<p style="text-align: center;">ཚེ་གང་སློབ་སྦྱོང་བྱས་ནས།།རང་ཉིད་ཚུལ་ལྡན་བསྒྱུར་དགོས།།</p> <p> སྤྱིར་སློབ་གསོའི་ལས་ཀ་ཐམས་ཅད་མཐར་ཐུག་གི་སྙིང་པོའམ་རྟེན་གཞི་གཙོ་བོ་ནི་སློབ་མ་ཡིན་དགོས་ལ། སློབ་མའི་ཐད་ནས་བཤད་ན་ཁྲིད་ཐབས་རིགས་དང་པོའི་སློབ་གསོ་མྱོང་ཐུབ་པ་ནི་ཁོ་ཚོ་རྒྱལ་ཁ་ལ་འཛེགས་པའི་གོམ་པ་དང་པོ་ཡིན་པས། ང་ཚོ་དགེ་རྒན་ཚོས་ངེས་པར་དུ་རིགས་དང་པོའི་ལམ་དུ་སློབ་ཁྲིད་ལེགས་པ་བྱ་རྒྱུ་ནི་འོས་འགན་ཆེན་པོ་རུ་གྱུར་ཡོད། དེའི་རྐྱེན་ཐེངས་འདིར་རང་སློབ་གྲྭའི་ཁྲིད་ཐབས་རིགས་དང་པོའི་དགེ་རྒན་རྣམས་ཀྱི་བོད་སྐད་ཡིག་གི་རྨང་གཞི་མཐོར་འདེགས་གཏོང་བ་དང་། ཕ་སྐད་མ་ཡིག་ལམ་ནས་སྦྱང་ཚན་སོ་སོ་ལེགས་པར་འཁྲིད་ཐུབ་པའི་ཆེད་དུ་སློབ་གྲྭའི་དབུ་ཁྲིད་རྣམས་ཀྱི་རྒྱབ་སྐྱོར་དང་། དགེ་རྒན་བསྟན་པ་ལགས་ཀྱི་ངལ་བ་འཛེམས་མེད་ཀྱི་རོགས་རམ་འོག་ཆེད་དམིགས་ཀྱི་བོད་ཡིག་ཟབ་སྦྱོང་འཛིན་གྲྭ་འདི་འཛུགས་ཐུབ་པ་བྱུང་། དེ་བས་སྤྱི་ལོ ༢༠༢༡ ལོའི་ཟླ་བ ༣ པའི་ཚེས ༨ ཉིན་ཟབ་སྦྱོང་འཛིན་གྲྭ་མགོ་འཛུགས་པའི་མཛད་སྒོ་སྤེལ་བ་ཡིན། </p> <p>མཛད་སྒོའི་རིམ་པ་དང་པོ། </p><p> བོད་ཡིག་སློབ་ཞིབ་ཚོ་ཆུང་གི་གཙོ་འགན་པ་དགེ་རྒན་ཨོ་རྒྱན་རང་གྲོལ་ལགས་ཀྱིས་ཐེངས་འདིས་ཟབ་སྦྱོང་འཛིན་གྲྭའི་ཇུས་གཞི་གཏན་འབེབས་གནང་བ་དང་། ཟབ་སྦྱོང་འཛིན་གྲྭའི་སྒྲིག་ལམ་དང་ཁོང་ཉིད་ཀྱི་རེ་བ་ཁ་ཤས་བཏོན་སོང་།</p> <p>མཛད་སྒོའི་རིམ་པ་གཉིས་པ། </p><p> སློབ་ཞིབ་ཁང་གི་དགེ་རྒན་བསྟན་པ་ལགས་ཀྱིས་ཟབ་ཞུགས་དགེ་རྒན་རྣམས་ལ་“དགེ་རྒན་ནི་ཇི་ལྟར་ཞིག་ཡིན་དགོས”ཚུལ་དང་། ཟབ་སྦྱོང་འཛིན་གྲྭའི་སྦྱོང་བྱ། ཁོང་ཉིད་ཀྱི་རེ་བ་བཅས་ཚོགས་ཞུགས་དགེ་རྒན་རྣམས་ལ་གོ་བསྐོན་བློ་འགུགས་ཀྱིས་གསུངས་སོང་། </p> <p>མཛད་སྒོའི་རིམ་པ་གསུམ་པ། </p><p> སློབ་གཙོ་གཞོན་པ་ཐོའུ་མཱ་ཞོའུ་ལགས་ཀྱིས་ཟབ་ཞུགས་དགེ་རྒན་རྣམས་ལ་ཟབ་སྦྱོང་འཛིན་གྲྭའི་སྒྲིག་ལམ་དང་། སློབ་གསོའི་གལ་ཆེའི་རང་བཞིན་སོགས་རབས་དང་རིམ་པའི་ངང་གསུངས་སོང་། </p> <p>མཛད་སྒོའི་རིམ་པ་བཞི་བ། </p><p> སློབ་གཙོ་བློ་ཆེན་ཧྭ་ལགས་ཀྱིས་མི་ཚེ་གང་པོ་སློབ་སྦྱོང་བྱ་དགོས་ཚུལ་དང་། སློབ་སྦྱོང་བྱ་བའི་གོ་སྐབས་ལ་དང་ལེན་བྱ་དགོས་ཚུལ་སོགས་ཕྱོགས་བསྡོམས་ཀྱི་གསུངས་བཤད་གནང་སོང་། </p> <p> དགེ་རྒན་ནི་རིག་གནས་ཁྲིད་པའི་ཞོར་དུ་ཀུན་སྤྱོད་དང་མི་གཤིས་སོགས་མཛེས་པར་བྱེད་མཁན་གྱི་དེད་དཔོན་ཡིན། དེའི་ཕྱིར་དགེ་རྒན་རང་ཉིད་ཀྱི་རིག་གནས་དང་ཀུན་སྤྱོད་སོགས་ལེགས་བཅོས་གཏོང་བའི་ཞོར་དུ་སྦྱོང་རིགས་ཀུན་ལ་བརྩོན་པ་རྒྱུན་འཁྱོངས་བྱ་རྒྱུ་ནི་འོས་འགན་ཞིག་ཏུ་གྲུབ་ཡོད་པར་རྟོགས་དགོས།</p>