྒྱུ་བ།།</p><p class="ql-block">མི་ཚེའི་འདུན་པའི་ལ་རྩེར།།</p><p class="ql-block">ཉི་གཞོན་བསུ་བའི་དབུ་ཁྱུད།།</p><p class="ql-block"> </p><p class="ql-block"><br></p> <p class="ql-block">ལམ་འདི་ཕ་གིའི་རི་རྒྱབ།།</p><p class="ql-block">གངས་ཀྱི་དབུ་རྩེར་འཐེན་ཡོད།།</p><p class="ql-block">ཤེས་རིག་དར་ཆ་བཟུང་ནས།།</p><p class="ql-block">གངས་ལ་གཟི་འོད་སྣོན་རོགས།།</p><p class="ql-block"> </p><p class="ql-block">གཉེན་གྱི་རྨི་ལམ་ནང་དུ།།</p><p class="ql-block">ཁྱེད་ཀྱི་འཛུམ་ཆུང་བྲིས་ཡོད།།</p><p class="ql-block">སྐྱིད་སྡུག་གང་ལ་འཕྲད་ཀྱང་།།</p><p class="ql-block">འཛུམ་གྱིས་མི་ཚེ་བསུ་དགོས།།</p><p class="ql-block"> </p><p class="ql-block"><br></p> <p class="ql-block">ཕ་མའི་བརྩེ་འཇམ་དྲོད་ཀྱིས།།</p><p class="ql-block">ལང་ཚོའི་མེ་ཏོག་བཞད་ཡོད།།</p><p class="ql-block">ཟེའུ་འབྲི་སྨིན་དང་མ་སྨིན།།</p><p class="ql-block">རང་གི་སྩོལ་བའི་བྱེད་ནུས།།</p><p class="ql-block"> </p><p class="ql-block">ཨ་ཁུའི་སྨོན་འདུན་རླུང་རྟ།།</p><p class="ql-block">སྐྱི་བསེར་རླུང་ལ་བསྐུར་ཡོད།།</p><p class="ql-block">ཚ་མོའི་དགའ་རོགས་སྐྱོ་རོགས།།</p><p class="ql-block">སྨོན་འདུན་གཙང་མས་ཞུས་ཆོག།</p><p class="ql-block"> </p><p class="ql-block">རྒྱང་ནས་བསྐུར་བའི་འཕྲིན་འདི།།</p><p class="ql-block">དྲི་མེད་ལྷ་དར་དཀར་པོ།།</p><p class="ql-block">ཁྱེད་ཀྱི་འགྲོ་ལམ་ཡངས་པོ།།</p><p class="ql-block">ལྷ་དར་དཀར་པོས་བསུས་ཡོད།།</p><p class="ql-block">བདག་གི་གཅེས་པའི་སྲིང་ཆུང་མ་གངས་སྐྱེས་ལྷ་མོ་དང་། གྲོགས་པོ་འབའ་དུང་ཟླ་གཉིས་ཀྱི་བུ་མོ་གངས་དཀར་ལྷ་མོའི་མི་ཚེའི་འདུན་པ་ལ་འོད་རིས་འབྲི་བའི་ཉི་མ་དང་པོ་སྟེ། སློབ་གྲྭའི་སྒོ་ཐེམ་འགྲིམ་པའི་ཉིན་མོར་ཤེས་སྨོན་ཞིག་འབྲི་རོགས་ཞེས་གྲོགས་འབའ་དུང་ཟླས་བསྐུལ་བར་བྱ་བ་དང་སྒྱིད་ལུག་གི་དབང་གིས་དེ་རིང་བར་དུ་འབྲི་མ་ཐུབ་པར་དགོངས་དག་དང་བཅས་རྒྱ་གར་འཕགས་ཡུལ་གནས་མཆོག་རྡ་རམ་ཤཱ་ལ་ནས་མིག་ཏུ་འབོད་པས་གུས་པས་ཕུལ། </p>